မန္တလေး ၊ ၁၄-၁-၂၀၁၅
ဧရာဝတီမြစ် တစ်လျှောက် နေထိုင်ကျက်စား ကြသော ဧရာဝတီ လင်းပိုင် များသည် ဧရာဝတီ မြစ်ကျဉ်း နေရာများကို ဖြတ်ကျော် သွားလာ ကျက်စား နေထိုင်ခြင်း မရှိကြောင်း၊ ဧရာဝတီ လင်းပိုင် လေ့လာသော ပညာရှင်များ ထံမှ သိရသည်။
ဗန်းမော်နှင့် မန္တလေး အကြား နေထိုင်ကျက်စား ကြသော ဧရာဝတီ လင်းပိုင်များကို အုပ်စုကြီး သုံးစု ခွဲခြားသုံးသပ် နိုင်ကြောင်း၊ ဗန်းမော်မြို့ နှင့် စင်ခမ်း (ဒုတိယမြစ်ကျဉ်း) အကြားရှိ လင်းပိုင်အုပ်စု၊ သပိတ်ကျင်းမြို့(တတိယ မြစ်ကျဉ်း) နှင့် ရွှေကူမြို့ (ဒုတိယ မြစ်ကျဉ်း) အကြားရှိ ဧရာဝတီ လင်းပိုင်အုပ်စု၊ ကျောက်မြောင်း (တတိယ မြစ်ကျဉ်း) နှင့် မန္တလေးမြို့ အကြားရှိ လင်းပိုင်အုပ်စု ဖြင့် ခွဲခြားလေ့လာ နိုင်ကြောင်း ငါးလုပ်ငန်း ဦးစီးဌာနမှ လင်းပိုင် ထိန်းသိမ်း စောင့်ရှောက်ရေး တာဝန်ခံ၏ လေ့လာချက်များ အရ သိရသည်။
''ကျွန်တော်တို့ လေ့လာ သိရှိချက် တွေအရ ဧရာဝတီ လင်းပိုင် တွေဟာ မြစ်ကျဉ်းနေရာ တွေကို ဖြတ်ကျော် သွားလာ နေထိုင်ခြင်း မရှိပါဘူး။ သူ့အုပ်စုနဲ့သူ၊ နေထိုင်ကြ ပါတယ်။ မြစ် အထက်ပိုင်းက လင်းပိုင်တွေက လဲ အောက်ပိုင်းကို လာရောက် လေ့ မရှိသလို၊ အောက်ပိုင်း က လင်းပိုင် တွေကလဲ မြစ်ကျဉ်းကို ဖြတ်ပြီး အပေါ်ပိုင်းကို မသွားရောက်ကြ ပါဘူး။ သူတို့က ရေစီးသန်တဲ့၊ ရေစီးကြမ်းတဲ့၊ ကျောက်ဆောင်၊ ကျောက်တုံးတွေ များတဲ့နေရာကို မဖြတ်ကြ ပါဘူး .. '' ဟု ၄င်းက ဆက်လက် ပြောပြသည်။
ဧရာဝတီလင်းပိုင် သုတေသန ပြု လေ့လာရေး ခရီးစဉ်ကို ၂ဝဝ၂ ခုနှစ်မှ စတင် ဆောင်ရွက် ခဲ့ပြီး ငါးလုပ်ငန်း ဦးစီးဌာန၊ မွေးမြူရေး၊ ရေလုပ်ငန်းနှင့် ကျေးလက် ဒေသ ဖွံ့ဖြိုးရေး ဝန်ကြီးဌာန နှင့်သားငှက် ထိန်းသိမ်းရေး အဖွဲ့ (WCS) တို့ နားလည်မှု စာချွန်လွှာ MoU ရေးထိုးလျက် မန္တလေးမြို့မှ ဗန်းမော်မြို့ အကြား ဧရာဝတီမြစ်ပိုင်း တွင် ဧရာဝတီ လင်းပိုင် ကောင်ရေ စာရင်း ကောက်ယူခြင်း နှင့် သုတေသန လုပ်ငန်းများ၊ ဧရာဝတီ လင်းပိုင် ထိန်းသိမ်း ကာကွယ် စောင့်ရှောက်ရေး လုပ်ငန်းများကို စဉ်ဆက်မပြတ် ပြုလုပ်ခဲ့ကြ ကြောင်း၊ ထိုသို့ လေ့လာချက်များ အရ ဧရာဝတီ လင်းပိုင်များ သည် မြစ်ကျဉ်းဖြတ်ကျော် ကျက်စားခြင်း မရှိကြောင်း သိရသည်။
ထို့ပြင် အဆိုပါ လင်းပိုင်များသည် တစ်ကြိမ်လျှင် တစ်ကောင်သာ မွေးဖွားလေ့ရှိပြီး အမြွှာ မွေးဖွားခြင်းကို အလွန် ရှားပါးစွာ တွေ့ရကြောင်း၊ ဧရာဝတီ လင်းပိုင် များသည် ၁၄ လကြာ ကိုယ်ဝန်ဆောင်ကာ သားပေါက် များကို ၁၈လ ကြာ နို့တိုက်ကျွေး စောင့်ရှောက်ကြပြီး သက်တမ်း အားဖြင့် နှစ် ၃ဝ မှနှစ် ၅ဝ အတွင်း ရှိကြကြောင်း လေ့လာသူ ပညာရှင်များထံ မှ သိရသည်။(၁၈၀)
#Yadanarpondaily
#ရတနာပုံနေ့စဉ်
.jpg)
No comments:
Post a Comment