ဗိုလ်ချုပ်အောင်ဆန်း အသုံးပြုခဲ့သော ပစ္စည်းများပြခန်း ကိုတွေ့ရစဉ်
ဗမာ့လွတ်လပ်ရေးတပ်မတော် ဖွဲ့စည်းရန် ရဲဘော်သုံးကျိပ်တို့ သွေးသောက်သစ္စာပြုစဉ် အသုံးပြုခဲ့သည့် စားပွဲနှင့် ကုလားထိုင်ခုံကို တွေ့ရစဉ်
တပ်မတော် စစ်သမိုင်းပြတိုက် ပြင်ပပြကွက်ရှိ လေယာဉ်များကို တွေ့ရစဉ်
( ခိုင်ကျော်ညို )
''ရဲရေးရောက်သော်၊ ရွံ့ကြောက်မဲ့တွန်၊ နိုင်ငံဝန်၌၊ ကုမ္ဘာဏ်ယက္ခ၊ နာဂခြင်္သေ့၊ ရင်ဆိုင်တွေ့လည်း၊ ခွာ၍မတွန့်၊ အသက်စွန့်လော့'' ဆိုသော နန္ဒိသေနပျို့လာ အတိုင်း မြန်မာ တိုင်းရင်းသား တို့သည် သမိုင်း အဆက်ဆက် တိုင်းပြည်နှင့် လူမျိုး အတွက် အသက်သွေးချွေး စတေး၍ ကာကွယ် ခဲ့ကြပေသည်။ မြန်မာ ဝေါဟာရ တပ်မတော် ဆို သည်မှာ ပြည်သူတို့၏ အားထားရာ ဖြစ်ခြင်း၊ အင်အား အကြီးအမား ရှိခြင်း၊ တော်တည့် ဖြောင့်မတ်ခြင်း ဆိုသော အရည်အချင်း သုံးရပ် ဖြစ်သော အဖွဲ့အစည်း ဟု အဓိပ္ပာယ် ရပါသည်။
မြန်မာနိုင်ငံသည် လွန်ခဲ့သော နှစ်ပေါင်းများစွာ မှစ၍ မြို့ပြနိုင်ငံများ ထူထောင်ကာ တိုင်းရင်းသား ညီအစ်ကိုများ နေထိုင်လာခဲ့ကြ ရာမှ ခရစ်နှစ် ၁ဝ၄၄ တွင် အနော်ရထာ မင်းကြီး က စည်းလုံး ညီညွတ်သော ပထမ မြန်မာနိုင်ငံတော် ကြီးကို တည်ထောင် ခဲ့သည်။ ထို့နောက် ဘုရင့်နောင် မင်းတရားကြီးက ၁၅၅၁ ခုနှစ် တွင် ဒုတိယမြန်မာ နိုင်ငံတော်ကြီး ကို တည်ထောင် ခဲ့သည်။ အလောင်းမင်း တရားကြီး ဦးအောင်ဇေယျ က ၁၇၅၂ ခုနှစ်တွင် တတိယ မြန်မာ နိုင်ငံတော်ကြီးကို တည်ထောင် ခဲ့သည်။
ဤသို့ မြန်မာတို့ ကိုယ့်ထီးကိုယ့်နန်း ကိုယ့်ကြငှန်းနှင့် ကိုယ့်အရှင် ကိုယ့်ဘုရင်နှင့် နေထိုင်လာခဲ့ကြ ရာမှ ၁၉ ရာစု နှောင်းပိုင်းတွင် ထီးကျိုးစည်ပေါက် ကိုလိုနီ လက်အောက် ရောက်ခဲ့ရ သည်။ မျိုးချစ်လူငယ် ရဲဘော်သုံးကျိပ် တို့၏ ဦးဆောင်မှုဖြင့် နယ်ချဲ့ကို မောင်းထုတ် နိုင်ခဲ့သည်။ အရင်းရှင်စနစ် ဖောက်ပြန်စစ်ကို နိုင်ပြန်သော် ဖက်ဆစ်ဘီလူး နယ်ချဲ့ရူးကို တပ်မတော်နှင့် ပြည်သူတို့ အင်အားဖြင့် တိုက်ထုတ် အောင်ပွဲရခဲ့ သည်မှာ ယခု ၂ဝ၁၆ ခုနှစ် မတ် ၂၇ ရက်နေ့တွင် ၇၁ နှစ် ပြည့်ခဲ့ပေပြီ။
