www.themyawadydaily.blogspot.com . . . www.facebook.com/themyawadydaily . . . https://twitter.com/Themyawadydaily

Tuesday, October 18, 2016

သက်ရှည်ကျန်းမာရေး လိုက်နာရမယ့် နည်းလမ်းငါးသွယ်


သက်ရှည်ကျန်းမာရေး လိုက်နာရမယ့် နည်းလမ်းငါးသွယ်

ဒေါက်တာ လွင်သန့်

''အာရောဂျံ ပရမံ လာဘံ'' ကျန်းမာရေးဟာ လာဘ်တစ်ပါး လို့ ဗုဒ္ဓမြတ်စွာ ဟောခဲ့ပါတယ်။ လူတိုင်း အသက်ရှည်ရှည် ကျန်းကျန်းမာမာ နေလိုကြပါတယ်။ ကျန်းမာရေး မကောင်းရင် ဘဝအရသာ ခံစားနိုင်မှာ မဟုတ်ပါဘူး။ ဒါကြောင့် လူတိုင်း အသက်ရှည် ကျန်းမာစေဖို့ နည်းလမ်းငါးသွယ် ကို တင်ပြချင် ပါတယ်။

ကျန်းမာစေတဲ့ နည်းလမ်း ငါးသွယ်မှာ တစ်ကိုယ်ရေ သန့်ရှင်းခြင်း၊ ရေကောင်း  ရေသန့် ရရှိသုံးစွဲခြင်း၊ ကိုယ်လက် လှုပ်ရှားခြင်း၊ ကျန်းမာရေးနှင့် ညီတဲ့ အစားအစာများ စားသောက်ခြင်းနဲ့ အိပ်ရေးဝဝ အိပ်ခြင်းတို့ ပါဝင်တယ်။

(၁) တစ်ကိုယ်ရေ သန့်ရှင်းခြင်း အပိုင်းမှာ လူရဲ့ အရေပြားကို သန့်ရှင်းထား ရမယ်။ နေ့စဉ် အနည်းဆုံး ရေတစ်ကြိမ် ချိုးပေးရမယ်။ အရေပြားဟာ ပြင်ပမှာ ရောဂါပိုးမွှားများ ခန္ဓာကိုယ်တွင်း မဝင်နိုင်အောင် ကာကွယ် ပေးပါတယ်။ ဒါကြောင့် အရေပြားပေါ်မှာ ရောဂါပိုးများ ရှိနေတတ်ပါတယ်။ ခေါင်းမှာ သန်းစွဲခြင်း၊ အရေပြား ယားနာ ပေါက်ခြင်း၊ ဗက်တီးရီးယား၊ ဗိုင်းရပ်စ်နဲ့ မှိုရောဂါများ ရှိနေပါသေးတယ်။ ပွေး၊ ဝဲ၊ ညှင်း စတဲ့ ရောဂါများမှာ မှိုရောဂါ ဖြစ်ပြီး ရေယုန်မှာ ဗိုင်းရပ်စ် ဖြစ်တယ်။ ချိုင်း၊ ပေါင်ခြံနဲ့ ခေါင်းမှာ ရောဂါပိုး ခိုအောင်းတတ် လို့ စနစ်တကျ သန့်စင်ပေးဖို့ လိုအပ်ပါတယ်။ ပုံမှန် ရေချိုးပေးခြင်း၊ ကိုယ်လက် သန့်စင်ခြင်းတို့ အပြင်၊ လက်ဆေးခြင်း ကိုလည်း အလေးထား ဆောင်ရွက်သင့် ပါတယ်။ မသန့်ရှင်းတဲ့ လက်ဟာ ကူးစက် ရောဂါကို ပျံ့နှံ့စေပါတယ်။ အမေရိကန် ကူးစက်ရောဂါ တိုက်ဖျက်ရေးနှင့် ကာကွယ်ရေး ဌာန (CDC)က လက်ကို ဆပ်ပြာ၊ ရေတို့နဲ့ စက္ကန့် ၂ဝ ကြာ ဆေးကြောခြင်းက ကလေးသူငယ် များ သေဆုံးမှု အများဆုံး ဖြစ်စေတဲ့ ဝမ်းပျက် ဝမ်းလျှောရောဂါ၊ နမိုးနီးယား၊ အဆုတ်ရောဂါ တို့ကို ကာကွယ် တားဆီးမှု အထိရောက်ဆုံး နဲ့ ကုန်ကျမှု နည်းတဲ့ နည်းလမ်း ဖြစ်ကြောင်း ထုတ်ဖော် ကြေညာထား ပါတယ်။

လက်ကို အစာမစားမီ အိမ်သာသွားပြီးတိုင်း၊ အစာစားပြီး ပေကျံနေတိုင်း ရေ၊ ဆပ်ပြာ တို့နဲ့ဆေးရမယ်။ ယေဘုယျ အားဖြင့် ဆပ်ပြာနဲ့ လက်ဆေးခြင်းဟာ ကြေးညှော်များနဲ့ အတူ ရောဂါများ အရေပြားမှ ကွာကျသွားပြီး ရေနဲ့အတူ မျောပါသွား ပါတယ်။ ဘယ်ဆပ်ပြာ သုံးသုံး ရောဂါပိုး ကင်းစင်ရေး အဓိက ဖြစ်ပါတယ်။

