www.themyawadydaily.blogspot.com . . . www.facebook.com/themyawadydaily . . . https://twitter.com/Themyawadydaily

Wednesday, May 11, 2016

ရေတစ်ခွက်သောက်ပြီးမှ ရေချိုးပါ


ရေတစ်ခွက်သောက်ပြီးမှ ရေချိုးပါ

( ကြည်မြင့်လွင် - မုဒြာ )

လွန်ခဲ့သော ရက်ပိုင်း အတွင်းက စာရေးသူ၏ လူနာမိတ်ဆွေ အသက် ၅၈ နှစ်အရွယ် အမျိုးသမီး တစ်ဦးသည် ရာသီဥတု အလွန် ပူသဖြင့် အဲကွန်း ဖွင့်ထားသော အခန်းတွင် ညဘက် အိပ်စက်ပြီး နံနက်စောစော အိပ်ရာထ ချိန်တွင် ရေချိုးခန်းဝင်ကာ ရေချိုးသည်။ ရေချိုးနေရင်း တစ်ကိုယ်လုံး လေးလံ လာသဖြင့် ရေချိုးခန်း တံခါးကို ဖွင့်ပြီး အိမ်ရှေ့ခန်းတွင် ရှိနေသော ခင်ပွန်းဖြစ်သူကို လှမ်းခေါ်သည်။

ခင်ပွန်း ဖြစ်သူသည် သူ့ကို ပွေ့ယူပြီး အိပ်ရာပေါ်တွင် အသာချ၍ ရေစိုဝတ်များ လဲပေး နေစဉ်မှာပင် စကား မပြောနိုင် ခေါ်၍မရ လုံးဝ မလှုပ်ရှား တော့ဘဲ အသက် မရှူတော့။ လည်ပင်း သွေးကြောကို စမ်းသပ်ကြည့်ရာ သွေးမတိုး၍ မောင်နှမ တော်သူများကို ဖုန်းဆက် ခေါ်လိုက်ရာ ရောက်လာပြီး ဆေးရုံပို့ရန် ကားစီစဉ်ကြ သော်လည်း လုံးဝ မလှုပ်ရှား တော့သဖြင့် အသက် သေဆုံးမှန်း သိရှိကြပြီး ဆေးရုံ မပို့ဖြစ်တော့ ဟု ဆိုသည်။

အမှန်မှာ အိပ်ရာ ထချိန်တွင် အဲကွန်းခန်းမှ ထွက်လာပြီး ရေတန်းချိုး သဖြင့် သေဆုံးခြင်း မဟုတ်ပါ။ သေသေချာချာ မေးမြန်းကြည့်မှ သိရသည်မှာ သူတို့နေသည်မှာ တိုက်ခန်းအသစ် ဖြစ်သည်။ မနေ့ကမှ ပြောင်းလာရာ တစ်ညအိပ်ပြီး နံနက်အိပ်ရာ ထတွင် သေဆုံးရခြင်း ဖြစ်သည်။ နံနက်အိပ်ရာ ထပြီးနောက် အိမ်ရှေ့ခန်းတွင် တံမြက်စည်း လှည်းသန့်ရှင်းရေး လုပ်သည်။ ဘုရားခန်း တွင်လည်း သန့်ရှင်းရေး လုပ်သည်။ သောက်တော်ရေနှင့် ဘုရားပန်းများ လဲရန် ပြင်ဆင်ပြီးမှ ရေချိုးခန်းအတွင်း ဝင်ပြီး ရေချိုးသည်။ ရေချိုးနေရင်းမှ နေမကောင်း ဖြစ်လာသဖြင့် ခင်ပွန်းဖြစ်သူကို လှမ်းခေါ်ခြင်း ဖြစ်သည်။

ရောဂါ၏ အခြေခံ အကြောင်းလည်း ရှိသည်။ လွန်ခဲ့သည့် နှစ် အနည်းငယ်က သူ့တွင် ဆီးချိုရောဂါ ဝင်လာသည်။ ဆီးချို အထူးကု ဆရာဝန်နှင့်လည်း ပြသည်။ ကုသမှု ခံယူသည်။ ဆီးချို ကျဆေးလည်း သောက်နေသည်။ 

သို့သော် သူ့အားနည်းချက် မှာ အစားမရှောင် အစားအသောက် မဆင်ခြင်ခြင်း ဖြစ်သည်။ စားချင်ရာ စားပြီး ဆေးသောက် လိုက်မည်ဟု အတွေးအခေါ်မျိုး သူ့တွင်ရှိသည်။ သေဆုံးမည့် နံနက်က အိပ်ရာထချိန်တွင် မိမိဘာသာ လက်ထိပ် သွေးဖောက်ပြီး ဆီးချိုစစ်သည့် ကိရိယာဖြင့် စစ်ဆေးသည်။ အိုကေသည်၊ ကောင်းသည်ဟု ဆိုသည်။ သို့သော် သူ သတိမထား မိသည်မှာ သွေးတိုးဖြစ်သည်။ အဲကွန်း ဖွင့်ထားသော အအေးခန်းမှ ထွက်လာသူ သည် အပူချိန် မတူသည့် ပြင်ပသို့ ရောက်လာလျှင် သွေးပေါင်တက် လာတတ်သည်။ သတိပြုသင့်သည့် အရာဖြစ်သည်။

သွေးတိုးသည် တိတ်တဆိတ် လူသတ်သမား အလစ်ချောင်း နေသော လူသတ်သမား ဖြစ်သည်။ သတိရှိကြ စေချင်သည်။ သွေးတိုး၊ လေဖြတ်၊ ဦးနှောက် သွေးကြောပြတ် ၍ ရုတ်တရက် သေဆုံးရသူ အများအပြား ရှိသည်။ 

အချို့ကလည်း ဝေဒနာ မခံစားရဘဲ ရက်ရှည်လများ လေဖြတ်ပြီး ဒုက္ခိတ မဖြစ်ဘဲ ယခုလို သေသွားရခြင်းကို ကောင်းသည်ဟု ဆိုကြသူများလည်း ရှိသည်။ ရေချိုးရင် သွေးတိုးပြီး ဦးနှောက် သွေးကြော မပြတ်စေရန် ကာကွယ် နိုင်သည့် နည်းကို တင်ပြလိုသည်။

ရေမချိုးမီ လေ့ကျင့်ခန်း တစ်ခုခု ပြုလုပ်ပါ။ သို့မဟုတ် လမ်းလျှောက်ပါ။ ကြွက်သားနှင့် အာရုံကြောများ တစ်ညလုံး အိပ်ထားသဖြင့်ညောင်းနေသည်ကို လန်းဆန်းစေရန် ဖြစ်သည်။ 

ပြီးလျှင် ရေမချိုးမီ ရေအေး (ပုံမှန် အေးသောရေ) မတ်ခွက် တစ်ခွက်ခန့် သောက်ပါ။ ဝမ်းအတွင်း အစာအိမ်မှ အပူနှင့် လေပူများ ငြိမ်သွားမှ ရေချိုးလျှင် သွေးဆောင့် တိုးခြင်းမှ ကာကွယ်နိုင် ပါသည်။ ပူသော ရာသီတွင် သတိပြု လုပ်ဆောင်ကြပါ။

ရတနာပုံနေ့စဉ် ၊ စာ(၅)

No comments:

Post a Comment

Related Posts Plugin for WordPress, Blogger...

တင်ပြီးသမျှ သတင်းများ

 

Follow on Twitter

Networkblog

FB Like page