ခေတ်အဆက်ဆက် မြန်မာ့ တပ်မတော်သား တို့၏ ဇာတိမာန် ထက်သန်သော စိတ်ဓာတ်နှင့် တပ်မတော်သား တို့ အသုံးအဆောင် စစ်လက်နက် ပစ္စည်းများနှင့် အခြား သိမှတ်ဖွယ်ရာ အဖြာဖြာတို့ကို တပ်မတော် စစ်သမိုင်း ပြတိုက် (နေပြည်တော်)သို့ သွားရောက် လေ့လာ ခဲ့သည်များအား စာရှုသူများ သိရှိစေလိုသော စေတနာဖြင့် တင်ပြလိုက်ရ ပါသည်။
တပ်မတော် စစ်သမိုင်းပြတိုက် (နေပြည်တော်) သည် ဇေယျာသီရိမြို့နယ် ရန်ကုန်-မန္တလေး ကားလမ်းဟောင်း မိုင်တိုင် ၂၅၉ မိုင် ၃ ဖာလုံ အနီးတွင်ရှိသည်။ ဇေယျာသီရိ တပ်မတော် ဘောလုံးကွင်း၊ နေပြည်တော် အမျိုးသား အထိမ်းအမှတ် ဥယျာဉ်တို့နှင့် ကပ်လျက် တည်ရှိသည်။ ပျဉ်းမနားဘက်မှ လာမည်ဆိုပါက တိရ စ္ဆာန်ဥယျာဉ် (နေပြည်တော်)၊ ဆာဖာရီ ဥယျာဉ်တို့ကို ကျော်လာသည်နှင့် ရောက်သည်။ တပ်ကုန်းဘက်မှ လာပါက သိုက်ချောင်း လမ်းဆုံ ရောက်သည်နှင့် လှမ်းမြင်ရသည်။
တပ်မတော် စစ်သမိုင်းပြတိုက် (နေပြည်တော်) ကို ၂ဝ၁၂ ခုနှစ် မတ် ၁၈ ရက်တွင် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် က ဖွင့်လှစ်ပေး ခဲ့သည်။ အကျယ်အဝန်း အားဖြင့် ၆ဝ၃ ဒသမ ၆၈ ဧကရှိသည်။ ဂိတ်ပေါက် မရောက်မီ ခပ်ဝေးဝေး ကပင် ပြင်ပပြကွက်များ အဖြစ်ပြသ ထားသည့် ခေတ်အဆက်ဆက် လေယာဉ်ကြီးများ၊ သင်္ဘောကြီးများ၊ အမြောက်ကြီးများ၊ တင့်ကားကြီးများ စသည်တို့ ကိုတွေ့ရသည်။ စုစုပေါင်း ပြင်ပပြကွက် သုံးခုရှိသည်။ ကြီးမား ကျယ်ပြန့်သည့် ပြကွက်ကြီး များကို တစ်မျှော်တစ်ခေါ် မြင်ရသည်။
ပြတိုက် အတွင်း၌ တပ်မတော်(ကြည်း) ပြကွက် အဆောင် ၆ ဆောင်၊ တပ်မတော်(ရေ) ပြကွက် အဆောင် ၃ ဆောင်နှင့် တပ်မတော် (လေ) ပြကွက် အဆောင် ၃ ဆောင် ရှိသည်။ ပြခန်းတိုင်းတွင် တာဝန်ကျ တပ်မတော်သား များက လိုက်လံရှင်းလင်း ပြသပေး သောကြောင့် လေ့လာသူများ အတွက် များစွာ အဆင်ပြေသည်။
