ဗီတာမင် D က အမျိုးသားတွေရဲ့ စွမ်းဆောင်ရည်ကို ပိုမိုမြင့်မားစေနိုင်သလား

ဗီတာမင် D ဓာတ်က အမျိုးသားများရဲ့ စွမ်းဆောင်ရည်ကို မြင့်မားစေပြီး အိမ်ထောင်ရေး သုခနဲ့ ပြည့်စုံစေတယ် လို့ အီတာလျှံ သုတေသီတွေက ဖော်ထုတ် လိုက်ပါတယ်။ 

အီတလီနိုင်ငံ၊ မီလန်တက္ကသိုလ် မှ Dr. Alessandra Barassi ဆိုသူနဲ့ သူရဲ့ လုပ်ဖော်ကိုင်ဖက် များက အမျိုးသား ၁၄၃ ယောက်ကို လေ့လာမှု ပြုလုပ်ခဲ့ရာ ပန်းသေ ပန်းညှိုး ရောဂါခံစား နေရတဲ့ အမျိုးသား တွေမှာ ဗီတာမင် D ဓာတ် ချို့တဲ့နေတာကို တွေ့ရပါတယ်။

အထူးသဖြင့် ဗီတာမင် D ဓာတ် 20 ng/dL ထက် နည်းသူတွေမှာ သွေးကြော ဆိုင်ရာ ပြဿနာ များကြောင့် ဖြစ်တဲ့ ပန်းသေ ပန်းညှိုးရောဂါ အဖြစ်များလေ့ ရှိတာကို တွေ့ရှိခဲ့ ရပါတယ်။ ဗီတာမင် D ဓာတ် လျော့နည်းခြင်း က Endothelial ဆဲလ်များရဲ့ လုပ်ဆောင်ချက် ချို့ယွင်းမှု များကို ပိုမို အားပေးခြင်းဖြင့် ပန်းသေ ပန်းညှိုးရောဂါ ခံစားရ နှုန်းကို မြင့်တက် စေပါတယ်။ ဒါကြောင့် ပန်းသေပန်းညှိုး ရောဂါခံစား နေရတဲ့ အမျိုးသားတွေ အနေနဲ့ ဗီတာမင် D ဓာတ်ကို ပုံမှန် စစ်ဆေးမှု ပြုလုပ်ပြီး လိုအပ်ပါက ဖြည့်စွက်မှု ပြုလုပ်သင့်တယ် လို့ သုတေသီတွေက အကြံပြု ထားပါတယ်။

ဗီတာမင် D ကို မနက်ခင်း နေပူဆာ လှုံပေးခြင်းဖြင့် လည်းကောင်း၊ အစားအသောက် များမှတဆင့် လည်းကောင်း (ဥပမာ- ဗီတာမင် D ဓာတ် ဖြည့်တင်း ထားသော နွားနို့၊ ဗီတာမင် D ဓာတ် ဖြည့်တင်း ထားတဲ့ ဒိန်ချဉ်၊ ဆယ်လ်မွန်ငါး၊ တူနာငါး၊ ငါးရှဥ့်၊ အမဲအသည်း၊ ကြက်ဥအနှစ်)၊ ဗီတာမင် D အားဖြည့်ဆေး များမှီဝဲခြင်းဖြင့် လည်းကောင်း ရယူနိုင်ပါတယ်။ တစ်နေ့တာ ဗီတာမင် D လိုအပ်ချက်မှာ အသက် 4 နှစ်မှ 70 နှစ် အထိ အမျိုးသားများ အတွက် 600 IU ( 15 mcg ) နဲ့ အသက် 70 ကျော် အမျိုးသားများအတွက် 800 IU (20 mcg) တို့ ဖြစ်ပါတယ်။

Dr. Htet Htet Aung

drmyanmar