ဆောင်းဥတု နှင့် အဆစ်ရောင်ရောဂါ
ကြည်မြင့်လွင် (မုဒြာ)
အဆစ်ရောင် ရောဂါများတွင် လေးဖက်နာနှင့် ဂေါက်ရောဂါ ခေါ် အဆစ်ကြီးများ တစ်ဆစ်ချင်း ရောင်သည့် ရောဂါများ ပါဝင်သည်။ လေးဖက်နာ ရောဂါတွင်လည်း ပိုးကြောင့်ဖြစ်သော လေးဖက်နာ နှင့် သွေးကြောင့် ဖြစ်သော လေးဖက်နာ၊ အရေပြားထူ လေးဖက်နာ စသည်ဖြင့် အမျိုးမျိုးရှိသည်။ ထိုရောဂါရှိ သူများသည် ဆောင်းဥတုကို ကြောက်ကြသည်။ အချို့မှာ ပူလွန်းသော နွေရာသီ သာမက အေးလွန်းသော ဆောင်းဥတုမှာပါ ရောဂါတိုး ကြသည်။ အကိုက်အခဲဒဏ် ပို၍ ခံရသည်ကို တွေ့ရသည်။
လက်ဆစ်လေးများ ရောင်သူ အမျိုးသမီးငယ် တစ်ဦးသည် ရုံးဝန်ထမ်း တစ်ဦးဖြစ်ပြီး ကွန်ပျူတာနှင့် အလုပ်လုပ် ရသည်။ ကွန်ပျူတာ ဖြင့် စာရိုက်သောအခါ လက်ချောင်း လေးများ သုံးရသည်။ သူအလုပ် လုပ်ရသော အခန်းမှ အဲကွန်း အအေးဓာတ် ပေးထားသော အခန်းဖြစ်သည်။ နွေရာသီက အဆင်ပြေ ခဲ့သော်လည်း ဆောင်းရာသီသို့ ရောက်သောအခါ အဆင်မပြေတော့ အအေးဒဏ်ကြောင့် သူ့၏ လက်ချောင်း အဆစ်လေးများ ကိုက်လာသည်။ အချို့ လက်ဆစ်လေး များမှာ ရောင်ပြီး အထိမခံနိုင်သည် အထိ ဖြစ်လာသည်။ သူမသည် ငယ်စဉ်က အာသီး ရောင်ဖူးသည်။ ထိုပိုးကြောင့် လေးဖက်နာ ဖြစ်လာသည်ဟု ဆရာဝန်က ပြောဖူးသည်။
ဘုန်းတော်ကြီး တစ်ပါးမှာ ဆွမ်းခံကြွရင်း ခလုတ်တိုက် မိရာမှ ဘယ်ဘက် ခြေမဆစ် နာသွားသည်။ ပရုတ်ဆီ လိမ်းရာမှ ရောင်လာပြီး ပို၍ နာလာသည်။ နောက်ပိုင်းတွင် ထိုအနာသည် ခြေမျက်စိအထိ နာလာသည်။ အထူးကု ဆရာဝန် ပြသောအခါ မိမိတွင် ဂေါက်ရောဂါ ရှိနေမှန်း သိရသည်။ သွေးအတွင်းတွင် အက်စစ်ဓာတ် များနေသည်။ ဝမ်းတွင်းသား နှင့် ပဲပင်ပေါက်များ ဘုဉ်းပေးမိသဖြင့် ပိုရောင်လာခြင်း ဖြစ်သည် ဟု ဆိုသည်။ နေ့တွင် ဝေဒနာ သက်သာသော်လည်း ညဥ့်နက်သော အခါ ဆောင်း အအေးဒဏ်ကြောင့် အကိုက်အခဲ ပို၍ လာသည်။ အအေးကြောင့် ဝေဒနာပို၍ တိုးလာသည်ဟု ဆိုသည်။
အကိုက်အခဲ ရောဂါ မှန်သမျှသည် လေပူစာများနှင့် မတည့်ပေ။ မျှစ်၊ မျှစ်ချဉ်၊ ကုလားပဲ၊ ပဲပင်ပေါက် စသည်တို့နှင့် မတည့်ပေ။ အုန်းထမင်း၊ ဒန်ပေါက်၊ ဒူးရင်းသီး စသည့် အပူစာများလည်း မတည့်ပေ။ အနီရောင်ရှိသော အသား၊ ဝမ်းတွင်းသား များနှင့်လည်း မတည့်ပေ။
အဆစ်ရောင်ပျောက်ဆေးနည်းမှာ-
- ပိတ်ချင်းသီး ၅ကျပ်သား
- ငရုတ်ကောင်း ၅ကျပ်သား
- ကံ့ကော်ဝတ်ဆံ ၅ကျပ်သား
- ဆောင်မေးခါး ၅ကျပ်သား
- စမုံမျိုးငါးပါး ၅ကျပ်သား
- သစ်ကြံပိုး ၅ကျပ်သား
- ကရဝေးရွက် ၅ကျပ်သား
- ပန်းနု ၁ဝကျပ်သား
- တောင်မရိုးခေါက်၂၅ကျပ်သား
- (စုစုပေါင်းဆေးချိန် ၇ဝကျပ်သား)
အထက်ပါ ဆေးများအားလုံး ကိုစုပြီး အမှုန့်ကြိတ်ပါ။ ရရှိသော အမှုန့်ကို ငါးကျပ်သားခန့် ခွဲပြီး ပျားရည်စစ်စစ် နှင့်ရော၍ တေဆေး အဖြစ်ပြု လုပ်ပါ။ ဟင်းစားဇွန်း တစ်ဇွန်း တစ်နေ့ နှစ်ကြိမ်အထိ စားနိုင်ပါသည်။ လေးဖက်နာ အမြစ်ပြတ် စေသောဆေး ဟူ၍ လည်းကောင်း၊ တောင်မရိုးဆေးကြီး ဟူ၍ လည်းကောင်း ရှေးဆေးကျမ်း ပေမူများတွင် ဖော်ပြထားသော ဆေးနည်းကောင်း ဖြစ်သည်။
#Yadanarpondaily
#ရတနာပုံနေ့စဉ်
.jpg)
No comments:
Post a Comment