(၂) ရေကောင်းရေသန့် သုံးစွဲခြင်း အပိုင်းမှာ သုံးခြင်းနဲ့၊ သောက်ခြင်း နှစ်ပိုင်းရှိပါတယ်။ ရေသန့် မသုံးနိုင်လို့ ရေမှတစ်ဆင့် ကူးစက်ရောဂါ များဖြစ်တဲ့ အူရောင်ငန်းဖျား ရောဂါ၊ ကာလဝမ်းရောဂါ၊ ဝမ်းပျက် ဝမ်းကိုက်ရောဂါ၊ အမီးဘား ဝမ်းကိုက်ရောဂါ တို့ဖြစ်တတ် ပါတယ်။ ဒါကြောင့် သောက်သုံးရေကို ဂရုစိုက် သင့်ပါတယ်။

သောက်ရေသန့် ဆိုတာ ကြည်လင်ခြင်း၊ အရောင်အဆင်း မရှိခြင်း၊ အနံ့မရှိခြင်း၊ PH7 ရှိခြင်း၊ အဏုဇီဝပိုးများ ကင်းစင်ခြင်း စတဲ့ သတ်မှတ်ချက်များ ပါဝင်တယ်။ အာဆင်းနစ် ပါဝင်ခြင်း၊ အမှုန် ပါဝင်ခြင်း မရှိစေရပါဘူး။ ကာလ ဝမ်းရောဂါ ကပ်ရောဂါ အသွင်ဖြစ်ပွား စေခဲ့တာ ရေမှတစ်ဆင့် ကူးစက်လို့ ဖြစ်ပါတယ်။ ရေပေးဝေတဲ့ ပိုက်နဲ့ မိလ္လာပိုက် ကပ်နေရင် ရေပိုက်ထဲ မစင်ရေဝင် လာရာမှ ကာလ ဝမ်းရောဂါ ဖြစ်ပွားရခြင်း ဖြစ်ပါတယ်။ ၂ဝ၁၆ ခုနှစ် သြဂုတ်လက ပြည်ခရိုင် လေးမြို့နယ်မှ ကာလဝမ်း ရောဂါ ဖြစ်ပွားခြင်းဟာ မုန့်တီဖတ် ရေဆေးရာမှာ သုံးတဲ့တွင်းရေ ထဲမှာ ကာလဝမ်း ရောဂါပိုး တွေ့ရှိခဲ့လို့ ယင်း ရေတွင်းကို ကရိုလင်းခတ်ခြင်း၊ မုန့်တီဖတ် ရောင်းချမှု ယာယီ ပိတ်ပင်ထားခြင်းများ ပြုလုပ်ခဲ့ရ ပါတယ်။

ယနေ့ ကာလမှာ လူနေမှုစနစ် မြင့်မားလာ တာနဲ့အမျှ သောက်ရေသန့်ဟာ မပါမဖြစ် ပါဝင် လာခဲ့တယ်။ ရေသန့်စက်ရုံတိုင်း သောက်ရေသန့် ချည်းပဲ တွက်ဆလို့ မရတာလည်း အမှန်ပါပဲ။ ကိုယ်စားလှယ် ယူထားသူများက ဘူးခွံကို စက်ရုံပြန်မပို့ဘဲ၊ ဘုံဘိုင်ရေဖြည့်၊ အဖုံးစွပ်ပြီး ပိတ်ကာ ရေသန့်အဖြစ် လုပ်ရောင်း နေကြလို့ ၁ဝဝ ရာခိုင်နှုန်း သန့်စင်တယ်လို့ လက်ခံထားလို့ မဖြစ်တာ အမှန်ပါပဲ။ ရေသန့်ဘူးများ စနစ်တကျ ဆေးကြောခြင်း မရှိဘဲ ရေသန့်ထပ်ဖြည့် သွားမယ်ဆိုရင် လည်း ရေမသန့်နိုင်ပါ။ ဘူးခွံမှာ အနည်ရှိနိုင်တယ်။

(၃) ကိုယ်လက်လှုပ်ရှားခြင်း အားကစားကို နေ့စဉ် နာရီဝက်မှ တစ်နာရီအတွင်း အပြေး၊ လမ်းလျှောက်၊ စက်ဘီးစီး၊ ရေကူးတစ်ခုခု လုပ်ဆောင် ပေးသင့်ပါတယ်။ စားသောက်လို့ ပိုလျှံတဲ့ ကယ်လိုရီကို အဆီအဖြစ် မပြောင်းစေဘဲ ချွေးအဖြစ်စွန့်ထုတ် စေလို့ ခန္ဓာကိုယ် ပေါ့ပါးပြီး စိတ်ရွှင်လန်း စေတာလည်း အမှန်ပဲ ဖြစ်ပါတယ်။

