မျိုးကောင်းမျိုးသန့်မိုးစပါးများကို မိတ္ထီလာမြို့နယ်အတွင်းရှိ ဒေသခံတောင်သူများလက်ဝယ်သို့ ဖြန့်ဝေရောင်းချပေးမည်

-

မိတ္ထီလာ ဒီဇင်လာ ၂၅

-

မန္တလေးတိုင်းဒေသကြီး မိတ္ထီလာမြို့နယ်၌ စိုက်ပျိုးရေး ဦးစီးဌာနနှင့် ဒေသခံတောင်သူများ ပူးပေါင်း၍ မျိုးကောင်းမျိုးသန့် မိုးစပါးများရရှိရန် အကောင်အထည်ဖော် ဆောင်ရွက်လျက်ရှိကြောင်းသိရသည်။

-

ဒေသခံတောင်သူများ မျိုးကောင်းမျိုးသန့် မိုးစပါးများစိုက်ပျိုးနိုင်ရေး ဆောင်ရွက်လျက်ရှိရာ ဇောင်းချမ်းကုန်းကျေးရွာ ကွင်းအမှတ်(၇၃၇) ဦးပိုင်အမှတ်(၃၈)ရှိ မိုးစပါး စိုက်ဧက ရှစ်ဧက၌ စိုက်ပျိုးသည့် မနောသုခ(RS) ကိုယမန်နေ့နံနက်ပိုင်းက ရိတ်သိမ်းခြွေလှေ့ရာ မျိုးကောင်းမျိုး သန့်တစ်ဧက ၈၆ တင်းထွက်ရှိသည်။

-

ထို့ပြင် တောင်သူများ မျိုးကောင်းမျိုးသန့် စိုက်ပျိုးနိုင်ရေးအတွက် စိုက်ပျိုးချိန်တွင် သတ်မှတ် သည့် ပင်ပြည့် ကွက်ပြည့် ရရှိနိုင်ရေး၊ သဘာဝမြေဆွေး (နွားချေး)များနှင့် ဓာတ်မြေသြဇာ သုံးစွဲမှုများစနစ်တကျရှိစေရေးတို့ အတွက် စိုက်ပျိုးရေး ဦးစီးဌာနမှ ဝန်ထမ်းများက စိုက်ပျိုး ချိန်၊ အပင်ကြီးထွားချိန်၊ ရိတ်သိမ်းချိန်များတွင် ကွင်းဆင်း၍ ဒေသခံတောင်သူများနှင့် ပူးပေါင်း ဆောင်ရွက်ပေးပြီး ယခုရရှိသည့်မျိုးကောင်းမျိုးသန့်မိုးစပါးများကို ဒေသခံတောင်သူများ လက် ဝယ်သို့ ပြန်လည် ဖြန့်ဝေရောင်းချ ပေးမည်ဖြစ်သည်။

-

မြို့နယ်အတွင်းရှိကျေးရွာများ၌ မိုးစပါးကို ၂ဝ၁၈-၂ဝ၁၉ ခုနှစ်တွင် မိတ္ထီလာကန်ရေဖြင့် မိုးစပါး စိုက်ဧက ၃၉၄၃ ဧက၊ မုန်တိုင်ဆည်ရေဖြင့် ၄၅၉ ဧက၊ ချောင်းကောက်ဆည်ဖြင့် ၁၇၁၃ ဧက၊ ညောင်ကုန်းဆည်မှဧက ၁၄ဝ၊ လက်ခုပ်ပင်တမံဖြင့် ၁၆၄ ဧက၊ လွန်ငင်ဆည်မှ ၁၂ ဧက၊ ရှမ်းမငယ်ဆည်မှ ဧက ၂ဝ၊ မြင်တော်ကန်ရေဖြင့် ၅၇ ဧက၊ အခြားကျေးရွာ ပိုင်ကန်များဖြင့် ၄၁၉ ဧက စိုက်ပျိုးနိုင်ခဲ့ကြောင်း၊ ယင်းနောက်မိုးကောင်းသောက်(မိုးရေ)ဖြင့် ၅၅၂၂ ဧက စိုက်ပျိုးရာ စုစုပေါင်း ၁၂၄၄၉ ဧက စိုက်ပျိုးခဲ့ကြောင်း စိုက်ပျိုးရေးဦးစီးဌာန မြို့နယ်ဦးစီးမှူးထံမှ သိရသည်။

-

(၆ဝ၂)

-

#မြ၀တီနေ့စဉ်သတင်းစာ