အလောင်းတော်ကဿပ ဘုရားဖူးရာသီတွင် ဆင်စီးဘုရားဖူးများကို တွေ့ရစဉ်။
မုံရွာ ၂၃-၇-၂ဝ၁၈
စစ်ကိုင်းတိုင်း ဒေသကြီးအတွင်း သဘာဝခရီးသွား နယ်မြေများ ဖော်ဆောင်ရာတွင် သဘာဝတောတောင်များ၊ ဘူမိထူးခြားသွင်ပြင် လက္ခဏာများ ပျက်စီးမှုမရှိဘဲ အချိန်ကြာမြင့်စွာ တန်ဖိုးများမြင့်တက် နေစေရန် တင်းကျပ်သော စည်းမျဉ်း စည်းကမ်းများ ချမှတ်သင့်ကြောင်း သဘာဝပတ်ဝန်းကျင် ထိန်းသိမ်းရေး ပညာရှင် မုံရွာတက္ကသိုလ် ဘူမိဗေဒဌာန ပါမောက္ခ ဌာနမှူး ဒေါက်တာ ဇော်မြင့်နီ၏ ပြောကြားချက်အရ သိရသည်။
စစ်ကိုင်းတိုင်း ဒေသကြီးသည် သဘာဝ အရင်းအမြစ်များနှင့် အထင်ကရ နယ်မြေများစွာရှိရာ ယနေ့အချိန် အခါတွင် အရင်းအနှီး အနည်းဆုံးနှင့် အကျိုးအမြတ်များစွာ ရရှိသော ခရီးသွားလုပ်ငန်းများ ပေါ်ထွက်လာစေရေးအတွက် သဘာဝခရီးသွား နယ်မြေများ ဖော်ဆောင်လျက်ရှိရာ တိုင်းဒေသကြီးအတွင်းမှ သဘာဝတောတောင်များနှင့် ဘူမိထူးခြားသွင်ပြင် လက္ခဏာများ ပျက်စီးမှုမရှိဘဲ သဘာဝအတိုင်းတည်ရှိ နေစေရန်အတွက် အကြံပြုခြင်းဖြစ်ကြောင်း သိရသည်။
"ခရီးသွားလုပ်ငန်း ဆိုတာက လုပ်သင့်တဲ့ လုပ်ငန်းတစ်ခုပါ၊ ဒီလိုသဘာဝ တောတောင်တွေထဲကို ခရီးသွားလုပ်ငန်းတွေ ဖော်ဆောင်ရင် သဘာဝတောတောင်တွေနဲ့ ဘူမိထူးခြားသွင်ပြင် လက္ခဏာတွေ မပျက်စီးဘဲ အချိန်အကြာကြီး တန်ဖိုးတွေမြင့်တက် နေအောင်လို့ ခရီးသွားဧည့်သည် တွေပဲဖြစ်ဖြစ်၊ လေ့လာရေး လုပ်ဆောင်တဲ့ သူတွေပဲဖြစ်ဖြစ် တင်းကျပ်တဲ့ စည်းကမ်းတွေချမှတ် ထားသင့်ပါတယ်။ သူတို့လုပ်ချင်တာတွေကို မလုပ်နဲ့လို့တော့ မတားဆီးသင့်ပါဘူး။ ဒါပေမဲ့တကယ် ကျွမ်းကျင်တဲ့ ပညာရှင်တွေရဲ့ အကြံပြု လမ်းညွှန်မှုတွေနဲ့ ဆောင်ရွက်သင့်တယ်၊ စီးပွားရေး နောက်ကိုချည်းပဲ လိုက်မယ်ဆိုရင်နေရာ အနေအထားတွေ ပျက်စီးမယ်။စီးပွားရေးကိုလဲ ဖြစ်အောင်လုပ်မယ်၊ သဘာဝနယ်မြေတွေလဲ ရေရှည်ခံအောင် လုပ်မယ်ဆိုရင် တင်းကျပ်တဲ့ စည်းကမ်းတွေ ရှိသင့်တယ်။ ဥပမာပြောရရင် အဓိကကျတဲ့သဘာဝခရီး သွားနေရာတွေကိုရောက်ဖို့ လမ်းတွေကိုလွယ်ကူ အောင်မလုပ်သင့်ဘူး။ ပြောချင်တာက သဘာဝအတိုင်းပဲ ရှိသင့်တယ်လို့ ပြောချင်တာပါ။ အဲဒီလိုလုပ်ဆောင်နိုင်ရင် သဘာဝ နယ်မြေတွေ မပျက်စီးဘူး။ နှစ်ပေါင်းများစွာမှာ တန်ဖိုးတွေတက်နေမှာပါ။ စစ်ကိုင်းတိုင်းဒေသကြီးအတွင်းမှာ သဘာဝခရီးသွား လုပ်ငန်းတွေ တိုးချဲ့လုပ်ကိုင်နေတာဆိုတော့ ဒီအချက်တွေကို သတိပြုသင့်ပါတယ်"ဟု သဘာဝပတ်ဝန်းကျင် ထိန်းသိမ်းရေးပညာရှင် မုံရွာတက္ကသိုလ် ဘူမိဗေဒဌာန ပါမောက္ခဌာနမှူး ဒေါက်တာဇော်မြင့်နီက ပြောပြသည်။
သဘာဝခရီးသွား လုပ်ငန်းများ ဖော်ဆောင်ရာတွင် သဘာဝပတ်ဝန်းကျင် ကောင်းမွန်ရေးနှင့် စီးပွားရေးလုပ်ငန်းသည် ချိန်ခွင်လျှာကဲ့သို့ ညီမျှရန် လိုအပ်ကြောင်းကို သဘာဝပတ်ဝန်းကျင် ထိန်းသိမ်းရေး ပညာရှင် မုံရွာ
တက္ကသိုလ် ဘူမိဗေဒဌာန ပါမောက္ခဌာနမှူး ဒေါက်တာဇော်မြင့်နီက ဆက်လက် အကြံပြုထားသည်။
"သဘာဝပတ်ဝန်းကျင် ထိန်းသိမ်းရေး သဘောတရားတွေထဲမှာ အဲဒီလိုပါတယ်၊ ဟိုတုန်းကတည်းက ရှိနေတဲ့ သဘာဝပတ်ဝန်းကျင် အလှတရားတွေနဲ့ လူတွေလုပ်ဆောင်မယ့် စီးပွားရေးရဲ့ အကျိုးအမြတ်တွေနဲ့က ချိန်ခွင်လျှာလို ဖြစ်နေရမယ်။ စီးပွားရေးမှာ တစ်အားအောင်မြင် နေမယ်ဆိုရင်လဲ သဘာဝပတ်ဝန်းကျင်တွေ ပျက်စီးသွားလိမ့်မယ် သဘာဝပတ်ဝန်းကျင်က ကောင်းနေပြီး စီးပွားရေးအရ အသုံးမပြုရင်လည်း မဟုတ်ပြန်ဘူး။ အဲဒီနှစ်ခုညီမျှဖို့အတွက် လုပ်ငန်းဖော်ဆောင်မယ့် သူတွေအနေနဲ့ သက်ဆိုင်ရာ ပညာရှင်တွေရဲ့ အကြံဥာဏ်ရယူပြီး ကြိုးစားပြီးတော့ စီမံခန့်ခွဲနိုင်ရမယ်"ဟု အကြံပြုထားသည်။
စစ်ကိုင်းတိုင်း ဒေသကြီးအတွင်း အမြင့်မြို့ဟောင်း၊ ဇလုံတောင်၊ အလောင်းတော်ကဿပ၊ ဖိုလ်ဝင်တောင်၊ ရွှေဘတောင်မန်လည် ဆရာတော်ကြီး ကျောင်းတော်၊ ကသာမြို့ရှိ အရေးပိုင်မင်းနေအိမ်၊ စစ်ကိုင်းတောင်၊ မင်းကွန်း ဒေသ၊ ရွှေဘိုမြို့ရှိ အလောင်းမင်းတရားကြီး နန်းတော်ရာအပြင် အခြားအထင်ကရ နေရာများစွာရှိပြီး ခရီးသွားလုပ်ငန်းများကို မုံရွာ၊ စစ်ကိုင်း၊ ရွှေဘို၊ကသာ၊ ကလေးစသည်ဖြင့် ဇုန်များခွဲကာ ခရီးသွားလုပ်ငန်းများ လုပ်ကိုင်လျက်ရှိပြီး သဘာဝခရီးသွား နယ်မြေများလည်း ဖော်ထုတ်လျက်ရှိကြောင်း သိရသည်။
#Themyawadydaily
.jpg)
No comments:
Post a Comment