www.themyawadydaily.blogspot.com . . . www.facebook.com/themyawadydaily . . . https://twitter.com/Themyawadydaily

Wednesday, June 22, 2016

အိုးလုပ်သူနှင့် တူသူများ


အိုးလုပ်သူနှင့် တူသူများ

တက္ကသိုလ် သင်္ခ

ငယ်စဉ်က ကျောင်းများတွင် သင်ကြားခဲ့ ရသော လောကနီတိ ပျို့၊ လောကသာရ ဆုံးမစာ၊ ပုတ္တောဝါဒ ဆုံးမစာနှင့် ကန်တော်မင်း ကျောင်း ဆုံးမစာ တို့သည် ကျောင်းသား လူငယ်များကို လိမ္မာရေးခြား ရှိအောင်၊ ယဉ်ကျေးအောင်၊ လူမှုရေး နားလည်အောင်၊ မြန်မာ့ ဓလေ့စရိုက် ကို တတ်သိအောင် သွန်သင်ညွှန်ပြ ခဲ့ကြသည့် ''သုတရတနာ'' များဖြစ် ကြ၏။

ယနေ့ထက်တိုင် အဆိုပါ ဆုံးမစာ များသည် စာရေးသူတို့၏ နှလုံးသားတွင် စွဲစွဲမြဲမြဲ ရှိနေသေးသည်။ ထို ဆုံးမစာ များကြောင့် ယနေ့ လူ့လောက အလယ်တွင် တင့်တင့်တယ်တယ် နှင့် လူရာဝင် နေသည်ဆိုက ဆိုနိုင်၏။ မိဘအရွယ်သို့ ရောက်နေပြီ ဖြစ်သော စာရေးသူ တို့သည် မိမိတို့ သားသမီးများကို ပြောဆိုဆုံးမ ကြရာတွင် ဝန်လေးနေ၍ မဖြစ်ပေ။ ''မကောင်းမြစ်ထာ၊ ကောင်းရာညွှန်လတ်'' ဆိုသကဲ့သို့ အကောင်းကို ညွှန်ပြ၍ အဆိုးကို တားမြစ်ရမည့် တာဝန်ရှိ၏။

လောကနီတိပျို့ တွင် ''မပျင်းမှတ်ပြီး၊ သားသမီးကို မကြီးခင်က မဆုံးမသော်၊ မိဘတလည်၊ ရန်သူမည်ခဲ့၊ ရွှေရည်ဆင်းရောင်၊  ဟင်္သာ ဘောင်ဝယ်၊ အတောင်ဖြူစွာ၊ ဗျိုင်းပမာသို့ ၊ ပညာရှိလယ်၊ မတင့် တယ်တည့်'' ဟူ၍ ပြညွှန်ထားသည်ကို မိဘတိုင်း ဂရုပြု လိုက်နာသင့် ၏။

''သားသမီးမကောင်း မိဘခေါင်း'' ဆိုသကဲ့သို့ သားသမီးများ မကောင်းလျှင် မိဘများ စိတ်ဆင်းရဲရပြီး သားသမီးများ ကောင်းလျှင်  မိဘများ ရင်ဝယ် ချမ်းမြေ့၍ မျက်နှာပွင့်လန်း ခဲ့ရသည် မဟုတ်ပါလား။ ထို့ကြောင့်  ကျောက်ရိုင်းတုံး နှင့်တူသော ကလေးသူငယ် များကို ကျောက်ကောင်း တစ်စေ့၊ ဓားကောင်း တစ်လက် ဖြစ်လာအောင် ငယ်စဉ် ကတည်းကပင် ပြုစုပျိုးထောင် ပေးရန်လိုသည်။

