www.themyawadydaily.blogspot.com . . . www.facebook.com/themyawadydaily . . . https://twitter.com/Themyawadydaily

Tuesday, August 9, 2016

ဥတုသုံးပါးခံ ဈေးလေး


မောင်ကုက္ကို (တောင်မြို့)

စာရေးသူတို့၏ အိမ်ရှေ့တွင် ''ဈေးလေး'' တစ်ဈေး ရှိသည်။ ဈေးလေးသည် အကာအရံမရှိပါ။ လဟာပြင်ဈေး ဖြစ်သည်။ ဖြစ်ကတတ်ဆန်း အမိုးအချို့ရှိသည်။ မိုးရွာလျှင်စို၍ နေပူလျှင် ခြောက်သယောင်း ကုန်သည်။ 

လေတိုက်လျှင် လွင့်စင်မှုမျိုးလည်း ရှိကြသည်။ လက်ဖြစ်ထီးတိုင် လေးများက ပြိုလဲ၊ မြောက်ကြွ ကုန်ကြသည်။ ဈေးသည်များသည် သူ့ရောင်းကုန် ပစ္စည်းနှင့် ဈေးဗန်း၊ ဈေးတောင်းများ ကို လမ်းသွားလမ်းလာ နှင့် ဈေးဝယ်များ ခလုတ်တိုက်အောင် ခင်းကြသည်။ သို့မှသာ သူတို့ပစ္စည်း လူမြင်ပြီး မြန်မြန်ရောင်း၍ ကုန်သွားမည် ဟု ထင်ပုံရသည်။ စားရေးသူတို့၏ အိမ်ရှေ့မှ ဈေးလေးသည် အမိုးရှိသော ကုန်းကမူလေး ပေါ်တွင် ဈေးမခင်းဘဲ လမ်းပေါ်မှာ ခင်းကျင်းသည်။ ဤ ဈေးလေးသည် လမ်းမကြီးနားမှာ ရှိ၍ လမ်းမကြီး ပေါ်တွင် ခင်းနေခြင်း ဖြစ်သည်။

ခရီးသွားများ လမ်းမကြီးပေါ်က ဖြတ်သွားကြသည်။ စက်ဘီး၊ ဆိုင်ကယ်၊ ခြေကျင်၊ မြင်းလှည်း များသည် ဈေးချိန်အတွင်း ဖြစ်လျှင် အသွားအလာ ခက်ခဲမှု တွေ့ရသည်။ သို့သော် အားလုံးက နားလည် ခွင့်လွှတ်ကြသည်။ အဘယ့်ကြောင့် ဆိုသော် ဤဈေးက မရှိမဖြစ် ဈေးလေး ဖြစ်နေခြင်းကြောင့် ဖြစ်သည်။

ဈေးလေးသာ ငယ်သည်။ အသား၊ ငါး၊ ဟင်းသီးဟင်းရွက်၊ ငါးခြောက်၊ ဆန်၊ ဆီ၊ ငရုတ်၊ ကြက်သွန်၊ အာလူး၊ အဝတ်အထည်၊ မုန့်ပဲသရေစာ၊ လူ့အသုံးအဆောင်၊ ပန်းကန် ခွက်ယောက်၊ အိုးနှင့် ကလေး ကစားစရာ အရုပ်များလည်း စုံလင်သည်။ အနယ်နယ် အရပ်ရပ်မှ တကူးတကန့် လာရောင်းကြသော နယ်လှည့် ဈေးသည်များ အမြဲတမ်း လာကြသည်။ နယ်ခံ ဒေသခံ ဈေးသည်များ သာမကပါ။ ဈေးလေးနား တစ်ဝိုက်က အိမ်ရှင်များ ကလည်း အားကျမခံ အိမ်ဆိုင်များ ဖွင့်ကြသည်။ ကြာတော့ တန်ဖိုးနည်း၊ တန်ဖိုးသင့် စားဝတ်နေရေး အတွက် အထောက်အကူ ပြုသော ဈေးလေး ဖြစ်လာသည်။ ဤဈေးလေးတွင် ပူပူနွေးနွး လတ်လတ် ဆတ်ဆတ် ချက်ချင်း စားနိုင်သော မုန့်ဟင်းခါး၊ မုန့်တီ၊ ခေါက်ဆွဲ၊ ထမင်းကြော်၊ လက်ဖက်ရည်၊ ထပ်တစ်ရာ၊ ပလာတာ၊ စမူဆာနှင့် အီကြာကွေး များလည်း ဤ ဈေးလေးတွင် ရနိုင်ပါသေးသည်။ အချို့ မြို့များက ပင်လျှင် ဤဈေးလေး သို့ တကူးတကန့် လာကြပြီး ငါးဖယ်နှင့် ဖြစ်စေ၊ အမဲရွတ်၊ အမဲ အကြောချက်နှင့် ဖြစ်စေ နန်းကြီးသုပ် လာစားကြသည်။ တစ်ခါတစ်ရံ စစ်ကိုင်းမြို့နယ် ရွာများဆီက ''ရေကြက်'' လာရောင်းသူများ ရောက်လာတတ် ကြသည်။ 

