www.themyawadydaily.blogspot.com . . . www.facebook.com/themyawadydaily . . . https://twitter.com/Themyawadydaily

Friday, August 26, 2016

ကျောင်းကျန်းမာရေး နှင့် နေ့ထမင်းဗူးစနစ်


ကျောင်းကျန်းမာရေး နှင့် နေ့ထမင်းဗူးစနစ်

ဒေါက်တာ လွင်သန့်

မြန်မာနိုင်ငံဟာ ၂ဝ၁၅-၂ဝ၁၆ ခုနှစ် စားနပ်ရိက္ခာ ဖူလုံရေးရန်ပုံငွေ အဖွဲ့ LIFT ရဲ့ စစ်တမ်းအရ ကလေးနှစ်ဦးမှာ တစ်ဦး အာဟာရချို့တဲ့ နေရာ အရပ်ပုနှုန်းမှာ တောင်တန်း ဒေသမှာ ၄၅ ရာခိုင်နှုန်း အထိရှိကာ မြစ်ဝကျွန်းပေါ်၊ ကမ်းရိုးတန်း ဒေသနှင့် အပူပိုင်းဇုန် ဒေသမှာ ၃၄ ရာခိုင်နှုန်း ရှိကြောင်း သိရပါတယ်။ မြန်မာနိုင်ငံရဲ့ လူဦးရေ ထက်ဝက်မှာ ဆင်းရဲသော လူဦးရေ ဖြစ်နေတာ တွေ့ရတယ်။ ၂ဝ၁၄ ခုနှစ် သန်းခေါင် စာရင်းအရ ကျေးလက်နေ ပြည်သူ ၇ဝ ရာခိုင်နှုန်းရှိရာ ကျေးလက် အခြေပြု အလုပ်အကိုင်သစ်၊ အခွင့်အလမ်းသစ် များဆောင် ရွက် နိုင်မှသာ ရွှေ့ပြောင်း လုပ်သားနှင့် အာဟာရ ချို့တဲ့မှုတို့မှ ကင်းဝေးနိုင်မယ် ဖြစ်တယ်။

ကလေးငယ်များ အာဟာရ ချို့တဲ့မှုကို ကျောင်းတွင်း အာဟာရကျွေးမူ ခုနစ်မျိုးနဲ့ ပြုပြင်ပေးနိုင် ပါတယ်။ (၁) မိဘဆရာအသင်းမူ၊ (၂) ကျောင်းကောင်စီမူ၊ (၃) ကျောင်းဈေးဆိုင်မူ၊ (၄) ကျောင်းအိမ်တွင်းမှု သိပ္ပံသင်တန်းမှ ချက်ပြုတ်ကျွေးမူ၊ (၅) ကျောင်းဈေးသည် ကြပ်မတ် ရောင်းချရေးမူ၊ (၆) အလှူရှင်မူ၊ (၇) ထမင်းဗူးမူ တို့ရှိပါတယ်။

(၁) မိဘဆရာအသင်းမူ ။ ကျောင်းအဆင့် ကျောင်းကျန်းမာရေး ကြီးကြပ်မှုအဖွဲ့မှ အဓိကထား တာဝန်ယူကျွေးမွေး တဲ့မူ ဖြစ်ပါသည်။ ကျောင်းသားငယ်များ ကျွေးမွေးမယ့် အစား အစာများနဲ့ ပတ်သက်ပြီး ယူနီဆက်မှ ထောက်ပံ့တဲ့ နို့မှုန့်၊ ကွေကာအုပ် စတာတွေနဲ့ ထောက်ပံ့ရရှိတဲ့ ဒေသထွက် ပစ္စည်းများ အခြေခံပြုလုပ်တဲ့ ရိုးရာ သရေစာများ၊ ဘိန်းမုန့်၊ ပဲကြော်၊ မုန့်စိမ်းပေါင်း၊ ဗယာကြော်၊ ငှက်ပျောကြော်၊ တို့ဟူးကြော်၊ ခေါပုပ်ကြော်၊ ငါးမုန့်ကြော်၊ ကန်စွန်းဥ၊ ကောက်ညှင်းပေါင်း စတာတွေ ကျွေးမွေးပြီး အာဟာရမြှင့်တင် ရမည်ဖြစ်သည်။

