ခရမ်းလွန်ရောင်ခြည် အန္တရာယ် သတိပြုပါ
နွေရာသီ ရောက်ပြီဆိုလျှင် သတိပြုရမည့် သဘာဝ ဘေးအန္တရာယ်မှာ ခရမ်းလွန် ရောင်ခြည် အန္တရာယ်ဖြစ်သည်။ လွန်ခဲ့သည့် နှစ်များအတွင်း ကမ္ဘာမြေပြင် အထက်ရှိ အိုဇုန်းလွှာမှာ လူတို့၏ ပယောဂဖြင့် ကာဗွန်ဒိုင် အောက်ဆိုက် ကဲ့သို့ ဓာတ်ငွေ့များ လေထုအတွင်း အလွန်အကျွံ ထုတ်လွှတ်လာ၍ တဖြည်းဖြည်း ပါးလွှာလာပြီး ကမ္ဘာမြေသို့ နေ၏အပူရှိန်နှင့် အတူပါလာသော ခရမ်းလွန် ရောင်ခြည် ကျရောက်မှု သည်လည်း တိုးလာလျက် ရှိသည်။
မြန်မာနိုင်ငံတွင် နွေကာလ၏ အပူဆုံးအချိန် ဖြစ်သည့်လများသည် ခရမ်းလွန်ရောင်ခြည် ကျရောက်မှု အညွှန်းကိန်း အမြင့်ဆုံးသို့ ရောက်ရှိတတ်သည်။ မတ်လမှ ဧပြီ ၊ မေလတိုင်အောင် ပူပြင်းသော နွေကာလနှင့်အတူ ခရမ်းလွန်ရောင်ခြည် အန္တရာယ်ကို ရင်ဆိုင်ရလေ့ ရှိသည်။ ခရမ်းလွန်ရောင်ခြည် ကျရောက်ခြင်းကြောင့် နေလောင်ခြင်း၊ အသားညိုမည်းခြင်း၊ မျက်စိတိမ်စွဲခြင်း၊ အရေပြားများ အိုမင်းရင့်ရော်ခြင်း၊ ခုခံအားကျဆင်းခြင်းနှင့် အရေပြားကင်ဆာ ဖြစ်နိုင်ခြင်း စသော ရောဂါများ ဖြစ်ပွားနိုင်သည်။
ယခု နွေကာလသည် အပူရှိန် ပြင်းနိုင်ကြောင်း ပညာရှင်များက ခန့်မှန်းထားသည်။ ပူပြင်းသော နေရောင်ခြည် ကျရောက်နိုင်သည့် နံနက် ၁ဝနာရီမှ ညနေ ၄နာရီထိ ခရမ်းလွန်ရောင်ခြည် အန္တရာယ် ကို သတိပြု သွားလာရန် လိုအပ်သည်။ နေရောင်ခြည် အောက်တွင် သွားလာလှုပ်ရှား နေသူများ၊ အလုပ်လုပ်ကိုင် သူများနှင့် ကလေးသူငယ်များ အထူးသတိပြုရန် လိုအပ်သည်။ နေရောင်ခြည် အောက်တွင် မဖြစ်မနေ သွားလာနေကြ သူများ အနေဖြင့် မျက်နှာ၊ လည်ပင်း၊ ပခုံးတို့ကို လုံခြုံအောင် ဦးထုပ်၊ ထီး၊ အင်္ကျီလက်ရှည်များ ဝတ်ဆင် သွားလာသင့်သည်။
ခရမ်းလွန် ရောင်ခြည်သည် လူကြီးများထက် အသားအရေ နုနယ်သေးသော ကလေးများကို ပိုမို ထိခိုက်စေနိုင်သည်။ ကလေးမိခင်များ နေပူကျဲကျဲတွင် အကာအကွယ် မပါဘဲ သွားလာခြင်း မပြုသင့်ပေ။ ယခုနှစ် နွေကာလသည် ယခင်နှစ် နွေကာလထက် ပိုမိုပူနိုင်ကြောင်း ပညာရှင်များက ခန့်မှန်းထားရာ ပူပြင်းသော ရာသီဥတုကြောင့် ကျန်းမာရေး ပြဿနာများ ပိုမိုဖြစ်ပွားနိုင်၍ ဂရုပြုနေထိုင်ရန် လိုအပ်သည်။ အပူလျှပ်ခြင်း၊ ဖျားနာခြင်း၊ ဦးနှောက် သွေးကြော ပြတ်ခြင်း စသော ကျန်းမာရေး ပြဿနာများ ကြုံတွေ့ရ နိုင်သည်။
သို့ဖြစ်ရာ ပူပြင်းသော နွေကာလအတွင်း လူတိုင်းလူတိုင်း နေပူထဲတွင် သတိပြု သွားလာရန် အရေးကြီးသည်။ အထူးသဖြင့် သက်ကြီးရွယ်အို များနှင့် ကလေးငယ်များ သတိပြုသင့်သည်။ ခရမ်းလွန် ရောင်ခြည် ကျရောက်မှုကြောင့် ကျန်းမာရေး ပြဿနာများ မဖြစ်ပွားစေရန် နေပူထဲတွင် သတိပြုသွားလာ ကြရမည် ဖြစ်ပါကြောင်း သတိပေး ရေးသားတင်ပြ လိုက်ရပေသည်။
ရတနာပုံနေ့စဉ်သတင်းစာ
.jpg)
No comments:
Post a Comment