ရန်ကုန် ၊ ၁၇-၇-၂၀၁၅
မာဆရိုက် ချည်ထည်များ နှင့် ယိုးဒယား အထည်ပိတ်စ များတွင် မင်းကွန်း ဒေသမှ ရွှေရေး၊ ငွေရေးပန်းချီများ ရေးဆွဲထားသည့် ဆေးရေး အထည်များကို မန္တလေး ဈေးကွက်နှင့် ရန်ကုန်ဈေးကွက် တို့မှ မှာယူမှုများ များပြားပြီး ဝယ်လိုအား များစွာ ရှိနေကြောင်း သိရသည်။
''သီတင်းကျွတ် ရင် မင်္ဂလာပွဲတွေ ဆင်နွှဲတော့မယ့် ရာသီဖြစ်တဲ့ အတွက် ရွှေရေး၊ ငွေရေး အထည်တွေ အရောင်း သွက်မယ်။ မရမှာစိုးလို့ အခု ကတည်းက လာအပ်ကြ တယ်။ ကထိန်ရာသီ ဆိုရင်လည်း မန္တလေးမှာ အကြီးဆုံး ဖောက်သည် သုံးဦး ရှိတယ်။ မန္တလေးဈေးချို က အထည်ရောင်းတဲ့ သူတွေ ကလည်း မှာကြတယ်။ ရန်ကုန်ဘက်က လည်း မှာကြတယ်။ ဒါကြောင့် ဒီက ပန်းချီဆရာ တချို့ကို ရန်ကုန်လွှတ်ပြီး အထည် ပန်းချီသွားဆွဲခိုင်း နေရပါတယ်။ ဒီအလုပ်က အခု တော်တော်ကို တွင်ကျယ် လာပါတယ်။ လက်နဲ့ ဆွဲရတော့ လက်ဝင်တဲ့ အတွက် အထည်များများ ထွက်ဖို့ အချိန်ပေး ရပါတယ် '' ဟု မင်းကွန်း အထည်များကို ပန်းချီဆွဲ ပုံဖော်ပေးနေသော ကိုငြိမ်း က ပြောသည်။
ယခင် အရောင်တူ ဝမ်းဆက်များ အစား ဆန့်ကျင်ဘက် အရောင်များကို ဒီဇိုင်းဆွဲကာ ရွှေမှုန်ငွေမှုန် ဖြင့်ကပ်၍ ဒီဇိုင်းဆန်းများ ပြုလုပ်ကြသည်။ ထို့အပြင် လုံချည်တွင် ထိုးထားသော ဒီဇိုင်း အရောင်များ အတိုင်း အင်္ကျီ အရောင်ခံထည် အဖြစ် အရောင်စပ်ပြီး ပြုလုပ်ကြသည်။ ဒီဇိုင်း အသစ်အဆန်း များကို ဝတ်ဆင်မှု များပြား လာသောကြောင့် လုပ်ငန်းများကို ရန်ကုန်၌ တိုးချဲ့ဖွင့်လှစ် နေကြောင်း သိရသည်။
အဆိုပါ ပညာရပ်ကို တတ်ကျွမ်းသော မင်းကွန်းမှ လူငယ်များ အတွက် အလုပ်လည်း ရပြီး ပညာလည်း ရသဖြင့် စိတ်ဝင်တစား လာရောက် သင်ယူမှု များပြား လာကြောင်း သိရသည်။ အထည်ဆေးရေး ပန်းချီ ၀မ်းဆက်တစ်ထည် ရေးဆွဲလျှင် လက်ရာ အစိပ်အကျဲ အပါအဝင် အသုံးပြု ရသော ပစ္စည်းများပေါ် မူတည်၍ လက်ခ ငွေကျပ် ၄၅ဝဝ မှ ၁၅ဝဝဝ ကြားအထိ ရရှိကြောင်း သိရသည်။
သီရိ
#Themyawadydaily
No comments:
Post a Comment