အသစ်ပြဌာန်းမည့် ရင်းနှီးမြုပ်နှံမှု ဥပဒေ၌ အစိုးရမှ တိုးမြှင့်လိုသည့် လုပ်ငန်းကဏ္ဍများ တွင်သာ အခွန်သက်သာခွင့် သီးခြားပေးသွားမည်

ရန်ကုန် ၊ ၂၂-၉-၂၀၁၆

မြန်မာနိုင်ငံတွင် အသစ်ပြဌာန်းမည့် ရင်းနှီးမြုပ်နှံမှု ဥပဒေ၌ စီးပွားရေး လုပ်ငန်းတိုင်းကို အခွန် သက်သာခွင့် ပေးမည် မဟုတ်ဘဲ အစိုးရမှ တိုးမြှင့်လိုသည့် လုပ်ငန်းကဏ္ဍ များတွင်သာ သီးခြား ပေးသွားမည် ဖြစ်ကြောင်း မြန်မာနိုင်ငံ ရင်းနှီးမြုပ်နှံမှု ကော်မရှင်မှ သိရှိရသည်။

လက်ရှိ မြန်မာနိုင်ငံတွင် စီးပွားရေးကဏ္ဍ ဖွံ့ဖြိုးတိုးတက်ရန် ပြည်ပ ရင်းနှီးမြုပ်နှံ မှုများ ပိုမိုဝင်ရောက် လာစေရန် အတွက် ပြည်ပ ရင်းနှီးမြုပ်နှံမှု လုပ်ငန်းများ ဖိတ်ခေါ်ရာ၌ ဝင်ငွေခွန် ကင်းလွတ်ခွင့် ငါးနှစ်သက်တမ်း ပေးထားကြောင်း သိရသည်။ "ဥပဒေသစ်မှာတော့ ၀င်ငွေခွန် သက်သာခွင့် ငါးနှစ်ပေးတဲ့ စနစ် မရှိတော့ဘူး။ နိုင်ငံတော်ကနေ တိုးမြှင့် ဆောင်ရွက်မယ့် လုပ်ငန်းကဏ္ဍ တွေမှာ လုပ်ကိုင်ချင် ရင်တော့ ဝင်ငွေခွန် ကင်းလွတ်ခွင့် ပေးမယ်။ ရင်းနှီး မြုပ်နှံမှုမှာ တိုင်းပြည်အတွက် တကယ်လိုအပ်တဲ့ ရင်းနှီးမြုပ်နှံမှုမျိုး ကိုပဲ ပေးမယ်။" ဟု မြန်မာနိုင်ငံ ရင်းနှီးမြုပ်နှံမှု ကော်မရှင် အတွင်းရေးမှူး ဦးအောင်နိုင်ဦး က ပြောသည်။

လက်ရှိ အစိုးရမှ တိုးမြှင့်လိုသည့် လုပ်ငန်းကဏ္ဍ များတွင် ဖွံ့ဖြိုးမှု အားကောင်းသည့် ဒေသများ၌ ရင်းနှီးမြုပ်နှံ မည် ဆိုပါက ၀င်ငွေခွန် ကင်းလွတ်ခွင့် သုံးနှစ် ပေးမည်ဖြစ်ကာ ဖွံ့ဖြိုးမှု အသင့်အတင့် ရှိသည့် ဒေသများတွင် ရင်းနှီးမြုပ်နှံ ပါက ၀င်ငွေခွန် ကင်းလွတ်ခွင့် ငါးနှစ် ပေးသွားမည် ဖြစ်ပြီး ဖွံ့ဖြိုးမှု နည်းပါးသည့် ဒေသများတွင် ရင်းနှီးမြုပ်နှံမှု ပြုလုပ်လျှင် ၀င်ငွေခွန် ကင်းလွတ်ခွင့် ၇ နှစ် ပေးသွားမည် ဖြစ်ကြောင်း သိရသည်။

လက်ရှိပြဌာန်း ထားသည့် နိုင်ငံခြား ရင်းနှီးမြုပ်နှံမှု ဥပဒေတွင် မြန်မာနိုင်ငံ ရင်းနှီးမြုပ်နှံမှု ကော်မရှင်၏ ခွင့်ပြုချက် ရရှိထားသည့် မည်သည့်လုပ်ငန်း မဆို ၀င်ငွေခွန် ကင်းလွတ်ခွင့် ငါး နှစ် ပေးထား ခြင်းကြောင့် ပြည်တွင်း စီးပွားရေး လုပ်ငန်းရှင် များမှလည်း မြန်မာနိုင်ငံသား ရင်းနှီးမြုပ်နှံမှု ဥပဒေတွင် အဆိုပါ ဝင်ငွေခွန် ကင်းလွတ်ခွင့်အား တန်းတူ အခွင့်ရေးပေးရန် တောင်းဆို ထားကြောင်း သိရသည်။ 

မြန်မာနိုင်ငံသား ရင်းနှီးမြုပ်နှံမှု ဥပဒေနှင့် နိုင်ငံခြားသား ရင်းနှီးမြုပ်နှံမှု ဥပဒေကို ပေါင်းစပ်ထားသည့် မြန်မာနိုင်ငံ ရင်းနှီးမြုပ်နှံမှု ဥပဒေသစ်ကို လွှတ်တော်သို့ တင်ပြ ထားကြောင်း သိရသည်။

မြ၀တီနေ့စဉ်