မြောက်ဦး ၊ ၃၁-၁-၂၀၁၇
ရှေးဟောင်း ရခိုင်ယဉ်ကျေးမှု လက်ရာများ တည်ရှိရာ မြောက်ဦး ရှေးဟောင်းယဉ်ကျေးမှု နယ်မြေအား အသေးစိတ် လေ့လာကြည့်ရှု နိုင်ရန် ရည်ရွယ်၍ တရုတ်နိုင်ငံ၏ အကူအညီဖြင့် 3D မြေပုံ ရေးဆွဲ ထုတ်လုပ်ရန် စီစဉ်လျှက် ရှိကြောင်း မြောက်ဦးရှေးဟောင်း သုတေသနနှင့် အမျိုးသားပြတိုက် ဦးစီးဌာနမှ သိရှိရသည်။
တရုတ်နိုင်ငံမှ ပညာရှင် ၁၀ ဦး ပါဝင်သောအဖွဲ့နှင့် မြောက်ဦးရှေးဟောင်း သုတေသနနှင့် အမျိုးသားပြတိုက် ဦးစီးဌာနမှ ၀န်ထမ်းများ ပူးပေါင်း၍ မြောက်ဦးမြို့အား 3D မြေပုံရေးဆွဲရန် နှင့် ကောင်းကင်မြေပုံ ရိုက်ကူးနိုင်ရန် ဇန်နဝါရီ ၂၇ ရက်က မောင်းသူမဲ့ လေယာဉ်များဖြင့် ရှုထောင့်ပေါင်းစုံမှ ရိုက်ကူးခဲ့ကြသည်။
"မောင်းသူမဲ့ ဒရုန်းနှင့် မြောက်ဦး တစ်ခွင်ကို ရိုက်ကြတယ်။ ချက်ချင်း ကွန်ပျူတာနဲ့ ထည့်သွင်းခဲ့ကြတယ်။ 3D မြေပုံ ထွက်လာအောင်ပါ။ ပထမတစ်ကြိမ် ပြီးပါပြီ။ သုံးကြိမ်လောက် မြောက်ဦးကို လာရောက် လုပ်ကြရမှာပါ။ တရုတ်နိုင်ငံက ကူညီပေး နေပါတယ်။ 3D မြေပုံ ရေးဆွဲရေးအတွက် လုပ်ငန်းစဉ်တွေက ရှိပါသေးတယ်။ သူတို့က ဧပြီလ နောက်ဆုံးအပတ်မှာ နောက်တစ်ကြိမ် လာရောက်ကြ ဦးမှာပါ။ သင်္ကြန်ပြီး နောက်ပိုင်းမှ အခုရေးဆွဲ နေတဲ့ 3D မြေပုံ အပြည့်အစုံကို ကျွန်တော်တို့က ပြန်ရမှာပါ။ မြောက်ဦးတစ်ခွင်ကို ဘက်ပေါင်းစုံကနေ အလွယ်တကူ ကြည့်ရှုလို့ ရတော့မှာပါ " ဟု မြောက်ဦး ရှေးဟောင်း သုတေသနနှင့် အမျိုးသားပြတိုက် ဦးစီးဌာနမှ ညွန်ကြားရေးမှူး ဦးညိမ်းလွင် က ပြောသည်။
အဆိုပါ အဖွဲ့အနေဖြင့် မြောက်ဦး ယဉ်ကျေးမူ နယ်မြေရှိ အထင်ကရ နေရာများဖြစ်သော ရှေးရခိုင်နန်းတော် ဖြစ်ခဲ့သည့် နန်းတော်ရာကုန်း၊ သျှစ်သောင်း၊ ထုက္ကံသိမ်၊ အံတော်သိမ်၊ လောင်းဗွန်းပြောက် နှင့် မာန်ငါးပါး စေတီများ စသည့် ထုထည် ကြီးမားသော စေတီပုထိုးတော် များအား မောင်းသူမဲ့ ဒရုန်းလေယာဉ်ဖြင့် ထောင့်ပေါင်းစုံမှ ရိုက်ကူးကာ 3D မြေပုံရေးဆွဲနိုင်ရန် စီစဉ်နေကြပြီး ကျန်ရှိနေသေးသည့် အခြားနေရာ များကိုလည်း နောက်အကြိမ် များတွင် လာရောက်၍ ထပ်မံရိုက်ကူး ကြမည် ဖြစ်ကြောင်း သိရသည်။
မြောက်ဦးမြို့သည် ရခိုင်ဘုရင်တို့ နောက်ဆုံးစိုးစံ ခဲ့သော မြို့တော်ဖြစ်ပြီး ၁၄၃၀ ပြည့်နှစ်မှ ၁၇၈၅ အထိ ရှည်ကြာခဲ့သည်။ မြို့တည်ဘုရင် မင်းစောမွန်သ ည် တောတောင်ချောင်း မြောင်းများကို အခြေခံကာ ခံတပ်မြို့ကြီး သဖွယ်ဖြစ်အောင် တည်ဆောက်ခဲ့ကာ ရခိုင်မင်းဆက် ပေါင်း ၄၉ ဆက်၊ နှစ်ပေါင်း ၃၅၄နှစ် ကြာရှည်ခဲ့သဖြင့် ရခိုင်ရှေးဟောင်း ယဉ်ကျေးမှု အမွေအနှစ်များ တည်ရှိသည်။
မြ၀တီနေ့စဉ်သတင်းစာ
.jpg)
No comments:
Post a Comment