www.themyawadydaily.blogspot.com . . . www.facebook.com/themyawadydaily . . . https://twitter.com/Themyawadydaily

Tuesday, January 10, 2017

လူငယ်များနှင့် ကော်ရှူခြင်း ပြဿနာ



( ဒေါက်တာ ကျော်စိုးထွန်း ၊ ဥပဒေဆေး )

နိုင်ငံတစ်နိုင်ငံ၏ လူ့စွမ်းအား အရင်းအမြစ် ဖွံ့ဖြိုး တိုးတက်ရေးတွင် လူငယ်များ၏ ဘဝများ တိုးတက် ပြောင်းလဲမှုသည် အဓိကအခန်း ကဏ္ဍမှ ပါဝင်နေပေသည်။ သို့ဖြစ်၍ လူငယ်များ စွမ်းရည်မြင့်မားပြီး ဉာဏ်ရည် ဉာဏ်သွေး တိုးတက်စေရန် ထိန်းသိမ်း၊ ပြုစု၊ ပျိုးထောင် ပေးရန်လိုပါသည်။ ယနေ့ခေတ် အခြေအနေ များတွင် လူအချို့၏ ဘဝနေထိုင်မှု ပုံစံများ ချို့ယွင်းမှုကြောင့် လူ့စွမ်းအား ယုတ်လျော့ စေသော အကြောင်းအရင်း များကို တွေ့နေရသည်။ ၄င်းအချက် များတွင် တစ်ခုအပါအဝင် ဖြစ်သော ကော်ရှူခြင်း အလေ့အထ မှာလည်း လူငယ်များကို ခြိမ်းခြောက်လျက် ရှိသည်။

ကော်ရှူခြင်း အလေ့အထကို ၁၉၅၉ ခုနှစ် အစောပိုင်းတွင် ဂရိလူမျိုးများက စတင်အသုံးပြု ခဲ့ကြသည်။ ၁၉၆ဝ ပြည့်နှစ် နောက်ပိုင်း တစ်စနှင့်တစ်စ ပျံ့နှံ့လာပြီး အမေရိကန် နိုင်ငံသို့ ဒုတိယကမ္ဘာစစ် မတိုင်မီ ရောက်ရှိခဲ့သည်။ 

ကော်ရှူရာတွင် ပါဝင်သော ဓာတုပစ္စည်း များမှာ ဟိုက်ဒရိုကာဗွန်များ၊ အယ်လ်ကိုင်း၊ နိုက်ထရို တို့ဖြစ်ပြီး တော်လင်းနှင့် ဇိုင်းလင်း ဟု ခေါ်သော ဟိုက်ဒရို ကာဗွန် များမှာ အဓိက ပါဝင်သော ဓာတုပစ္စည်းများ ဖြစ်သည်။ အခြားရောစပ် ပစ္စည်းများ ဖြစ်သော အီသာနှင့် ကီတုန်း စသည်တို့ကိုလည်း အသုံးပြုကြသည်။ ကော်ရှူခြင်း အလေ့အထ သည် လူငယ်များ အကြား အဓိကပြဿနာ ဖြစ်လာရခြင်းနှင့် ပတ်သက်၍ နိုင်ငံအနှံ့အပြား ရှိသုတေသီများ၏ သုံးသပ်ချက်များမှာ– ၄င်းပစ္စည်းများသည် ဈေးနှုန်းမမြင့်မားခြင်း၊ တရားမဝင် တားမြစ်ထား သည့် ပစ္စည်းများ မဟုတ်ခြင်း၊ အိမ်၊ ရုံး၊ ဈေးများ၊ ကုန်မာဆိုင် များနှင့် ဆေးဆိုင်များတွင် အလွယ်တကူ ရရှိနိုင်ခြင်း၊ အာနိသင် သက်ရောက်မှုမြန်ခြင်း၊ အသုံးပြုရ လွယ်ခြင်း တို့ကြောင့်ဖြစ်သည်။ ကော်ရှူခြင်း အလေ့အထကို မိဘမဲ့ ကလေးများ၊ လမ်းပေါ်တွင် အချိန်ကုန်တတ်သည့် ဆယ်ကျော်သက် ကလေးများအကြား အများဆုံး တွေ့ရသည်။

