မင်းဘူး ၁၉-၆-၂ဝ၁၈
မကွေးတိုင်းဒေသကြီး မင်းဘူး(စကု) မြို့နယ်အတွင်း ခြောက်ရက်တိုင် မိုးဆက်တိုက်ရွာသွန်း ခဲ့ခြင်းကြောင့် စိုက်ပျိုးထားသည့် နှမ်းစိုက်ခင်းများ ရေနစ်ပျက်စီးခဲ့ သော်လည်း ယခုလပိုင်းတွင် နှမ်းဈေးမြင့်တက် နေသဖြင့် ထပ်မံထွန် ယက်စိုက်ပျိုးနေကြောင်း စိုက်ပျိုးရေးဦးစီးဌာနမှ သိရသည်။
မြို့နယ်အတွင်းရှိ ကျောက်တန်း၊ရေမျက်၊ မောင်းမကန်၊ ရေတွင်းကုန်း၊ ပေါက်ပင်တွင်း၊ ဆင်လမ်းကြီး၊ မုန်ထောင်၊ သီးကုန်း၊ ဆင်ခေါင်း၊ ကုန်းသာ စသည့်ကျေးရွာများတွင် မိုးရွာသွန်းမှုများခဲ့၍ နှမ်းခင်းများ ပျက်စီးခဲ့ကြောင်းသိရသည်။"တစ်နယ်လုံးက နှမ်းတောင်သူ တော်တော်များများ စိုက်ခင်းတွေ ပျက်စီးခဲ့ကြတယ်။ ပျက်သွားတဲ့ နှမ်းစိုက်ခင်းတွေကို ပြန်မစိုက်ဘဲနေတာ။ နှမ်းဈေးက ကောင်းနေတော့ ပျက်တဲ့နေရာတွေ ထပ်ပြီးထွန်ယက် စိုက်ပျိုးနေပါတယ်" ဟု မင်းဘူးမြို့နယ် ရေမျက်ကျေးရွာမှ တောင်သူ ကိုမင်းမင်းဦးက ပြောပြသည်။
ယခုလက်ရှိတွင် နှမ်းဖြူတစ် တင်းလျှင် ငွေကျပ် ၅၁ဝဝဝ၊ နှမ်းနက်တစ်တင်းလျှင် ငွေကျပ်၄၈ဝဝဝ၊ နှမ်းနီ၊နှမ်းည်ိုတစ်တင်းလျှင် ငွေကျပ် ၃၆ဝဝဝ ရှိပြီး တရုတ်နိုင်ငံက မှာယူမှုများပြား နေသောကြောင့် ယခုကဲ့သို့ ဈေးမြင့်တက် လာခြင်းဖြစ်ကြောင်း မကွေးမြို့ရှိ နှမ်း ကုန်သည်ကြီးများထံမှ သိရသည်။
"အခု နှမ်းဈေးက ကောင်းနေတော့ ပျက်သွားတဲ့ အခင်းတွေကို အစားထိုးပြန်စိုက်နေတယ်။ နွေနှမ်းစိုက်တဲ့ စကုနယ်၊ပွင့်ဖြူနယ်တွေက နှမ်းခင်းတွေ ရေနစ်ပျက်စီးကုန်တယ်။ နှမ်းပေါ်ချိန် နှမ်းအထွက်နည်းမှာကြောင့် နှမ်းဈေးတွေ မြင့်တက်ခဲ့တာပါ။ အရင်နှစ်က နှမ်းဈေးမကောင်းတော့ အခုလို ရေနစ်ခဲ့တဲ့အခင်းတွေကို ပြန်မစိုက်ခဲ့ကြဘူး။ ပြန်စိုက်မယ်ဆို စိုက်ပျိုးစရိတ်က တက်လာမှာပါ။ ဒါပေမဲ့ နှမ်းဈေးကောင်းတော့ ဒေသကတောင်သူတွေ ပျက်သွားတဲ့ အခင်းတွေကို ပြန်ပြီး စိုက်နေကြတယ်"ဟု မင်းဘူးမြို့နယ် ပေါက်ပင်တွင်း ကျေးရွာမှ တောင်သူ ကိုဝင်းလှိုင်က ပြောပြသည်။
#Themyawadydaily
.jpg)
No comments:
Post a Comment