" အပစာယန " အကျင့်မြတ်
လူ့ဘောင် လောက၌ ကျင်လည် ကျက်စားကြ ရာတွင် ယဉ်ကျေး သိမ်မွေ့၍ စည်းကမ်း ကောင်းမွန်သော လူတစ်ဦး ဖြစ်လာစေရန် လက်ဦးဆရာများ ဖြစ်သော မိဘများက ဆိုဆုံးမကြ ရမည် ဖြစ်သည်။ သို့မှသာ ယဉ်ကျေးသော သူ၊ စည်းကမ်း ကောင်းမွန်သော သူတစ်ဦး ဖြစ်လာ ပေမည်။
ယနေ့ လူငယ်လေးများ အနေဖြင့် အိမ်မှာနေလျှင် အိမ်စည်းကမ်း၊ ကျောင်းသို့ သွားလျှင် ကျောင်းစည်းကမ်း မှသည် နိုင်ငံ တစ်နိုင်ငံ၊ ဘာသာ တစ်ခုသည် ပင်လျှင် လိုက်နာ စောင့်ထိန်း ကျင့်ကြံရမည့် စည်းကမ်းများ၊ အကျင့်မြတ် အကျင့်ကောင်း များရှိရမည် ဖြစ်သည်။ မိမိ၏ အိမ်တွင် လူကြီးများ၏ ရှေ့၌ မလုပ်သင့် မလုပ်ထိုက် သည်များကို ရှောင်ကြဉ် ရမည် ဖြစ်သကဲ့သို့ ကျောင်းတွင်လည်း ဆရာ၊ ဆရာမ များ၏ရှေ့၌ မည်သို့ နေထိုင်ပြောဆို ရမည်ကို သိထားရမည် ဖြစ်သည်။
''စည်းကမ်းအစ စာသင်ကျောင်း က'' ဟု ဆိုသည့်အတိုင်း လူငယ် မောင်မယ် တို့သည် ကျောင်းတွင် ဆရာ၊ ဆရာမ များ၏ ဆုံးမမှုဖြင့် ယဉ်ကျေး သိမ်မွေ့၍ စည်းကမ်း ကောင်းမွန်သော လူငယ်လေး များအဖြစ် လူမှု အသိုက်အဝန်း သို့ ဝင်ဆံ့လာကြ ရသည်။ မိမိရပ်ရွာ အတွင်း၌ ဖြစ်စေ၊ ခရီးသွား ဟန်လွဲဖြစ်စေ ကျောင်းဆရာ၊ ဆရာမများနှင့် ကြုံကြိုက် လာပါက ရိုသေ လေးစားမှု သရုပ်ကို ပြသခြင်း၊ ကူညီဖေးမ ပေးခြင်းတို့ကို ဆောင်ရွက် ပေးကြရမည် ဖြစ်သည်။
အဆိုပါ ကိုယ်အမူအရာ၊ နှုတ်အမူအရာ အကျင့်ကောင်း များ၏ အစကို လေ့လာ ကြည့်လျှင် မြတ်ဗုဒ္ဓ ဟောကြား တော်မူခဲ့သော အဘိဓမ္မာ တရားတော်၏ ပုညကိရိယာ ဝတ္ထု ဆယ်ပါးမှ တစ်ပါး အပါအဝင် ဖြစ်သော 'အပစာယန' အကျင့်မြတ်ကို စောင့်ထိန်းခြင်း ပင် ဖြစ်သည်။ 'အပစာယန' အကျင့်မြတ် အကြောင်းကို လေ့လာ ကြည့်လျှင် အသက်အရွယ် အားဖြင့် လည်းကောင်း၊ ဉာဏ်ပညာ အားဖြင့် လည်းကောင်း၊ သီလအားဖြင့် လည်းကောင်း၊ ဂုဏ်အားဖြင့် လည်းကောင်း၊ သိက္ခာ အားဖြင့် လည်းကောင်း ကြီးမြတ်သူ တို့ကို ရိုသေ ကြရမည် ဖြစ်သည်။
ယခုအခါ လူငယ် အများစုသည် ကိုယ်အမူအရာ၊ နှုတ်အမူအရာ စောင့်စည်း စောင့်ထိန်း ခြင်းများ တဖြည်းဖြည်း လျော့နည်း လာသည်ကို တွေ့ရသည်။ ထိုသို့ ဖြစ်ရခြင်းမှာ မသိရှိ၍ လည်းကောင်း၊ ဆုံးမရာ၌ အသေးစိတ် လိုက်နာ ရမည်များကို ပြောပြ၊ ညွှန်ပြခြင်း အားနည်း၍ လည်းကောင်း ဖြစ်ကြ ရသည်။
လူကြီးများ ရှေ့တွင် ခြေချိတ်၍ ထိုင်ခြင်း၊ ဒူးပေါ်၊ ပေါင်ပေါ် အမြင် မတင့်တယ်စွာ နေထိုင်ခြင်း၊ မျက်နှာ အမူအရာ ခက်ထန်ခြင်း၊ အရိုအသေ တန်ခြင်း စသည့်ပြုမူ နေထိုင်ခြင်း များမှ ရှောင်ကြဉ်ခြင်း သည် ကိုယ် အမူအရာ အားဖြင့် စောင့်စည်း စောင့်ထိန်းခြင်း ဖြစ်သည်။ ထို့ကြောင့် 'အပစာယန' ဟူသည် လိုက်နာ ကျင့်ကြံ အားထုတ်ပါက ကုသိုလ် အရာတွင် အမြတ်ဆုံး ကုသိုလ် မဟာ ကုသိုလ် မြောက်သည်။
သို့ဖြစ်ရာ ဗုဒ္ဓဘာသာဝင် လူငယ် မောင်မယ်များ အနေဖြင့် ဗုဒ္ဓမြတ်စွာ ဆိုဆုံးမ ခဲ့သည့် ကုသိုလ်တော်မြတ် တစ်နည်း အားဖြင့် မြန်မာတို့၏ ချစ်ခင်မြတ်နိုး လေးစားဖွယ် ကောင်းသော ယဉ်ကျေးမှု ဓလေ့များကို သိရှိလိုက်နာ ကျင့်ကြံ နိုင်စေရန် 'အပစာယန' သီလတော် မြတ်ကို သိရှိပြီး ပွားများ နိုင်စေရန် စေတနာထား တိုက်တွန်း ရေးသား လိုက်ရပေသည်။
အယ်ဒီတာ့အာဘော်
#Yadanarpondaily
.jpg)
No comments:
Post a Comment