ကော်ရှူခြင်းကြောင့် လူ၏ဦးနှောက်ပိုင်း ဆိုင်ရာ သတင်းပို့ခြင်း စနစ်များကို ထိခိုက် စေနိုင်သည်။ ငိုက်မြည်းခြင်း၊ မှိန်းခြင်းနှင့် ၄င်းမှတစ်ဆင့် ပြင်းထန်လာပါက အသက် အန္တရာယ် သေဆုံးသည်အထိ ဖြစ်စေနိုင်သည်။ ကော်ရှူ ခြင်းကို များသောအားဖြင့် ယောက်ျားလေး များတွင်သာ တွေ့ရပြီး လူမှုစီးပွားရေး နိမ့်ကျသည့် ပတ်ဝန်းကျင်တွင် ဖြစ်လေ့ရှိသည်ဟု သိခဲ့ကြသည်။ သို့သော် ယခုအခါ ငွေကြေး ချမ်းသာသည့် လူ့ပတ်ဝန်းကျင် တွင်လည်း တွင်ကျယ်စွာ သုံးစွဲလာသည်ကို တွေ့ရသည်။

ကော်ရှူခြင်းကို အသုံးပြုရာတွင် အဝတ်ပေါ်သို့ ဖြန့်၍ ပါးစပ်၊ နှာခေါင်းတို့ဖြင့် ကပ်ရှူခြင်း သို့မဟုတ် ကြွပ်ကြွပ်အိတ် ထဲသို့ထည့်၍ ရှူခြင်းများ ဖြစ်ကြောင်း သိရှိရသည်။ သုတေသန စာစောင်များကို လေ့လာကြည့် ပါက ကော်ရှူခြင်းကို အဓိကအားဖြင့် မိသားစု စီးပွားရေး အဆင်မပြေသူများ၊ မိဘနှစ်ဦးစလုံး မဆုံကြသူများ ကြားတွင် အများဆုံး တွေ့ရသည်။

ကော်ရှူခြင်းကြောင့် ရရှိနိုင်သော ရောဂါလက္ခဏာ များမှာ အရက် အဆိပ်သင့်ခြင်း ကြောင့် ခံစားရနိုင်သော ရောဂါများနှင့် ပုံသဏ္ဌာန် တူသည်။ လူ၏ဦးနှောက် ပင်မအာရုံကြော များကို ထိခိုက်စေပြီး အချိန်ကြာ လာသည် နှင့်အမျှ စိတ်ကျရောဂါများ ခံစား လာနိုင်သည်။ အခြား ရောဂါလက္ခဏာ များမှာ စိတ်ပျံ့လွင့်ပြီး မှိန်းခြင်း၊ ခေါင်းကိုက်ခြင်း၊ ဝမ်းဗိုက်နေရာ အနှံ့နာကျင်မှုကို ခံစားရနိုင်ခြင်း၊ ပျို့အန်ခြင်း၊ အမြင်အာရုံ ဝေဝါးနိုင်ခြင်း၊ နားအူနားထိုင်း စေနိုင်ခြင်း၊ စကားများ ပြောရာတွင် မပီမသ ဖြစ်ခြင်း၊ လမ်းလျှောက်ရာတွင် ဟန်ချက်မထိန်း နိုင်ခြင်း၊ ရင်ဘတ် အောင့်ခြင်း၊ လေပြွန် ရုတ်တရက် ကျဉ်းစေနိုင်ခြင်း၊ စဉ်းစား ဆင်ခြင်ဉာဏ် လျော့ကျလာခြင်း၊ စိတ်ဂနာ မငြိမ်ဖြစ်ခြင်း၊ ရုတ်တရက် စိတ်ဓာတ်ကျ၊ စိတ်ကြွရောဂါများ ခံစားရနိုင်ပြီး အဓိကအားဖြင့် အစားအစာများ မစားတော့သည့် အချက်ပင် ဖြစ်သည်။

သုတေသန အချို့၏ ရလဒ်ကို သုံးသပ်ကြည့် ရာတွင် အသက် ၁ဝ နှစ်အထက် လူငယ်အများစုတွင် ကော်ရှူပြီးနောက် စိတ်မျောလွင့်ခြင်း လက္ခဏာကို အဓိကရယူ လိုခြင်း၊ အစားမစား ချင်စိတ်ကို ဖြစ်စေနိုင်ခြင်း စသည်တို့ ဖြစ်သည်။ အသုံးပြုသည့် အချိန်ကာလ ပေါ်မူတည်၍ မကြာခဏ အတက်ရောဂါ ခံစားရခြင်း အပြင် အသက် အန္တရာယ် ဖြစ်စေနိုင်ခြင်း အထိ ခံစားရနိုင်သည်။

