ပြည်ထောင်စုသမ္မတမြန်မာနိုင်ငံတော်
နိုင်ငံတော်အတိုင်ပင်ခံရုံးဝန်ကြီးဌာန
သတင်းထုတ်ပြန်ချက်
( ၁၃၇၈ ခုနှစ် ၊ တန်ခူးလဆန်း ၃ ရက် )
( ၂၀၁၇ ခုနှစ် ၊ မတ်လ ၃၀ ရက် )
၁။ နိုင်ငံတော်အစိုးရအနေဖြင့် အမျိုးသားပြန်လည် သင့်မြတ်ရေးနှင့် ငြိမ်းချမ်းရေး လုပ်ငန်းစဉ်များကို အထူးအလေးထား ဆောင်ရွက်လျက် ရှိပါသည်။ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (Nationwide Ceasefire Agreement- NCA) မရေးထိုးရသေးသည့် တိုင်းရင်းသား လက်နက်ကိုင်အဖွဲ့အစည်း များနှင့် အပြန်အလှန် နားလည်မှု ၊ နှစ်ဖက် ယုံကြည်မှုများ တည်ဆောက်ပြီး ပြည်ထောင်စု ငြိမ်းချမ်းရေး ညီလာခံ-(၂၁) ရာစုပင်လုံ ပါဝင်တက်ရောက် နိုင်ရေးအတွက် စဉ်တိုက်ဆက်တိုက် ကြိုးပမ်း ဆောင်ရွက်လျက် ရှိပါသည်။ ငြိမ်းချမ်းရေး ဆွေးနွေးပွဲများ၏ သဘောသဘာဝ အတိုင်း အနိမ့်၊ အမြင့်၊ အတက်၊ အကျများစွာဖြင့် ပြီးခဲ့သည့် တစ်နှစ်တာ ကာလကို ကျော်ဖြတ် လာခဲ့ရပါသည်။
၂။ ငြိမ်းချမ်းရေး ဆွေးနွေးညှိနှိုင်းမှု များ၏ အဓိကအချက်မှာ ယုံကြည်မှုဖြစ်ပြီး တစ်ဦးနှင့်တစ်ဦး အပြန်အလှန် ယုံကြည်မှုသာမက မိမိကိုယ်ကို ယုံကြည်မှု သည်လည်း အထူးပင် အရေးကြီးလှပါသည်။ တစ်နှစ်တာ ကြိုးပမ်း ဆွေးနွေးညှိနှိုင်းမှု များ၏ ရလဒ်အဖြစ် ယနေ့ညနေပိုင်းတွင် ညီညွတ်သော တိုင်းရင်းသား လူမျိုးများ ဖက်ဒရယ်ကောင်စီ (UNFC) အဖွဲ့ဝင်ငါးဖွဲ့ဖြစ်သည့် ကရင်နီအမျိုးသား တိုးတက်ရေးပါတီ (KNPP) ၊ မွန်ပြည်သစ်ပါတီ (NMSP)၊ ရခိုင်အမျိုးသားကောင်စီ (ANC)၊ လားဟူ ဒီမိုကရက်တစ် အစည်းအရုံး (LDU )နှင့် ''ဝ''အမျိုးသားအဖွဲ့ချုပ် (WNO) တို့က တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) ကို လက်မှတ်ရေးထိုး တော့မည် ဖြစ်ကြောင်း ထုတ်ဖော်ပြောကြား လာခဲ့ပါသည်။
၃။ ခေတ်အဆက်ဆက် တိုင်းရင်းသား ပြည်သူများ မျှော်လင့်တောင့်တ ခဲ့ကြသော အမျိုးသားပြန်လည် သင့်မြတ်ရေးနှင့် ငြိမ်းချမ်းရေးအတွက် မျှော်လင့်ချက် ရောင်နီများ ပိုမိုလင်းလက် တောက်ပလာခဲ့ပြီ ဖြစ်ပါသည်။ ဤသို့ အရေးကြီးလှသည့် အချိန်အခါတွင် မလိုလားအပ်သော အဖျက်အမှောင့်များ၊ ငြိမ်းချမ်းရေး ပျက်ပြားစေရန် ရည်ရွယ်သော သွေးထိုးလှုံ့ဆော်မှုများ ဖြစ်ပေါ်လာနိုင်သဖြင့် ညီနောင် တိုင်းရင်းသား ခေါင်းဆောင်များ၊ တိုင်းရင်းသား ပြည်သူများအနေဖြင့် အထူးဂရုပြုကြ ပါရန် တိုက်တွန်းနှိုးဆော်လျက် သတင်းထုတ်ပြန် အပ်ပါသည်။
မြ၀တီနေ့စဉ်သတင်းစာ
.jpg)
No comments:
Post a Comment