တပ်မတော်(ကြည်း) ပြခန်းဆောင် အတွင်းရှိ စစ်သမိုင်းပြတိုက် နှင့် တပ်မတော် မော်ကွန်းတိုက်မှူးရုံး ပြခန်းတွင် ရှေးခေတ် မြန်မာမင်းများ အသုံးပြုခဲ့သည့် ပစ္စည်းများ၊ ရှေးမြန်မာမင်း များ ထွက်တော်မူပုံ ပြသ ထားရှိမှုများ၊ မွန် သူရဲကောင်း သမိန်ဗရမ်း ရုပ်တုနှင့် ကျန်စစ်သား မင်း၏ ရုပ်တု၊ ရှေးခေတ် မြန်မာ့ တပ်မတော်သုံး ပစ္စည်းများ၊ ဝက်ထီးကန် တိုက်ပွဲ၊ ပန်းဝါတိုက်ပွဲ သရုပ်ပြ ပန်းချီကားများ၊ ရဲဘော်သုံးကျိပ် သွေးသောက် သစ္စာပြုစဉ် အသုံးပြုခဲ့သော စားပွဲနှင့် ကုလားထိုင်များ၊ နယ်ချဲ့ တော်လှန်ရေး ကာလတွင် မျိုးချစ် ခေါင်းဆောင်များ အသုံးပြု ခဲ့သည့် ပစ္စည်းများ၊ ရွှေရတု တပ်မတော်နေ့ အထိမ်းအမှတ် စဥ့်အိုး၊ ပြည်ပမှ ပေးအပ်ခဲ့သော အမှတ်တရ လက်ဆောင် ပစ္စည်းများ၊ တပ်မတော်၏ နိုင်ငံတကာ ဆက်ဆံရေး ပြကွက်များ၊ တပ်မတော်တွင် တာဝန်ထမ်းဆောင် ခဲ့သော အကြီးအကဲများ၏ မှတ်တမ်း ဓာတ်ပုံများ၊ လက်ရှိတာဝန် ထမ်းဆောင်လျက် ရှိသော တပ်မတော် အကြီးအကဲ များ၏ မှတ်တမ်း ဓာတ်ပုံများ အစရှိသည့် မြန်မာ့ တပ်မတော် စတင်ပေါ်ပေါက် လာချိန်မှ မျက်မှောက်ကာလ တပ်မတော် အထိ အကြောင်းအရာ များ ပြသထားမှု များကို လေ့လာခဲ့ ရသည်။
ဆက်လက်ပြီး တပ်မတော်(ရေ) ပြခန်းဆောင်ရှိ ရှေးခေတ် မြန်မာ့ရေတပ်၊ ဂျပန်ခေတ် မြန်မာ့ ရေတပ်မတော် နှင့် ဒုတိယ ကမ္ဘာစစ် အတွင်း မြန်မာ့ရေတပ် မှတ်တမ်း ဓာတ်ပုံများ၊ စစ်ရေယာဉ် - မေယု လွှဲပြောင်း လက်ခံစဉ် မှတ်တမ်း ဓာတ်ပုံများ၊ ဖရီးဂိတ် စစ်ရေယာဉ်- အောင်ဇေယျ၊ ခေတ် အဆက်ဆက် တပ်မတော်(ရေ) အလံများ၊ ဝက်ကော် တိုက်ပွဲ သမိုင်းမှတ်တမ်း ဓာတ်ပုံများ၊ တပ်မတော် (ရေ) မှ ဆောင်ရွက်ခဲ့သော စစ်ဆင်ရေးများ၊ စစ်ရေယာဉ်များ နိုင်ငံခြားမှ လွှဲပြောင်းလက်ခံ ယူဆောင် လာစဉ် မှတ်တမ်း ဓာတ်ပုံများ၊ တပ်မတော် (ရေ) ၏ စစ်ရေယာဉ်များ အစရှိသည့် တပ်မတော် (ရေ) ၏ ခေတ် အဆက်ဆက် မှတ်တမ်းများ ပြသထားမှု များကို လေ့လာခဲ့ ရသည်။