(၂) ကျောင်းကောင်စီမူ ။ ယင်းမူမှာ ဆရာ၊ ဆရာမများနှင့် ကျောင်းကောင်စီဝင် အသင်းလေးသင်း သို့မဟုတ် ငါးသင်းမှ ကျောင်းသားကြီး တို့က အသင့်လုပ်ပြီး မြန်မာ့ရိုးရာ အာဟာရပြည့် မုန့်များ မှာယူပြီး တစ်ဆင့် ရောင်းချခြင်း ငွေတန်ဖိုး နည်းပြီး အာဟာရ ပြည့်ဝသော မုန့်များ၊ ဆန်၊ ဂျုံ၊ ပဲ၊ ထန်းလျက် တို့ကို အခြေခံကျွေးမွေး စေခြင်း ဖြစ်ပါသည်။

(၃) ကျောင်းဈေးဆိုင်မူ ။ ယင်းမူမှာ ဆရာများ သို့မဟုတ် တာဝန်ယူ ရမယ့် မိဘများမှ အာဟာရ ပြည့်ဝသော မုန့်နှင့်သစ်သီး များကို တာဝန်ယူပြီး စနစ်တကျ ရောင်းချခြင်း ဖြစ်ပါသည်။ ကျေးလက် ကျောင်းများနဲ့ မိဘဝင်ငွေ နည်းသော ရပ်ကွက်ကျောင်း များတွင် သင့်လျော် ပါသည်။

(၄) ကျောင်းအိမ်တွင်းမှု သိပ္ပံမှ ချက်ပြုတ်ကျွေးမှု ။ ပညာရေး လက်တွေ့ ဖွံ့ဖြိုးမှု အစီအစဉ် နှင့်အိမ်တွင်းမှု သိပ္ပံသင်တန်းမှ အာဟာရပြည့် အစားအစာများ လက်တွေ့ အကောင်အထည် ဖော် ချက်ပြုတ်နည်း များကို သင်ကြားပေးပြီး အငယ်တန်း၊ ကျောင်းသား၊ ကျောင်းသူ လူငယ်များ၊ ငွေသက်သာကာ အဆိပ်အတောက် မပါသော သရေစာ အာဟာရ ပြည့်ဝသည့် အစား အသောက်များ ချက်ပြုတ် ကျွေးမွေးနိုင်မှု ပင် ဖြစ်ပါသည်။ အောင်မြင်သည့် ကျောင်းများတွင် တစ်ပတ်လျှင် ငါးကြိမ် ကျွေးမွေးနိုင်ပြီး အနည်းဆုံး တစ်ပတ်တစ်ကြိမ် ပြုလုပ်သင့်သည့် ကျောင်းလုပ်ဆောင်မှု တစ်ရပ် ဖြစ်သင့်သည်။

(၅) ကျောင်းဈေးသည် ကြပ်မတ်ရောင်းချ ရေးမူ ။ ကျောင်းသားဦးရေ များသော ကျောင်းများတွင် ၄င်းမူသည် ပို၍ အခြေအနေ ပေးပြီး ကျောင်းဈေးသည် များ၏ ကျန်းမာ သန့်ရှင်းမှု သာမက ယင်းတို့နေအိမ်၊ မိသားစုကိုလည်း ကျန်းမာ သန့်ရှင်းမှု ကြတ်မတ်ဖို့ ရန်လိုပါသည်။ ကျောင်းဈေးသည် များကို ဆီးဝမ်းစစ်ခြင်း၊ ဓာတ်မှန်ရိုက်ခြင်း၊ ရှောင်တခင် လက်သည်း လက်အနာ စစ်ဆေးခြင်း၊ လက်အိတ်ဝတ်ရောင်းချခြင်း၊ နှာခေါင်းစည်း၍ ရောင်းချခြင်း ရှိ၊ မရှိ၊ အဖုံးပါသည့် အမှိုက်ပုံးများ သုံး၊ မသုံး ကြည့်ရှုစစ်ဆေး ရမည်။

(၆) အလှူရှင်မူ ။ ရပ်ကွက်၊ ကျေးလက် ကျောင်းကျန်းမာရေးနှင့် သင့်လျော်သည်။ လက်တွေ့လည်း ကျသည်။ ကျောင်းသား တစ်ယောက် မွေးနေ့ပွဲအဖြစ် မိဘများက ကျွေးမွေး စေခြင်းလည်း ရှိတတ်ရာ ဒေသထွက် မီးဖိုချောင်သုံး ပစ္စည်းနှင့် ဟင်းသီးဟင်းရွက်၊ အသားတို့ အသုံးပြုကာ ထမင်းဟင်း ကျွေးခြင်း သို့မဟုတ် အာဟာရမုန့်များ ကျွေးခြင်း၊ အပြင်အိမ်မှာ ချက်ပြုတ်ပြီး အာဟာရ များ၊ ဖော့ဘူး၊ စနစ်နှင့် ဝေမျှခြင်း မျိုးပင် ဖြစ်ပါသည်။