(၄) ကျန်းမာရေးနဲ့ ညီညွတ်တဲ့ အစားအစာများ စားသောက်ခြင်း အသင့်အမြန်စား အစားအစာတွေဟာ ပြည့်ဝဆီ၊ ပြန်ကြော်ဆီ၊ ဝက်ဆီ၊ ဆီအုန်း အသုံးပြုထားပြီး အဆီ၊ အအိမ့်များတဲ့ ပီဇာ၊ ဆင်းဒဝှစ်၊ ဟမ်ဘာဂါ၊
အာလူးချောင်း ကြော်များ မစားသင့်ပါဘူး။ ခန္ဓာကိုယ်မှာ အဆီအဖြစ် စုပေးစေကာ သွေးထဲ ကိုလက်စထရော ဖြစ်ခြင်း၊ အဝလွန်ခြင်း ဖြစ်စေပါတယ်။ ထုတ်လုပ်ရက်စွဲ၊ သက်တမ်းကုန် ရက်စွဲ ကြည့်ရမယ်။ ဓာတုဆိုးဆေးနဲ့ အင်အော်ဂဲနစ် ပစ္စည်း မဖြစ်သင့်ပါ။ ဓာတု ပိုးသတ်ဆေး၊ ဓာတ်မြေသြဇာ ကင်းကင်း သဘာဝ ထွက်ရှိတဲ့ အော်ဂဲနစ်သီးနှံ ပစ္စည်းဖြစ်သင့် ပါတယ်။ အရက်၊ ဆေးလိပ်၊ မူးယစ်ဆေးဝါး ရှောင်ရှားရပါမယ်။

(၅) အိပ်ရေးဝဝအိပ်ခြင်း အိပ်ရေးဝဝ အိပ်ခြင်းဆိုရာမှာ နှစ်ခြိုက်စွာ အိပ်ပျော်ခြင်းက အရေးကြီး ပါတယ်။ အပျင်းကြီးခြင်း နဲ့ အိပ်ရေးမဝခြင်း ကွဲကွဲပြားပြား နားလည် ဖို့လိုပါတယ်။ လူတစ်ယောက်မှာ အိပ်စက်ချိန် အနည်းဆုံး ၆ နာရီမှ ၈ နာရီအတွင်း ရှိရမယ်။ အိပ်ရေးမဝလို့ စိတ်မကြည်လင်ရင် အလုပ်အကိုင် စီးပွား အဆင်မပြေ တတ်သလို ကျောင်းသားများ စာကျက်ထား သမျှကိုလည်း မေ့လျော့စေ ပါတယ်။

အိပ်ပျော်ဖို့ ဆေးဝါးများ မှီဝဲခြင်းထက် မအိပ်မီ၊ အစာစားပြီးစမှာ လမ်းလျှောက်ခြင်း၊ ဘုရားရှိခိုးခြင်း၊ ပုတီးစိပ်ခြင်း၊ တရားထိုင်ခြင်း စသဖြင့် စိတ်တည်ငြိမ်မှု ရအောင်၊ ဗိုက်ထဲ အစာကြောင့် အိပ်မရ မဖြစ်ရအောင် စီမံရမှာ ဖြစ်ပါတယ်။ ကော်ဖီ၊ လက်ဖက်ရည်၊ လက်ဖက် အစားအစာများ၊ ဆေးလိပ်၊ အရက်၊ ကွမ်းတို့က အိပ်ရေးကို ထိခိုက်စေပါတယ်။ ညဘက် ဆာတတ်ရင် နွားနို့၊ ဟောလစ်၊ အိုဗာတင်း သောက်ပေးသင့်တယ်။ ဗိုက်ပြည့်အောင် စားခြင်းမျိုး မလုပ်သင့်သလို ဂိမ်းကစားခြင်း၊ ဖေ့ဘွတ်ခ်ကြည့်ခြင်း၊ အင်တာနက် ကြည့်ရှုခြင်းများ ရှောင်ရမယ်။ မီးရောင် အနည်းငယ်သာ ရှိပြီး သက်သောင့် သက်သာရှိတဲ့ အိပ်ရာ ဖြစ်ရပါမယ်။

အထက်ပါ နည်းလမ်းငါးသွယ် အတိုင်းသာ ပြုမူနေထိုင် ကျင့်ကြံမယ် ဆိုရင် အသက် ၁၂ဝ ရှည်ပါစေ ဟူသောဆုဟာ သင့်အတွက် ဖြစ်လိမ့်မည်ဟု ပြောလိုက်ချင် ပါတော့တယ်။

မြ၀တီနေ့စဉ် ၊ စာ(၇)

No comments:

Post a Comment

Related Posts Plugin for WordPress, Blogger...

တင်ပြီးသမျှ သတင်းများ

 

Follow on Twitter

Networkblog

FB Like page

Powered By Blogger