ရန်ကုန် ၊ ၂၆-၁-၂၀၁၇
မြန်မာနိုင်ငံ စားသောက်ဆိုင် လုပ်ငန်းရှင်များ အသင်းမှ ကြီးမှူး ကျင်းပသော မြန်မာ့ရိုးရာ အိုးကြီးချက် အလွတ်တန်းပြိုင်ပွဲ နှင့် စတုဒိသာ ကျွေးမွေးခြင်းကို ယမန်နေ့ညနေ ၆ နာရီတွင် ရန်ကုန်မြို့ ဦးဝိစာရလမ်းရှိ မိုင်ဒါကွင်း၌ ကျင်းပသည်။
ပြိုင်ပွဲတွင် တိုင်းဒေသကြီးနှင့် ပြည်နယ် အသီးသီးမှ ပြိုင်ပွဲဝင်အသင်း ၁၆ သင်းတို့က ဝင်ရောက်ယှဉ်ပြိုင် ကြမည်ဖြစ်သည်။ ပြိုင်ပွဲ ပထမနေ့တွင် အုပ်စု(က) အသင်းက အလှကိုယ်စီ အသင်း၊ ဧရာဝတီသား အသင်း၊ မင်္ဂလာဒုံတပ်နယ် အသင်း၊ စားတော်ကဲအသင်း၊ ကလျာဏအသင်း၊ ကရုဏာရှင် အသင်း၊ တန်ဖိုးသင့်နေ့လယ်စာ အသင်းနှင့် ရှင်မတောင်သား အသင်းတို့ ယှဉ်ပြိုင်ကြသည်။
ပြိုင်ပွဲတွင် ဝက်သား အသားနီချက်၊ ဟင်းသီးဟင်းရွက် ကြော်၊ ငါးပိတို့စရာနှင့် အရည်သောက် များကို မြန်မာ့ရိုးရာ ချက်ပြုတ်နည်း အတိုင်း ပြိုင်ပွဲဝင်များက ဝင်ရောက်ယှဉ်ပြိုင် ကြကြောင်း၊ အကောင်းဆုံး လက်ရာဖြင့် ချက်ပြုတ် ထားသော ထမင်းဟင်းလျာ များကို စတုဒိသာ အဖြစ် ညနေပိုင်းတွင် ပြိုင်ပွဲသို့ လာရောက် လေ့လာသော ပြည်သူများနှင့် နိုင်ငံခြား ခရီးသွား ဧည့်သည်များ အပါအဝင် လူအယောက် ၂ဝဝဝ ကျော်အား ကျွေးမွေးလှူဒါန်း ခဲ့ကြောင်း သိရသည်။
အလားတူ ဇန်နဝါရီ ၂၆ ရက်တွင်လည်း အုပ်စု(ခ)က ပြိုင်ပွဲဝင် အသင်းရှစ်သင်း ၏ ရိုးရာဟင်းလျာ ချက်ပြုတ်ပြိုင်ပွဲ ကို ကျင်းပသွားမည် ဖြစ်ပြီး စတုဒိသာများ အလှူဒါနပြု သွားမည် ဖြစ်သည်။
ပြိုင်ပွဲကို ဇန်နဝါရီ ၂၉ ရက်အထိ ကျင်းပ သွားမည်ဖြစ်ပြီး ဆုပေးပွဲတွင် ကွာတားဖိုင်နယ်၊ ဆီမီးဖိုင်နယ်နှင့် နောက်ဆုံးဖိုင်နယ် ပထမ၊ ဒုတိယ၊ တတိယအဆင့်များ သတ်မှတ်ကာ ဆုများပေးအပ် သွားမည်ဖြစ်သည်။
အဆိုပါပွဲတွင် ဈေးပွဲတော်၊ ရိုးရာခေါင်းအုံးရိုက် ပြိုင်ပွဲ၊ မြန်မာ့ရိုးရာ ဒိုးပတ်ပြိုင်ပွဲ၊ ရခိုင်ရိုးရာ ကျင်ကိုင်ပွဲ၊ စက္ကောမ (မှော်အနုပညာ) ပြပွဲ၊ မြန်မာ့ရိုးရာ လက်ဝှေ့ပြိုင်ပွဲ များအား ထည့်သွင်း ကျင်းပသွားမည် ဖြစ်ကြောင်း သိရသည်။
မြ၀တီနေ့စဉ်သတင်းစာ ၊ စာ(၁၆)
.jpg)
No comments:
Post a Comment