ဂျပန်နိုင်ငံတွင် ပြုလုပ်ထားသော သုတေသန စာတမ်းများအရ ကော်ရှူသည့် ပမာဏ သို့မဟုတ် အချိန်ကာလ ကြာလာသည်နှင့် အမျှ မိမိကိုယ်မိမိ ယုံကြည်မှု နည်းပါးလာခြင်း၊ လူ့ပတ်ဝန်းကျင် နှင့် ကင်းကွာခြင်း၊ စုပေါင်း လုပ်ဆောင်ရသည့် လုပ်ငန်းများတွင် မပါဝင်ခြင်း အပြင် မိမိကိုယ်မိမိ သေကြောင်း ကြံစည်ခြင်း အထိပါ ဆိုးရွား လာကြသည်။

လူငယ်များကြား ကော်ရှူခြင်းကို သိရှိနိုင်ရန် အထက်ပါ ရောဂါလက္ခဏာ များဖြင့် လည်းကောင်း၊ သွေးမှတစ်ဆင့် စစ်ဆေးခြင်းဖြင့် လည်းကောင်း၊ ဆီးမှတစ်ဆင့် စစ်ဆေးခြင်းဖြင့် သိရှိနိုင်သည်။ ကော်ရှူခြင်းကို ဆေးပညာ ရှုထောင့်များအရ အလေ့အထ မဆွဲခင် အချိန် ကတည်းက ကြိုတင် ကာကွယ်ခြင်း သည်သာ အကောင်းဆုံး ဖြစ်သည်။ ကော်ရှူခြင်းကို မိမိကိုယ်မိမိ ပြန်လည် ထိန်းသိမ်းခြင်းဖြင့် မသုံးစွဲအောင် ပြုလုပ်၍ လွယ်ကူသည်။ သို့ဖြစ်ပါ၍ ကော်ရှူခြင်းမှာ မည်ကဲ့သို့ နောက်ဆက်တွဲ ဆိုးကျိုးများ ရှိသည် ကိုသိရှိနိုင်ရန် ကျန်းမာရေး ပညာပေးခြင်း၊ လူမှုဘဝတွင် အန္တရာယ် ပေးနိုင်ကြောင်း လက်တွေ့ခေါ်ယူ တွေ့ဆုံ စည်းရုံးခြင်း၊ အလုပ်လက်မဲ့ လူငယ်များကို အလုပ်အကိုင် ရရှိအောင် စီမံ၍ ကော်ရှူခြင်းကို ရပ်တန့်စေနိုင်ခြင်း တို့သည် လက်တွေ့ကျပြီး ကောင်းမွန်သော နည်းလမ်းများ ဖြစ်ကြောင်း တင်ပြလိုပါသည်။

ရောဂါလက္ခဏာ များအပြင် နောက်ဆက်တွဲ ကျန်းမာရေး ပြဿနာများမှာ အသက်ရှူ လမ်းကြောင်း ဆိုင်ရာ ထိခိုက်မှုများ၊ နှလုံးကြွက်သား အားနည်းခြင်းများ၊ ကျောက်ကပ်နှင့် အသည်း ကလာပ်စည်းများ ပျက်စီးခြင်း ဖြစ်ပေါ် စေနိုင်သည်။ ၄င်းလက္ခဏာများ ဖြစ်ပေါ်လာပါက ဆေးရုံသို့ ချက်ချင်းပြသပြီး ထိရောက်သော ရောဂါကုသနည်း များကို ခံယူသင့်ပေသည်။ အဓိက ရှောင်ရှားရမည့် အချက်များတွင် ရောဂါကုသရာ၌ စိတ်ငြိမ်ဆေးများ (Benzodiazepines) ကိုလုံးဝအသုံးမပြုရန် ပင်ဖြစ်သည်။ 

