ရန်ကုန် ၊ ၁၅-၇-၂၀၁၆
ပြည်ပနိုင်ငံများမှ ပြည်တွင်း၌ ကုန်စည်ပြပွဲများ လာရောက်ပြသ ခြင်းဖြင့် ယင်းတို့ထံမှ နည်းပညာနှင့် အတွေ့အကြုံ များကို ကမ်းလှမ်းရယူ နိုင်သော အခွင့်အရေးတစ်ခု ရရှိလာ နိုင်ကြောင်း မြန်မာနိုင်ငံ ကုန်သည်များနှင့် စက်မှုလက်မှု လုပ်ငန်းရှင် များအသင်း UMFCCI တွဲဖက် အတွင်းရေးမှူး ဦးမျိုးသန့် က ပြောသည်။
ပြည်ပနိုင်ငံများမှ ပြည်တွင်း၌ ကုန်စည်ပြပွဲ များကို လာရောက်ပြသ ရာတွင် ယင်းတို့၏ ထုတ်ကုန်ပစ္စည်း များကို မြင်တွေ့ လေ့လာခွင့် ရသော မြန်မာ့ လုပ်ငန်းရှင်များ အတွက် အမြင်ကျယ်လာပြီး ဆန်းသစ် တီထွင်မှု အသစ်များကို ပြည်ပသို့ သွားရောက် လေ့လာရန် မလိုဘဲ တွေ့မြင်နိုင်မည် ဖြစ်သည်။ ယင်းကဲ့သို့ တွေ့မြင်ရခြင်း ကြောင့် မိမိတို့၏ ထုတ်ကုန်ပစ္စည်း များအား ဆန်းသစ် တီထွင်မှုများ၊ ဆင့်ပွား စိတ်ကူးများ ရရှိလုပ်ဆောင် နိုင်မည် ဖြစ်သည်။
ယခုအခါ နိုင်ငံတကာ၌ ကုန်ထုတ်လုပ်မှု စနစ်များ တိုးတက်မှု မြန်ဆန်နေပြီး ထုတ်ကုန်များမှာလည်း သိသာစွာ တိုးတက်များပြား လာသည်။ ယင်းကဲ့သို့ နိုင်ငံတကာမှ ထုတ်လုပ်သည့် အဆင့်မြင့် ကုန်ပစ္စည်း များကို ပြပွဲများမှ တစ်ဆင့် အမြဲမပြတ် လေ့လာ နိုင်သောကြောင့် ပြည်တွင်း၌ ကုန်စည်ပြပွဲများ ကျင်းပခြင်းသည် အလွန် ကောင်းမွန်သော အခွင့်အရေးတစ်ခု ဖြစ်သည်။
ပြည်တွင်း၌ ကုန်စည်ပြပွဲများကို ထိုင်း၊ အိန္ဒိယ၊ အီတလီ၊ ဂျပန်၊ တောင်ကိုရီးယား၊ တရုတ်၊ စင်ကာပူ ၊ မလေးရှား၊ ဗီယက်နမ်၊ အမေရိကန်နှင့် ဗြိတိန် စသည့်နိုင်ငံများမှ ချိတ်ဆက်၍ လာရောက် ပြသလျက် ရှိကြောင်း သိရသည်။
ပြပွဲများတွင် ၄င်းတို့နိုင်ငံမှ စက်မှုထုတ်ကုန် ပစ္စည်းများအပြင် မြန်မာနိုင်ငံမှ ပလတ်စတစ် ၊ ရော်ဘာ၊ ပုံနှိပ်လုပ်ငန်း၊ ကုန်ပစ္စည်း ထုပ်ပိုးခြင်းနှင့် လယ်ယာ စသည့်ကဏ္ဍများ အပေါ် ပြန်လည် စိတ်ဝင်စား၍ အမြဲမပြတ် လေ့လာမှုများလည်း ရှိကြောင်း သိရသည်။
မြန်မာနိုင်ငံသည် သယံဇာတ ကြွယ်ဝသော နိုင်ငံများတွင် တစ်နိုင်ငံ အပါအဝင်ဖြစ်ပြီး သဘာဝ သယံဇာတ နှင့် ကုန်ကြမ်းများကို စနစ်တကျ ထုတ်ယူနိုင်ရန် အကောင်းဆုံး အနေအထားတွင် ရှိနေကာ အဆိုပါ အနေအထား
အပေါ် ပြည်ပနိုင်ငံများ အနေဖြင့် စိတ်ဝင်စားပြီး မြန်မာနိုင်ငံ အနေဖြင့်လည်း ပုဂ္ဂလိက ကုမ္ပဏီများ တိုးတက်ဖွံ့ဖြိုးရေး နှင့် စက်မှုလုပ်ငန်း တစ်ခုလုံး တိုးတက်ရေးကို လုပ်ဆောင်သွားမည် ဖြစ်သည်။
ကုန်သွယ်မှု မြှင့်တင်ခြင်း လုပ်ဆောင်မည် ဆိုပါက အရည်အသွေး ပြည့်မီသည့် ပစ္စည်းများရှိရန် လိုအပ်ပြီး ယင်းပစ္စည်းများကို ပြောင်းလဲနေသော နည်းပညာများ အတိုင်း နိုင်ငံတကာ ပြပွဲများမှ ရယူ၍ ဈေးကွက်ပြန်လည် ထိုးဖောက်သွား နိုင်မည် ဖြစ်ကြောင်း သိရသည်။ (ကေကေ)
မြ၀တီနေ့စဉ် ၊ စာ(၂၆)
.jpg)
No comments:
Post a Comment