ကျောင်းသားလူငယ်များ ပညာရှာရာတွင် ကျင့်ကြံ ဆောင်ရွက် ရန် လိုအပ်ပုံကို ကန်တော်မင်းကျောင်း ဆုံးမစာတွင် ဤသို့ဆုံးမထား သည်။ ''ပညာကိုလိုသော်၊ ပညာရှိကိုယှဉ်၊ မေးစဉ် နေ့ညမပြတ်၊ အဖတ် အအံ၊ အကြံ အရေး၊ ရှေးရှေးထုံး ကိုဆောင်၊ ရူးကျွန်မူ၍ကပ်၊ သွပ် ကျွန်မူ၍ချောင်း'' ထို့ပြင် ပညာရှာရာတွင် ပမာ သူဖုန်းစား ဆိုသကဲ့သို့ ဆရာသခင်ကို ချဉ်းကပ်၍ သူဖုန်းစား ပမာရိုကျိုးကာ သင်ယူကြမှသာ ပညာရနိုင် ကြောင်း၊ ရှေးဆရာ များ၏ သွန်သင်ဆုံးမ မှုကို ကျောင်းသား လူငယ်များ မြေဝယ်မကျ နာယူ ဆောင်ရွက် သင့်၏။

ယနေ့ကာလတွင် နိုင်ငံတော်အနေဖြင့် ကျောင်းသားလူငယ်များ၏ စွမ်းပကားကို အလေးထားကာ အနာဂတ်အရင်းအနှီးများအဖြစ် တန်ဖိုးထား၏။ ကျောင်းသားလူငယ်များသည် လူ့စွမ်းအားအရင်း အမြစ်တို့တွင် အခြေခံ အကျဆုံး ဖြစ်သည်ဟု လည်း သဘောထား၏။  အနာဂတ် လူ့အဖွဲ့အစည်း တွင်  နေရာယူ ကြမည့် လူငယ်များသည်  နိုင်ငံသားကောင်း တစ်ယောက်၏ အရည်အချင်း နှင့် ပြည့်စုံနေ စေရန် အားထုတ် ကြိုးပမ်းရင်း မိမိနိုင်ငံကို ကာကွယ်သူ၊ စောင့်ရှောက်သူ များ ဖြစ်စေရန် ဆောင်ရွက်ကြ ရပေမည်။

၂ဝဝ၈ ခုနှစ် နိုင်ငံတော် ဖွဲ့စည်းပုံ အခြေခံဥပဒေ အပိုဒ်(၂၈) အပိုဒ် ခွဲ(ဃ)တွင် ''ဘက်စုံ အတွေးအခေါ် အယူအဆ မှန်ကန်၍ အကျင့် စာရိတ္တ ကောင်းမွန်ပြီး နိုင်ငံတော် တည်ဆောက်ရေး အတွက် အကျိုး ပြုမည့် ခေတ်မီပညာရေး စနစ် ဖော်ဆောင်ရမည်'' ဟု ပြဋ္ဌာန်းထား၏။

ထို့ပြင် အပိုဒ်(၃၃)တွင် ''နိုင်ငံတော်သည် လူငယ်များ မျိုးချစ် စိတ်ဓာတ် ရှင်သန် ထက်မြက်ရေး၊ အတွေးအခေါ် မှန်ကန်ရေးနှင့် ဗလငါးတန် တိုးတက် ဖွံ့ဖြိုးရေး တို့အတွက် ဆောင်ရွက်ရမည် '' ဟုလည်း ပြဋ္ဌာန်း ထားသည်။ ဆိုလိုသည်မှာ ကျောင်းသား လူငယ်များသည် ပညာတတ် များဖြစ် ရုံသာမက အကျင့်စာရိတ္တ ကောင်းမွန်ရေး၊ မျိုးချစ်စိတ်ဓာတ် ရှင်သန် ထက်မြက်ရေး၊ အတွေးအခေါ် မှန်ကန်ရေးနှင့် ဗလငါးတန် တိုးတက် ဖွံ့ဖြိုးရေး တို့အတွက် 