နိုင်ငံတကာမှ လေ့လာ သုံးသပ်ချက်အရ ကော်ရှူခြင်း ကြောင့် ဥပဒေရေးရာ ဆေးပညာဆိုင်ရာ စဉ်းစားရမည့် အချက်များမှာ အောက်ပါအတိုင်း ဖြစ်သည်-
  •  ကော်ရှူခြင်းကြောင့် နှလုံးကြွက်သား များကို ကတ်တကော အေမင်းစ် ၏ အကျိုး သက်ရောက်မှုဖြင့် နှလုံးတဆတ်ဆတ် ခုန်စေနိုင်ပြီး ရုတ်တရက် နှလုံးရပ်တန့် သေဆုံးနိုင်သည်။
  •  ကော်ရှူနေစဉ် ပျို့အန်ခြင်းများ ဖြစ်တတ်ပြီး အာရုံကြော သတင်းပို့မှု စနစ်များလည်း နှေးကွေးနေသဖြင့် အန်ဖတ်များ အသက်ရှူ လမ်းကြောင်း အတွင်း တစ်ဆို့ပြီး ရုတ်တရက် သေဆုံးနိုင်သည်။
  •  ကော်ရှူခြင်းကြောင့် ဦးနှောက် အမြှေးပါးရောင် ခြင်းများ ဖြစ်ပေါ်လာပြီး စိတ်တိုလွယ်ခြင်း၊ အိပ်ချိန်များ ပုံမှန်လူကောင်း တစ်ယောက်ကဲ့သို့ မလုပ်နိုင်ခြင်း၊ မှတ်ဉာဏ်များ တဖြည်းဖြည်း ချို့ယွင်း လာခြင်းနှင့် လူမှုပေါင်းသင်း ဆက်ဆံရေးတွင် အခက်အခဲများ ရှိလာခြင်းစသည့် ရောဂါ အစုအပေါင်းကြီး အဖြစ် နောက်ပိုင်းတွင် တွေ့လာရနိုင်သည်။
  •  အချို့သော လူငယ်များတွင် သွေးရောဂါ ဆိုင်ရာ ပြဿနာများ ဖြစ်သော သွေးအားနည်းခြင်း နှင့် အခြားကင်ဆာ ရောဂါနှင့်ဆိုင်သော ဆိုးကျိုးများကို ခံစားရနိုင်သည်။

သို့ဖြစ်ပါ၍ ကော်ရှူခြင်း အလေ့အထကို များစွာ တွေ့ရသော လူငယ်အရွယ် ကလေးများကို ပတ်ဝန်းကျင် အနေဖြင့် ရှုတ်ချဝေဖန် နေမည့်အစား အခြား လူငယ်လူရွယ် များကဲ့သို့ လက်ရှိ အခြေအနေမှ ပြောင်းလဲပေး နိုင်အောင် မည်ကဲ့သို့ ဝိုင်းဝန်းပံ့ပိုး စောင့်ရှောက်ပြီး နည်းကောင်းလမ်းမှန်များ ညွှန်ကြားပြသ နိုင်ရန် စီမံသင့်ပေသည်။ လက်ရှိ အခြေအနေတွင် သက်ဆိုင်ရာ ဌာနများမှ ၄င်း ကော်ရှူရာတွင် အသုံးပြုသော ကုန်ကြမ်း ပစ္စည်းများကို လိုအပ်ချက်များနှင့် အညီ တရားဥပဒေများ ချမှတ်၍ ထိန်းသိမ်း သင့်ကြောင်း နိုင်ငံတကာမှ သုတေသီများက အကြံပြု ကြသည်။ ထို့အပြင် လူမှု အဖွဲ့အစည်းများ၊ လူငယ်များနှင့် လူစွမ်းအား ဖွံ့ဖြိုး တိုးတက်စေရန် အလို့ငှာ ကော်ရှူခြင်းနှင့် ပတ်သက်သည့် ဆိုးကျိုးများ၊ ရှောင်ရန်၊ ဆောင်ရန်များကို လက်တွေ့ ထိရောက်စွာ ပညာပေး ကာကွယ် တားဆီးရန် အလွန်ပင် အရေးကြီး ပါကြောင်း ရေးသားတင်ပြ အပ်ပါသည်။

မြ၀တီနေ့စဉ်သတင်းစာ ၊ စာ(၈)

No comments:

Post a Comment

Related Posts Plugin for WordPress, Blogger...

တင်ပြီးသမျှ သတင်းများ

 

Follow on Twitter

Networkblog

FB Like page