ရန်ကုန် ၊ ၂၇-၈-၂၀၁၅
မြန်မာနိုင်ငံ အပါအဝင် မဲခေါင်ဒေသခွဲ နိုင်ငံများအတွက် မီးခိုးမြူငွေ့ ဆိုင်ရာ ပြဿနာ၊ တရားမဝင် သစ်ခိုးထုတ်ခြင်း နှင့် တောရိုင်း တိရစ္ဆာန်များ ရောင်းဝယ် ဖောက်ကားခြင်း တို့သည် စိန်ခေါ်မှုများ ဖြစ်လာကြောင်း သဘာဝ ပတ်ဝန်းကျင် ထိန်းသိမ်းရေး ဆိုင်ရာ ပညာရှင် များနှင့် လေ့လာသူ များက ပြောသည်။
အဆိုပါ စိန်ခေါ်မှုများကို ဒေသအဆင့်၊ ဒေသခွဲဆိုင်ရာ အဆင့် သတ်မှတ်ကာ ပူးပေါင်း ဆောင်ရွက်ခြင်း ဆိုင်ရာ နည်းလမ်း တစ်ရပ်နှင့် ဖြေရှင်း ဆောင်ရွက်သွားရန် ရှိကြောင်း ပတ်ဝန်းကျင် ထိန်းသိမ်းရေး နှင့် သစ်တောရေးရာ ဝန်ကြီးဌာန မှ သိရသည်။
မြန်မာနိုင်ငံ အနေဖြင့် တခြား ဒေသတွင်း နိုင်ငံများ ကဲ့သို့ပင် သစ်တော ပြုန်းတီးခြင်း၊ တောမီး လောင်ကျွမ်းခြင်း၊ မြေထု အရည်အသွေး ကျဆင်းခြင်း၊ စွန့်ပစ်ပစ္စည်း အစိုင်အခဲများ စုပုံခြင်း၊ လေထု ညစ်ညမ်းခြင်း နှင့် ရေထု ညစ်ညမ်းခြင်း စသည့် ပတ်ဝန်းကျင် ဆိုင်ရာ စိန်ခေါ်မှုများ ကြုံတွေ့ နေရပြီး တောမီး လောင်ကျွမ်းခြင်း၊ တောင်ယာ ချဲ့ထွင် စိုက်ပျိုးရန် အတွက် တောမီးရှို့ခြင်း နှင့် တခြားသော မတော်တဆ မီးလောင်ကျွမ်းခြင်း စသည် တို့ကြောင့် တခြားသော နိုင်ငံများ ကဲ့သို့ မီးခိုးမြူငွေ့ ဖြစ်ပေါ် နေကြောင်း အဆိုပါ လေ့လာသူ များက ပြောသည်။ လတ်တလော တွင် မြန်မာနိုင်ငံ အပါအဝင် အာဆီယံ မဲခေါင်ဒေသခွဲ နိုင်ငံများ ဖြစ်သည့် ထိုင်း၊ ကမ္ဘောဒီးယား၊ ဗီယက်နမ်နှင့် လာအိုနိုင်ငံ တို့တွင် နယ်စပ်ဖြတ်ကျော် မီးခိုးမြူငွေ့ ဆိုင်ရာ ညစ်ညမ်းမှု သည် သိသာစွာ ဖြစ်ပေါ် လာကြောင်း ပတ်ဝန်းကျင် ထိန်းသိမ်းရေး နှင့် သစ်တောရေးရာ ဝန်ကြီးဌာန မှ သိရသည်။
ထို့ကြောင့် တောမီး လောင်ကျွမ်းမှုများ လျှော့ချနိုင်ရေး အတွက် မြန်မာနိုင်ငံ အပါအဝင် အဖွဲ့ဝင်နိုင်ငံများ အနေဖြင့် အစီအစဉ် ရေးဆွဲ ဆောင်ရွက် သွားမည် ဖြစ်ကြောင်း သိရသည်။
မြန်မာနိုင်ငံ၌ ယမန်နှစ် အတွင်းက တောမီး လောင်ကျွမ်းမှု ၄ဝဝဝဝ နီးပါး ဖြစ်ပေါ်ခဲ့ သော်လည်း တခြား အိမ်နီးချင်း နိုင်ငံများကဲ့သို့ မီးခိုးမြူငွေ့ ပြဿနာကို စိုးရိမ်ဖွယ် မရှိသေးကြောင်း ပတ်ဝန်းကျင် ထိန်းသိမ်းရေး နှင့် သစ်တောရေးရာ ဝန်ကြီးဌာနမှ သိရသည်။ အာဆီယံ မဲခေါင်ဒေသခွဲ နိုင်ငံများအတွင်း ယခုနှစ် ဇန်နဝါရီလ မှ ဇူလိုင်လအထိ တောမီး လောင်ကျွမ်းမှု အကွက်ပေါင်း ၇၆ဝဝဝ ရှိခဲ့ပြီး မြန်မာနိုင်ငံ တွင် ၂ဝ၁၄ ခုနှစ်က တောမီး လောင်ကျွမ်းမှု အကွက်ပေါင်း ၃၉ဝဝဝ အထိ ရှိခဲ့ကြောင်း သိရသည်။ (၄၄၃)
မြ၀တီနေ့စဉ် ၊ စာ(၄)
#Themyawadydaily
.jpg)
No comments:
Post a Comment