ရေကြက်အစစ် ရနိုင်သောကြောင့် ငွေကြေး တတ်နိုင်သူ များက ဆီးနှင့် ကျောက်ကပ် ဝေဒနာအတွက် ဓာတ်စာအဖြစ် မြို့ကြီးမှပင် လာ၍ တကူးတကန့် စောင့်ဝယ်ကြ လေသည်။ အနေစုတ် သော်လည်း ရွှေထုပ်သည့် မြပဝါဆိုသည့် တင်စားချက်က စာရေးသူတို့၏ အိမ်ရှေ့မှ ဈေးလေး အတွက်များ ဖြစ်နေလေ သလားမသိ။ ဤဈေးလေးတွင် တစ်ခါတစ်ရံ ရန်ပွဲ ဖြစ်တတ်သည်။ ဈေးသည်ချင်း နေရာလုကြ ရာမှ ဖြစ်ကြခြင်း ဖြစ်သည်။ မိုးရွာလျှင် ဖြစ်စေ ၊ ရေတက်လာလျှင် ဖြစ်စေ အမိုးရှိသော ကုန်းမြင့်ကမူလေး ပေါ်တွင် သူ့ထက်ငါ တိုးဝှေ့၍ အလျင်နေရာ ဦးကြသည်။ ကလေးငယ်များ တိုင်ဦးတမ်း ကစားသည်နှင့်ပင် တူသည်။ ထိုအခါ နေရာသစ်အတွက် စကားများ ရန်ဖြစ်ကြ လေသည်။

ကမ္ဘာပေါ်မှာ ရှိသမျှ အယုတ္တ အနတ္တများ ကုန်အောင် ဆဲဆိုကြပြီး သံကုန်ဟစ် ကြသည်။ ပြီးတော့လည်း ပြီးသွားကြသည်။ သမုဒ္ဒရာ ဝမ်းတစ်ထွာ အတွက် တိုက်ပွဲဖြစ်သည်။ ဤဈေးလေးတွင် အနီးအနား ရွာတိုင်းက ဈေးဝယ်များ လာကြသည်။ ဒေသနယ်ပယ်စုံမှ ဈေးသည်များ လာကြသည်။ ဤဈေးလေးထဲတွင် ရောင်းကုန်ပစ္စည်း အမျိုးပေါင်း အတော်စုံ သကဲ့သို့ ဈေးဝယ်၊ ဈေးသည် လည်း လူပေါင်းစုံ လေသည်။ လူတိုင်း အစားအသောက်နှင့် မကင်းနိုင် ၍ ပိတ်ရက်မရှိသော နံနက်ပိုင်း ဈေးလေး ဖြစ်သည်။

