မောင်တော ၊ ၁၇-၁၁-၂၀၁၆
မောင်တောမြို့နယ် သရက်အုပ်ကျေးရွာမှ လူငါးဦးပါ အိမ်ထောင်စု တစ်စုသည် ကြောက်ရွံ့ ထိတ်လန့်မှုကြောင့် နေရပ်မှ ခေတ္တစွန့်ခွာ လာရာ မောင်တောမြို့နယ် သာသနာ့ ဗိမာန်တော်သို့ ယမန်နေ့ ညနေပိုင်းတွင် ရောက်ရှိလာသည်။
မောင်တောမြို့နေ ကိုဝင်းသိန်းက ''အခုညနေ သရက်အုပ်က နေရပ်ကို စွန့်ခွာလာတဲ့ အိမ်ထောင်စု တစ်စုကို ကျွန်တော်တို့ မောင်တောမြို့နယ် သာသနာ့ ဗိမာန်တော်မှာ နေရာချပေး ထားပါတယ်။ သူတို့က ကျွန်တော်တို့ တိုင်းရင်းသား တွေပါ။ ဖားဝပ်ချောင်း ကလာတဲ့ ကားတစ်စီးကတော့ ဘူးသီးတောင် အထိ ဆက်တက်သွားတယ်။ သူတို့လည်း ကြောက်လို့ နေရပ်စွန့်ခွာ လာတာလို့ ပြောပါတယ်။ အိမ်ထောင်စုဝင် အရေအတွက်တော့ မသိလိုက် ပါဘူး'' ဟု ပြောသည်။
သရက်အုပ်ကျေးရွာ မှ ခေတ္တတိမ်းရှောင် လာသူ ဒေါ်ဖြူယိုင်စိန် က ''ကျွန်မတို့က သရက်အုပ်က ထွက်လာတာပါ။ အားလုံး ငါးယောက်ပါ။ ဟိုမှာ ယောက်ျားနဲ့ သမက် ကျန်ခဲ့ပါတယ်။ သရက်အုပ် က ဆေးမှူးကားနဲ့ အကူအညီ တောင်းပြီး လိုက်လာတာပါ။ လုံခြုံရေးကား တွေ့လို့ သူတို့ရဲ့ကား နောက်က ခွင့်တောင်းပြီး လိုက်ခဲ့တာပါ။ ကျန်တဲ့ သူတွေလည်း စိုးရိမ်နေကြ ပါတယ်။ ကူညီမယ့်သူ မရှိလို့ပါ။ နေ့ရောညရော မအိပ်ရဲပါဘူး။ ကောင်းကောင်း လည်း မစားနိုင်ပါဘူး။ ယောက်ျားနဲ့ သမက် ကျန်ခဲ့တာက ဟိုမှာရှိနေတဲ့ ပစ္စည်းတွေ၊ အိမ်တွေကို စောင့်ရှောက်ဖို့ပါ။ ရွာမှာ တိုင်းရင်းသား လူဦးရေက ၃၅ ယောက် ရှိပါသေးတယ်။ သူတို့တွေလည်း လာချင် နေပါတယ်။ တိုက်ပွဲဖြစ်နေတော့ ကြောက်လို့ပါ။ လုံခြုံရေးလည်း မရှိပါဘူး။ ဘယ်မှာ ဖြစ်နေတာလဲ ဆိုတော့ ဂွဆုံကျေးရွာ မှာပါ။ လုံခြုံရေး ချပေးရင်တော့ ပြန်နေချင်ပါတယ်'' ဟုပြောသည်။
သရက်အုပ် ကျေးရွာမှ ခေတ္တတိမ်းရှောင် လာသူ ဒေါ်ဖြူယိုင်စိန် တို့မိသားစုတွင် ကလေးငယ် သုံးဦးနှင့် အမျိုးသမီးနှစ်ဦး ပါဝင်ကာ သရက်အုပ် ကျေးရွာတွင် ကျန်ရှိနေသည့် တိုင်းရင်းသား များသည်လည်း လုံခြုံရေး ပေးနိုင်မည့် အချိန်ကို စောင့်နေကြကြောင်း သိရသည်။
မြ၀တီနေ့စဉ်သတင်းစာ ၊ စာ(၁၇)
.jpg)
No comments:
Post a Comment