မန္တလေး ၁၃-၁၂-၂၀၁၇
မန္တလေးမြို့ပြ ဝန်ဆောင်မှုဖွံ့ဖြိုး တိုးတက်ရေး စီမံကိန်းတွင် ပါဝင်သော သင်္ဂဇာချောင်းသန့်ရှင်း သာယာလှပရေးအတွက် ပြည်သူလူထု အခြေပြု အမှိုက်ယာယီလက်ခံသည့် အမှိုက်လွှဲပြောင်း ဇုန်တစ်ခုကို အာရှဖွံ့ဖြိုးရေးဘဏ် (ADB) ၏ ချေးငွေအမေရိကန် ဒေါ်လာသန်း ၆ဝ ထဲမှ အမေရိကန် ဒေါ်လာ ၄၇ဝဝဝဝ အကုန်ကျခံ၍ သဂင်္ဇာ ချောင်းပတ်ဝန်းကျင်၌ တည်ဆောက်နိုင်ရန် တင်ဒါခေါ်ယူသွားမည် ဖြစ်ကြောင်း မန္တလေးမြို့တော်စည်ပင်သာယာရေး ကော်မတီ စီမံကိန်းမန်နေဂျာ ဒေါ်ခင်မေဌေးထံမှ သိရသည်။
သင်္ဂဇာချောင်းအနီး အမှိုက်လွှဲပြောင်းဇုန်၌ မန္တလေးမြို့တော် စည်ပင်သာယာရေး ကော်မတီမှ အမှိုက်စွန့်ပစ်ရန် နေရာငါးနေရာမှ အမှိုက်များနှင့် သင်္ဂဇာချောင်း ပတ်ဝန်းကျင်ရှိ ရပ်ကွက်များမှ အမှိုက်များကို အမှိုက်အမျိုးအစားခွဲခြား၍ ၎င်းအမှိုက်လွှဲပြောင်းဇုန် တွင်သိမ်းဆည်းကာ ထိုမှတစ်ဆင့် ကြာနီကန်အမှိုက်ပုံသို့ စွန့်ပစ်သွားမည် ဖြစ်သည်။
အဆိုပါ အမှိုက်လွှဲပြောင်းဇုန် တည်ဆောက်ခြင်းဖြင့် အမှိုက်သိမ်းဆည်းခြင်း လုပ်ငန်းကို အရှိန်အဟုန်မြှင့် ဆောင်ရွက်နိုင်ခြင်း၊ သင်္ဂဇာချောင်းပတ်ဝန်းကျင်ရှိ အမှိုက်သိမ်း ယာဉ်ဝင်ရောက်ရန် အခက်အခဲရှိသော လမ်းများ၊ အိမ်များသို့ သုံးဘီးဆိုင်ကယ်များ လက်တွန်းလှည်းများဖြင့် အမှိုက်သိမ်းဆည်း၍ အမှိုက်သိမ်းယာဉ်ကြီးများ ပေါ်သို့ သွားရောက်အတင်အချ ပြုလုပ်ရခြင်းကို လျှော့ချနိုင်ခြင်း၊ ယာဉ်လမ်းကြောပိတ်ဆို့မှုကို တစ်စိတ်တစ်ပိုင်းလျှော့ချနိုင်ခြင်း၊ သင်္ဂဇာချောင်းအတွင်း အမှိုက်ကျရောက်ခြင်းကြောင့် ရေထုညစ်ညမ်းနေမှု လျော့နည်းသွားနိုင်ခြင်း စသည့် အကျိုးကျေးဇူးများ ရရှိနိုင်မည် ဖြစ်ကြောင်း သိရသည်။
၎င်းအမှိုက်လွှဲပြောင်းဇုန် တည်ဆောက်ပြီးပါက သင်္ဂဇာချောင်း ပတ်ဝန်းကျင်ငါးရပ်ကွက်ရှိ ပြည်သူနှစ်သိန်း ခုနစ်သောင်းကျော်ကို အကျိုးပြုမည်ဖြစ်ပြီး မြို့တော်စည်ပင် သာယာရေး ကော်မတီအနေဖြင့် အမှိုက်လွှဲပြောင်း ဇုန်မြေနေရာ ရွေးချယ်မှုနှင့် ADB ၏ ချေးငွေလိုလားချက် များအရ ပြည်တွင်း ကုမ္ပဏီများကို အမြန်တင်ဒါ ခေါ်ဆောင်ရွက်သွားမည် ဖြစ်ကြောင်း သိရသည်။
#Themyawadydaily
.jpg)
No comments:
Post a Comment