သာသနဓဇဓမ္မာစရိယဘွဲ့ရ သာသနာ့ အာဇာနည် အရှင်သူမြတ်များအား ဂုဏ်ပြုပူဇော်ပွဲ ကျင်းပ

-

ရန်ကုန် ဖေဖော်ဝါရီ ၁ဝ 

-

၁၃၇၉ ခုနှစ်တွင် ကျင်းပသော နိုင်ငံတော်အဆင့် ဓမ္မာစရိယစာမေးပွဲတွင် အောင်မြင်သော သာသနာ့အာဇာနည် အရှင်သူမြတ်များအား ဂုဏ်ပြုပူဇော်ပွဲကို ယနေ့တွင် ရန်ကုန်တိုင်းဒေသကြီး သာကေတမြို့နယ် အောင်ချမ်းသာ (မြေနီလမ်း) ရှိ မင်းကွန်းဓမ္မသာရ ပရိယတ္တိစာသင်တိုက်၌ ကျင်းပသည်။ 

-

''သံဃာတော်အရှင်သူမြတ်တွေက သာသနာရေး၊ ဘာသာရေး အလုပ်တွေလုပ်တဲ့ အခါ ဓမ္မာစရိယအောင်မှ နိုင်ငံတော် သံဃာ့ဗဟို ဝန်ဆောင်ဘွဲ့ကိုဆက်ကပ်လို့ရတာပါ။ ဓမ္မာစရိယ အောင်တယ်ဆိုရင်ပါဠိဘာသာမှာ အကျွမ်းကျင်ဆုံး ပုဂ္ဂိုလ်လို့ ပြောလို့ရပါတယ်။ ဒီကျောင်းကနေ ဓမ္မာစရိယအောင်တာ ဒီနှစ်နဲ့ဆိုရင် အပါး ၂ဝ ကျော် ၃ဝ လောက် ရှိနေပါပြီ'' ဟု မင်းကွန်းဓမ္မသာရ ပရိယတ္တိစာသင်တိုက်(သာကေတ) မှ ကျောင်းထိုင်ဆရာတော် ဓမ္မကထိက ဗဟုဇနဟိတဓရဘဒ္ဒန္တဓမ္မာသာရ (ဒီဃဘာဏက) က မိန့်ကြားသည်။ 

-

အဆိုပါဂုဏ်ပြုပူဇော်ပွဲတွင် မင်းကွန်းဓမ္မသာရ ပရိယတ္တိစာသင်တိုက်၌ ပညာဆည်းပူးကာ ၁၃၇၉ ခုနှစ် နိုင်ငံတော်အဆင့်အနေဖြင့် ကျင်းပသော ဓမ္မာစရိယစာမေးပွဲ၌ ဓမ္မာစရိယသုံးကျမ်းအောင်အရှင်တိက္ခ(သာသနဓဇ ဓမ္မာစရိယ)၊ အရှင်ကောသလ္လ (သာသနဓဇ ဓမ္မာစရိယ)၊ အရှင်မဏ္ဍလ(ဓမ္မာစရိယ (၁) ကျမ်းအောင်)၊ အရှင်ဉာဏဓဇ (ဓမ္မာစရိယ (၁) ကျမ်းအောင်) တို့ ပေါ်ထွက်ခဲ့သည်။ ထို့ပြင်ပထမကြီးတန်းအတွက် သုံးပါး၊ ပထမလတ်တန်းအတွက် တစ်ပါး၊ ပထမငယ်တန်းအတွက် ခြောက်ပါး၊ မူလတန်းအတွက် ငါးပါးပေါ်ထွက်ကြောင်းသိရသည်။ 

-

ပူဇော်ပွဲတွင် တက်ရောက်လာကြသော စေတနာရှင်အလှူရှင်များက ဓမ္မာစရိယ သုံးကျမ်းအောင် အရှင်သူမြတ်များအတွက် ဝတ္ထုငွေကျပ် ၁ဝ သိန်းနှင့် ဂုဏ်ပြုတံဆိပ်များကို လည်းကောင်း၊ အငယ်တန်း၊ အလတ်တန်း၊ အကြီးတန်း၊ မူလတန်း အောင်မြင်သော သံဃာတော်များကို ဝတ္ထုငွေနှင့် လှူဖွယ်ပစ္စည်းများကို လည်းကောင်း ပေးအပ် လှူဒါန်းသည်။ ထိုနေ့နံနက်ပိုင်းတွင် မင်းကွန်းဓမ္မသာရပရိယတ္တိစာသင်တိုက်၌ ဆွမ်း၊ဆွမ်းဟင်းနှင့် ထမနဲဆွမ်းတို့ကို သံဃာတော် အပါး ၁ဝဝဝ ကျော်တို့အား ဒါယကာ၊ ဒါယိကာမတို့က လောင်းလှူပူဇော်ကြကြောင်း သိရသည်။

-

#မြ၀တီနေ့စဉ်သတင်းစာ