ထို့နောက် တပ်မတော်(လေ) ပြခန်းဆောင် အတွင်း၌ တာဝန် ထမ်းဆောင် ခဲ့သော လေတပ်ဦးစီးချုပ် များ၏ မှတ်တမ်း ဓာတ်ပုံများ၊ တပ်မတော်(လေ) ၏ လှုပ်ရှားမှု မှတ်တမ်း ဓာတ်ပုံများ၊ တပ်မတော်(လေ) ၏ မူးယစ်ဆေးဝါး နှိမ်နင်းရေးတွင် ပါဝင် ဆောင်ရွက်မှု မှတ်တမ်း ဓာတ်ပုံများ၊ လေသူရဲ မွေးထုတ်ပုံ အဆင့်ဆင့် မှတ်တမ်း ဓာတ်ပုံများ၊ မာနယ်ပလော တိုက်ပွဲမှတ်တမ်း ပန်းချီကား၊ ဝမ်ပန်ဆန်း လေကြောင်း တိုက်ပွဲမှတ်တမ်း ပန်းချီကား၊ လေသူရဲ အသုံး အဆောင် ပစ္စည်းများ၊ မြန်မာနိုင်ငံ၏ ပထမဆုံး Supersonic တိုက်လေယာဉ် လေသူရဲများ၏ မှတ်တမ်း ဓာတ်ပုံများ၊ စီစီဝမ်-တာပန် တိုက်ပွဲ မှတ်တမ်းဓာတ်ပုံ အစရှိသည့် တပ်မတော် (လေ)၏ ခေတ် အဆက်ဆက် မှတ်တမ်းများ ပြသထားရှိမှု များကို လေ့လာခဲ့ ရသည်။
တပ်မတော် စစ်သမိုင်းပြတိုက် (နေပြည်တော်) ကို အပတ်စဉ် တနင်္လာနေ့နှင့် နေ့ထူးနေ့မြတ် ရုံးပိတ်ရက် များမှအပ အင်္ဂါနေ့မှ တနင်္ဂနွေနေ့ထိ အခမဲ့ လေ့လာ နိုင်ကြောင်း သိရသည်။ တပ်မတော်သည် အမိ နိုင်ငံတော်ကို ကာကွယ် စောင့်ရှောက် သည့် သမိုင်းအစဉ် အလာကြီးမား ခဲ့သည်ကို တပ်မတော် စစ်သမိုင်းပြတိုက် သို့ ကိုယ်တိုင် လေ့လာသူတိုင်း သိရှိနိုင်မည် ဖြစ်သည်။ တန်ဖိုးမဖြတ် နိုင်သည့်ဗဟုသုတ များလည်း ရရှိကြမည် ဖြစ်သည်။
စစ်သမိုင်းပြတိုက် တွင် တွေ့ရသော ပြကွက်များက နိုင်ငံတော်သမိုင်း နှင့် တပ်မတော်သမိုင်း ခွဲ၍မရကြောင်း ပီပြင်စွာ တွေ့ရသည်။ ထို့ကြောင့် စစ်သမိုင်းပြတိုက် မှအပြန်တွင် ဆရာဇော်ဂျီ ရေးစပ်ခဲ့သည့် အိုတက်လူတို့ ကဗျာ၌ ဖော်ပြထားသော ''အဟောင်းပျက် လျှင်၊ အသစ်ပြင်လော့၊ အမြင်ကျယ်၍၊ ပညာ မွေ့လော့၊ ယနေ့လူငယ်၊ နောင်ဝယ်လူကြီး၊ သင်လည်း တစ်ဦး၊ သားထူးသားမြတ်၊ ဖြစ်အပ်ရာသည်၊ ရှေ့သို့ရန်ရည်၍'' ဆိုသောအပိုဒ် ကို ခေတ်လူငယ် များသို့ ထပ်ဆင့် နှိုးဆော် လိုက်ရပါသည်။
မြ၀တီနေ့စဉ် ၊ စာ(၁၆)
.jpg)
No comments:
Post a Comment