ဈေးလေး၏ အသက်မည်မျှ ရှိပြီလဲ မသိပါ။ စာရေးသူ မွေးပြီး လူမှန်းသိတတ်စ အရွယ်မှစ၍ သိခဲ့၊ မြင်ခဲ့၊ တွေ့ခဲ့၊ ကြုံခဲ့ရသော ဈေးလေးသည် စာရေးသူတို့၏ အိမ်ရှေ့က မပြောင်းလဲ သေးသော ဈေးလေးပင် ဖြစ်သည်။

ဈေးသည်များက ဈေးခေါင်းလေး စကားကို နားမထောင် ကြပါ။ အမိုးရှိသော ကုန်းကမူလေးအပေါ် ဈေးရောင်းရန်နှင့် လမ်းမကြီးပေါ်တွင် ဈေးမခင်းရန် တားမြစ်သော်လည်း ဈေးခင်းရောင်း ကြသည်။ ဈေးခေါင်းလေးက နေရာပေးသော အမိုးပါသော ကုန်းမြင့်ပေါ် မည်သူမှ ဈေးမခင်းချင် ကြပါ။ ဈေးဝယ်များ ကလည်း ကုန်းမြင့်လေးပေါ် တက်၍ ဈေးဝယ်ရန် ဆန္ဒရှိပုံမရ။

သို့သော် မိုးရွာသော အခါနှင့် မိုးစွေသော နေ့များတွင် မူကား ''ဒါ တို့ကို ဈေးခေါင်း ပေးထားတဲ့ နေရာ'' ဟုဆိုကာ အလုအယက်ပင် ကုန်းကမူပေါ်မှ အမိုးပါသော နေရာကို ဦးကြ၊ လုကြနှင့် ဆဲဆိုစကား များကြသည်။ ဧရာဝတီမြစ်ရေ နှင့် ဒုဋ္ဌဝတီမြစ်ရေ လျှံတက်၍ လမ်းနှင့် မြေပြန့်များပေါ် ရေလွှမ်းလျှင်လည်း အမိုးပါသော ကုန်းကမူတွင် နေရာလုပွဲ ဆက်လက် ဆင်နွှဲကြသည်။ ရပ်ကွက်လူကြီး နှင့် ဈေးခေါင်း ၏ စကား နားမထောင်သော လမ်းပေါ်က ဈေးသည် များသည် မိုးနှင့် မိခင် ဧရာဝတီမြစ်ရေ ၏ မေတ္တာရပ်ခံ ချက်ကို ချစ်ခင်စွာ နာခံရလေသည်။

ယခုရက်ပိုင်းတွင် မိုးများရွာပြီး ရေများတက်သည်။ လမ်းမကြီး ပေါ်တွင် ရှင်းနေပါပြီ။ ရေလွတ်သော ကုန်းကမူလေး ပေါ်တွင် ရှုပ်ယှက်ခတ် နေသည်။ ဆူညံ ပွတ်လောရိုက် နေသည်။ ရှေးယခင်တုန်း ကတည်းက ရှိခဲ့သော ဈေးလေးသည် ယခုထိတိုင်ပင် စာရေးသူတို့ အိမ်ရှေ့မှ ဈေးလေးအဖြစ်နှင့် ဆက်လက်၍ပင် ရှိနေသည်။ ဥတုသုံးပါး ခံသော ဈေးလေး ဖြစ်သည်။

မိုးများရွာ၊ ရေများကြီးလျှင် ဈေးလေးလည်း ရေဘေးဒုက္ခ ကြုံနေရသည်။ မိုးသက်လေများ မည်သည့် အချိန်တွင် ကျမည်နည်းဟု ဈေးလေးက အမြဲစိုးရိမ် နေပုံရသည်။ ဈေးလေးကို ကူညီမည့် ကယ်ဆယ်ရေးများ ရှိပါလျှင် ကောင်းမည်လား ဟု စာရေးသူ စဉ်းစားမိသည်။

ရတနာပုံနေ့စဉ် ၊ စာ(၂၅)

No comments:

Post a Comment

Related Posts Plugin for WordPress, Blogger...

တင်ပြီးသမျှ သတင်းများ

 

Follow on Twitter

Networkblog

FB Like page

Powered By Blogger