(၇) နေ့ထမင်းဘူးမူ ။ အိမ်နီးချင်း ထိုင်းအိန္ဒိယ၊ တရုတ်နိုင်ငံများ၊ စင်ကာပူ၊ ဂျပန်၊ ကိုရီးယားနိုင်ငံများ၊ အနောက်တိုင်း ဖွံ့ဖြိုးပြီး အစ္စရေး၊ အာရပ်နိုင်ငံ များပါ ကျယ်ကျယ် ပြန့်ပြန့် သုံးနေကြသည့်မူ ဖြစ်သည်။

လူသားတစ်ယောက် အနေဖြင့် အသက် ၅ နှစ်မှ ၂၅ နှစ် အတွင်း ဦးနှောက် အဖွံ့ဖြိုးဆုံးသော ကာလဖြစ်၍ ယင်းအသက် ရောက်ရှိနေသည့် ကျောင်းသားများကို နိုင်ငံတော်မှ ''နေ့ထမင်းဘူး'' စနစ်ကျင့်သုံး ခြင်းဖြင့် အရွယ်မတိုင်မီ ''ဝမ်းရေး'' အတွက် ကျောင်းထွက်ရမှု၊ ကလေးလုပ်သား၊ လူကုန်ကူးမှု စသည့်ရန်မှ ကင်းဝေးကာ၊ ''ကျောင်းနေပျော်ပြီး စာတော်နိုင်မည့်'' လုပ်ဆောင်ချက် လည်း ဖြစ်ပါသည်။

ထမင်းဘူးမူသည် လွယ်ကူပြီး အာဟာရ ပညာပေးမှု၊ လက်ဆေးခြင်း စသည့် တစ်ကိုယ်ရေ သန့်ရှင်းရေး အတွက် အရေးပါပြီး ပို၍ ထိရောက်ပါသည်။ ၁ နှစ်မှ ၁ဝ နှစ်အရွယ် ကလေးများ၏ တစ်နေ့တာ လိုအပ်ချက် ၃ အချိုး ၁ နဲ့ညီမျှသော အာဟာရကို ဆရာ၊ ဆရာမများ၊ ကျောင်းသားမိဘ များက စီမံ ဆောင်ရွက် ပေးခြင်းလည်း ဖြစ်သည်။ သန့်သန့်ရှင်းရှင်း စားသောက်တတ်ရန် စားပြီးနှင့် မစားခင် အိပ်သာ တက်ပြီးတိုင်း ညစ်ပေနေသော လက်ကို ရေဆပ်ပြာတို့ဖြင့် အနည်းဆုံး စက္ကန့် ၂ဝ ကြာ ဆေးကြော ပေးခြင်းကိုလည်း သင်ပေးနိုင် ပါသည်။ အစားအစာ ကို ဇွန်းဖြင့် စားသောက် နိုင်ရန်လည်း ကျင့်ပေးနိုင်သည်။ တချို့နိုင်ငံကြီး များတွင် ညနေစာကို ပင် ထမင်းဘူး ထည့်ပေးပြီး ကလေး အာဟာရ ဖွံ့ဖြိုး တိုးတက်ရေး အတွက် ကူညီထောက်ပံ့ မှုများ ပေးနေကြ ပါသည်။

တစ်ကိုယ်ရေ သန့်ရှင်းရေး သာမက သွားနှင့် ခံတွင်း ကိုလည်း ပညာရေးသော အလေ့အထ ရရှိသွားစေ ပါသည်။ ကျောင်းသားလေး များ၏ အာဟာရ ဖွံ့ဖြိုးမှုကို ဦးဆောင်နိုင်မည် ဆိုလျှင် အာဟာရချို့တဲ့မှု ဘေးမှ ရှောင်ရှား နိုင်မည် ဖြစ်ပေသည်။

မြ၀တီနေ့စဉ် ၊ စာ(၇)

No comments:

Post a Comment

Related Posts Plugin for WordPress, Blogger...

တင်ပြီးသမျှ သတင်းများ

 

Follow on Twitter

Networkblog

FB Like page