မန္တလေးမြို့ရှိ ပဲပြားစက်ရုံများကို ရှောင်တခင်စစ်ဆေးရာမှ စားသုံးရန်မသင့်သည့် ဆေးဝါးများဖြင့် ပြုလုပ်ထားသော ပဲပြားတံဆိပ်လေးမျိုး စစ်ဆေးတွေ့ရှိ၍ စက်ရုံနှစ်ရုံကို ရက်အကန့်အသတ်မရှိ ပိတ်သိမ်း

FDA နှင့် ပူးပေါင်းအဖွဲ့က ပဲပြားစက်ရုံတစ်ရုံကို ရှောင်တခင်စစ်ဆေးစဉ်။

မန္တလေး ၂၀-၆-၂၀၁၇

ပဲပြားစက်ရုံများကို ရှောင်တခင်စစ်ဆေးရာမှ စားသုံးရန်မသင့်သည့် ဖော်မလင်ဖြင့် ပြုလုပ်ထားသော ပဲပြားတံဆိပ်လေးမျိုး စစ်ဆေးတွေ့ရှိ၍ စက်ရုံ နှစ်ရုံကို ဇွန် ၂ဝ ရက်မှစ၍ ရက်အကန့်အသတ်မရှိ ပိတ်သိမ်းခဲ့ကြောင်းမန္တလေးတိုင်းဒေသကြီး အစားအသောက်နှင့် ဆေးဝါးကွပ်ကဲမှုဦးစီးဌာန ဒုတိယညွှန်ကြားရေးမှူး ဒေါက်တာကျော်ကျော်က ပြောပြ၍ သိရသည်။ 

''ဇွန် ၁၂ရက်က ပြည်ကြီးတံခွန်မြို့နယ် (စ) ဈေးမှာ ပဲပြား A နဲ့ T အမှတ်တံဆိပ်တွေမှာ စားသုံးရန်မသင့်တဲ့ ဖော်မလင်ဆေး တွေ့ရှိခဲ့တဲ့အတွက် ဒီနေ့ပူးပေါင်းအဖွဲ့နဲ့ ပဲပြားစက်ရုံလေးရုံကို ရှောင်တခင် ဝင်ရောက်စစ်ဆေးခဲ့ပါတယ်။ စက်ရုံ လေးရုံက A အမှတ်တံဆိပ်၊ T အမှတ်တံဆိပ်၊ 7 အမှတ်တံဆိပ်၊ Y အမှတ်တံဆိပ်၊ I အမှတ်တံဆိပ်၊ K အမှတ်တံဆိပ်နဲ့ အမှတ်တံဆိပ်မပါတဲ့ပဲပြား ခုနစ်မျိုးကို ကျွန်တော်တို့ FDA ရုံးက ဓာတ်ခွဲခန်းမှာ ချက်ချင်းဓာတ်ခွဲစစ်ဆေး ကြည့်တဲ့အခါ ပြည်ကြီးတံခွန်မြို့နယ် စွယ်တော်မြတ် စေတီတော်အနီး ပဲပြားစက်ရုံက A နဲ့ T အမှတ်တံဆိပ်၊ ပုသိမ်ကြီးမြို့နယ် ဆင်ရွာကြီးကျေးရွာစက်ရုံ တစ်ရုံက 7 နဲ့ Y တံဆိပ်ပါ ပဲပြားစုစုပေါင်း လေးမျိုး ဖော်မလင် ဆေးအသုံးပြု ထားတာတွေ ရှိတဲ့အတွက် ဒီနေ့ကစပြီး စက်ရုံတွေကို ပိတ်သိမ်းခဲ့ပါတယ်''ဟု ဒေါက်တာကျော်ကျော်က ဆက်လက်ပြောပြသည်။

ရှောင်တခင်သွားရောက် စစ်ဆေးခဲ့သော ပူးပေါင်းအဖွဲ့များသည် အစားအသောက် နှင့်ဆေးဝါးကွပ်ကဲရေး ဦးစီးဌာန၊ မန္တလေးမြို့တော် စည်ပင်သာယာရေးအဖွဲ့ဝင်များ၊ ပြည်သူ့ကျန်းမာရေး ဦးစီးဌာနအဖွဲ့ဝင်များ၊ စားသုံးသူ ရေးရာ ဦးစီးဌာနမှအဖွဲ့ဝင်များ၊ မြို့နယ်ရဲတပ်ဖွဲ့ဝင်များ၊ စည်ပင်သာယာရေး ရဲတပ်ဖွဲ့ဝင်များ၊ ရပ်ကွက်အုပ်ချုပ်ရေး အဖွဲ့ဝင်များနှင့် ရပ်မိရပ်ဖများ ပါဝင်စစ်ဆေးခဲ့သည်။

ယခုကဲ့သို့ ရှောင်တခင်စစ်ဆေးမှုများကို ဈေးများ၊ စက်ရုံများကို စဉ်ဆက်မပြတ်စစ်ဆေးကာ အရေးယူဆောင်ရွက်မှုများ ဆက်လက်ပြုလုပ်သွားမည် ဖြစ်ကြောင်း သိရသည်။

#Yadanarpondaily