ကလေးရေယုန်နာ

ကလေးရေယုန်နာ

ဒေါက်တာ လွင်သန့် (ဆေး-၂)

ကလေးရေယုန် ရောဂါသည် ဗိုင်းရပ်စ်ပိုး ကြောင့် နှာခေါင်းနှင့် နှုတ်ခမ်း ဝန်းကျင် တစ်ဝိုက် ပေါက်လေ့ ရှိသည့် အရည်ကြည်ဖု လေးများ ဖြစ်သည်။

ရေယုန်သည် မျက်နှာနှင့် နေရာ အနှံ့အပြား ပေါက်တတ်သည်။ အနာခြောက်ပြီး ကွာမကျ သွားမီ အရည်ကြည်ဖု များ ပေါက်ထွက်ကာ အရည် တစိုစို ရှိတတ်သည်။ ကလေးများနှင့် လူကြီး အချို့၏ အာရုံကြော အဆုံး နေရာတွင် တွေ့ရလေ့ ရှိသည်။ ရေယုန်ရောဂါ ဖြစ်ဖြစ်ချင်းတွင် အရည်ကြည်ဖု ပေါက်လာသည်။ ၁ဝ ရက်မှ ၁၄ ရက်အထိ ကြာသည်။ နှာခေါင်းနှင့် နှုတ်ခမ်း တစ်ဝိုက်တွင် နီရဲ၍ ရောင်ရမ်းစပြု လာပြီး အသားတင်းကာ ယားယံလာမည်။ ထို့နောက် အရည်ကြည်ဖု များပေါက်ပြီး အရည်ကြည် ထွက်လာကာ စိုရွှဲရာမှ တဖြည်းဖြည်း အနာဖတ်များ ဖုံးအုပ်ကာ ခြောက်သွေ့ လာလိမ့်မည်။

မျက်စိ အနီးတစ်ဝိုက် တွင် ရေယုန် ပေါက်ပါက မျက်လုံးထဲသို့ ရောဂါပိုး ရောက်ရှိပြီး မျက်လုံးအတွင်း မျက်ကြည်လွှာ အနာဖြစ် တတ်ကာ စိုနေ တတ်သည်။ အရည်ကြည် ဖုများကို လက်ဖြင့် မကိုင်ရပါ။ ကလေး၏ လက်ကို ဆပ်ပြာဖြင့် ဆေးကြော သင့်သည်။ အနာ ခြောက်သွေ့ စေရန် အရက်ပြန် ဆွတ်ပေးခြင်း သို့မဟုတ် အနာဖုများ တင်းပြီး နာကျင်ခြင်း အန္တရာယ်မှ ကာကွယ် ပေးခြင်း၊ အစိုဓာတ် ထိန်းသိမ်း၍ ကလေးနှင့် အဆင်ပြေမည့် (ဓာတ်တည့်သည့်) ဆေး တစ်မျိုးမျိုး လိမ်းပေးခြင်း စသည့် နည်းလမ်းကို ရွေးချယ် ဆောင်ရွက် ပေးသင့်သည်။ ရေယုန် မျက်စိနား ကပ်ပြီး ပေါက်ပါက ဆရာဝန်နှင့် ပြသရမည်။ ရေယုန်အနာ နီရဲပြီး ပြည်တည် လာပါက ဗက်တီးရီးယားပိုး ဝင်ရောက်ခြင်း ဖြစ်သဖြင့် ဆရာဝန်နှင့် ပြသရန် လိုသည်။

ဆရာဝန်က ရေယုန်ရောဂါ ဖုများ (သို့) ဗက်တီးရီးယား ထပ်မံမဝင် ရောက်စေရန် ပိုးသတ် ပဋိဇီဝဆေး လိမ်းခြင်းနှင့် အနာရေစို ဓာတ်မပြတ် စေဘဲ ပိုးကိုသေအောင် ဆေးကုရမည်။ ဆရာဝန်က ဗိုင်းရပ်စ်ပိုး သေစေသည့် လိမ်းဆေး လိမ်းရန် ညွှန်ကြား လိမ့်မည်။ ထပ်ခါ ထပ်ခါ ရေယုန်ပေါက်သည့် ကလေးအတွက် ဗိုင်းရပ်စ်ပိုး သတ်ဆေး သောက်ခိုင်း ရမည်။

ကလေးအတွက် မျက်နှာသုတ် ပဝါနှင့် မျက်နှာသုတ် တို့ဖတ် (အနာသား နံရည်သုတ် အဝတ်စ) သီးသန့် ထားပေးရမည်။ ကလေး ရေယုန်ပေါက် နေစဉ် အခြားသူများ နမ်းရှုပ်ခြင်း မလုပ်သင့်ပါ။ ရောဂါကူးစက် နိုင်သည်။ ရေယုန် ပေါက်ဖူးသည့် ကလေးကို နောက် တစ်ကြိမ် နေပူထဲ ထွက်ကစား စေခြင်း ရှောင်ကြဉ် စေရမည်။ ခရမ်းလွန် ရောင်ခြည်မှ ကာကွယ်ပေး နိုင်သည့် လိမ်းဆေး တစ်မျိုးမျိုး ကို နှာခေါင်းနှင့် နှုတ်ခမ်းတစ်ဝိုက် လိမ်းပေးရန် လိုအပ်သည်။

အထူး သတိရှိရန်မှာ ခရမ်းလွန် ရောင်ခြည်ဒဏ်မှ ကာကွယ်ရန် နေပူထဲ ထွက်လျှင် ဦးထုပ်၊ ထီး ဆောင်းသွား သင့်သည်။ နေရောင်ခံ လိမ်းဆေး သို့မဟုတ် သနပ်ခါး လိမ်း၍ အပူမစုပ် နိုင်သည့် အဝတ်ပွပွ ဝတ်ပေးသင့် သည်။ ကလေးများကို အရိပ်ထဲတွင် ဆော့ကစား ရန်နှင့် အခြားကူးစက် သူများနှင့် ရောနှော မကစားစေရန် ဂရုပြုသင့် ပါသည်။

#Themyawadydaily

#မြ၀တီနေ့စဉ်