နိုင်ငံတော်က ဆောင်ရွက် ရမည်ဟု သတ်မှတ် ပြဋ္ဌာန်း ထားခြင်း ဖြစ်၏။ ဤအချက်မှာ ယနေ့ ကျောင်းသားလူငယ် များအတွက် ပကတိ လိုအပ်ချက်များ ဖြစ်သည်ဟု သဘောရ၏။ကျောင်းသား လူငယ်အရွယ်တွင် ပညာကို အပတ်တကုပ် အားထုတ် သင်ယူရမည် ဖြစ်သကဲ့သို့ အပေါင်းအသင်း ကိုလည်း သတိကြီးစွာထား၍ ပေါင်းဖော်ကြရန် လောကသာရ ဆုံးမစာတွင် ဤသို့ သွန်သင်ဆုံးမ ထားသည်။

''ပညာမျက်စိ၊ မြင်မရှိ၍၊ အသိတရား၊ အယူမှားလျက်၊ စီးပွား မမျှော်၊ ကျိုးမပေါ်သား၊ သူတော်မဟုတ်၊ ယုတ်သည့်စရိုက် လူသူ မိုက်ကို၊ မကြိုက်မချစ်၊ ရန်သူစစ်သို့၊ မနှစ်သက်ပဲ ဝေးစွာရှဲ၍၊ ရှောင်လွှဲဖယ်ကြဉ်နိုင်စေမင်း''

စာရေးသူတို့ ငယ်စဉ် ကျောင်းသားဘဝ တွင် သင်ယူမှတ်သား ခဲ့ရသည့် ဖော်ပြပါ ဆုံးမစာများသည် ယနေ့တိုင် အဖိုးတန် အသုံးဝင် လျက်ရှိသဖြင့် သားသမီးများကို ညွှန်ပြ၍ သွန်သင်ဆုံးမ ကြရပေမည်။ ထိုသုိ့ ဆုံးမခြင်းမှာ သူတို့လေး များကို သားကောင်း ရတနာ၊ သမီးကောင်း ရတနာများ ဖြစ်စေလို၍ ဖြစ်၏။

ထို့ကြောင့် မိဘများအနေဖြင့် သားသမီးများကို ဆိုဆုံးမရာတွင် တုံ့ဆိုင်း နှေးကွေးခြင်း အလျှင်းမရှိသင့်၊ သားသမီးများ ကလည်း မိဘ၏စေတနာ၊ မေတ္တာအရင်းခံကို နားလည် သဘောပေါက်၍ အလေးအနက် ထားနာယူ ဆောင်ရွက်ရန် လိုသည်။

ပမာပုံ ဆိုရသော် မိဘတို့သည် အိုးလုပ်သော သူနှင့်တူ၏။ ထို အိုးလုပ်သူသည် မိမိအိုးကို ကွဲစိမ့်သောငှာ  ပုတ်ခတ်သည် မဟုတ်၊ တင့်တယ်လှပ စိမ့်သောငှာ  ပုတ်ခတ်ခြင်းသာ ဖြစ်၏။ သားသမီးတို့ကို အပါယ်ဆင်းရဲ ကျစေလို၍ ဆုံးမခြင်း မဟုတ်၊ အတတ်ပညာ အစီးအပွား ဖြစ်ထွန်း စေလို၍ ဆုံးမခြင်း ဖြစ်၏။

စာရေးသူတို့သည် ''သားသမီးကို၊ မကြီးခင်က၊ မဆုံးမသော်၊ မိဘ တလည် ရန်သူမည်၏'' ဟူသော လောကနီတိ ပျို့လာ ဆုံးမစာကဲ့သို့ မဖြစ်ရ လေအောင် နှလုံးသွင်း ဆင်ခြင်၍ လိုက်နာ ဆောင်ရွက် ကြမည် ဆိုလျှင် နိုင်ငံ့အတွက် သားကောင်း၊ သမီးကောင်း ရတနာများ အမှန်မုချ ပေါ်ထွန်း လာမည်ဟု ယုံကြည်ပါ၏။

ရတနာပုံနေ့စဉ် ၊ စာ(၈)

No comments:

Post a Comment

Related Posts Plugin for WordPress, Blogger...

တင်ပြီးသမျှ သတင်းများ

 

Follow on Twitter

Networkblog

FB Like page