www.themyawadydaily.blogspot.com . . . www.facebook.com/themyawadydaily . . . https://twitter.com/Themyawadydaily

Tuesday, December 13, 2016

မိရိုးဖလာ လုပ်ကိုင်လာသည့် မြေအိုးလုပ်ငန်း ပျောက်ကွယ်နိုင်သည့် အခြေအနေနှင့် ရင်ဆိုင်နေရ




စစ်ကိုင်း ၊ ၁၃-၁၂-၂၀၁၆

စစ်ကိုင်းတိုင်း ဒေသကြီး၊ စစ်ကိုင်းမြို့၊ အိုးဘိုရပ်ကွက် တွင် လုပ်ကိုင်နေသည့် မြေအိုးလုပ်ငန်း တွင် ကုန်ကြမ်းအဖြစ် အသုံးပြုသည့် မြေနီ၊ မြေနက် ကုန်ကြမ်းများ ရှားပါး လာခြင်းကြောင့် မိရိုးဖလာ လုပ်ကိုင်လာသည့် အိုးလုပ်ငန်း ကွယ်ပျောက်နိုင်သည့် အခြေအနေ နှင့် ရင်ဆိုင် နေရကြောင်း အိုးလုပ်ငန်း လုပ်ကိုင်များထံမှ သိရှိရသည်။

"အိုးလုပ်တဲ့ မြေနီရော၊ မြေနက်ပါ ရှားလာတယ်။ အရင်တုန်းက မြေနီကို ဒီနား ပတ်ဝန်းကျင်မှ တူးလို့ရတယ်။ ဝယ်လို့ရတယ်။ အခုကျ မင်းကွန်းသွားတဲ့ လမ်းက ပယ်ငါးစယ်၊ ခိုတောင် ချောင်းပေါက်ရွာ တွေဘက်က မြေနီ ထော်လာဂျီ တစ်စီးကို ငွေကျပ် ၃၀၀၀၀နဲ့ မြေနက် ထော်လာဂျီ တစ်စီးကို ငွေကျပ် ၂၀၀၀၀ ပေးဝယ်ရတယ် " ဟု စစ်ကိုင်း အိုးလုပ်ငန်း လုပ်ကိုင်သူ ဒေါ်ဝင်းဝင်းမော် က ပြောသည်။ 

အဆိုပါ အိုးလုပ်ငန်းများတွင် ကုန်ကြမ်းအဖြစ် အသုံးပြုသည့် မြေနီ၊ မြေနက် ရှားပါးလာပြီး ကုန်ကြမ်း ဈေးနှုန်းများ မြင့်တက်လာခြင်း၊ မြေသယ်ခများ မြင့်တက် လာခြင်းတို့ကြောင့် အိုးလုပ်ငန်း လုပ်ကိုင်သူအချို့ လုပ်ငန်းများ ရပ်ဆိုင်းခြင်းများ ရှိလာကြောင်း သိရသည်။ ''ဒီလုပ်ငန်းက ပုံမှန်ဝင်ငွေ မရှိဘူး။ မိုးတွင်း တစ်တွင်းလုံး နားရတယ်။ နွေအခါနဲ့ ဆောင်းရာသီ လောက်ပဲ လုပ်ကိုင်ကြရတယ်။ ပုံမှန်ဝင်ငွေ မရှိတော့ မျိုးဆက်သစ် ကလေးတွေလည်း မသင်ယူကြ တော့ဘူး။ အိုးလုပ်ငန်း လုပ်ကိုင်မယ့် မျိုးဆက်သစ် ကလေးတွေ မရှိတော့ ရှေ့လျောက် အိုးလုပ်ငန်းက ကောင်းလာနိုင်ဖို့ အလားအလာ မရှိတော့ဘူး။ တိမ်ကော ပျောက်ကွယ် သွားနိုင်တယ် " ဟု  စစ်ကိုင်း အိုးလုပ်ငန်း လုပ်ကိုင်သူ တစ်ဦးက ပြောသည်။

အဆိုပါ ဒေသမှ သောက်ရေအိုး၊ ပန်းစိုက်အိုးတို့ အဓိကထွက်ရှိပြီး သောက်ရေအိုးသည် အခြားဒေသထွက် မြေအိုးများထက် အေးမြသည့် ဓာတ်ရှိခြင်းကြောင့် မြန်မာပြည် အနှံ့အပြားတွင် စစ်ကိုင်းအိုးကို အနယ်နယ် အရပ်ရပ်မှ ဝယ်ယူအသုံးပြု နေကြကြောင်း သိရသည်။

စစ်ကိုင်းမြို့ အိုးဘိုရပ်ကွက် သည် ရှေးမြန်မာ မင်းအဆက်ဆက် လက်ထက်ကပင် အစဉ်အဆက် အိုးလုပ်ငန်းဖြင့် အသက်မွေး ဝမ်းကြောင်း လုပ်ကိုင်ခဲ့သည့် ရပ်ကွက် ဖြစ်ခြင်းကြောင့် "အိုးဘို" ရပ်ကွက်ဟု အမည်ပေးခဲ့ခြင်း ဖြစ်ကာ ၁၉၈၆ -၁၉၈၇ ခုနှစ် အတွင်း ရွာလုံးနီးပါး အိုးလုပ်ငန်းကို လုပ်ကိုင်ကြ သော်လည်း လက်ရှိတွင် အိမ်ခြေ ၃၀၀ ကျော်ရှိသည့် အဆိုပါ ရပ်ကွက်တွင် အိမ်ခြေ ၁၀၀ ဝန်းကျင်သာ အိုးလုပ်ငန်းကို လုပ်ကိုင်နေကြပြီး ကျန်အိမ်ထောင်စု များသည် ရက်ကန်းလုပ်ငန်း နှင့် အခြားလုပ်ငန်းများ ပြောင်းလဲလုပ်ကိုင် နေကြကြောင်း အိုလုပ်ငန်း လုပ်ကိုင်သူများ ထံမှ သိရသည်။

မြ၀တီနေ့စဉ်သတင်းစာ

#Themyawadydaily

No comments:

Post a Comment

Related Posts Plugin for WordPress, Blogger...

တင်ပြီးသမျှ သတင်းများ

 

Follow on Twitter

Networkblog

FB Like page