မန္တလေး ၊ ၃၀-၁၁-၂၀၁၄
မန္တလေးတိုင်း ဒေသကြီး အမရပူရ မြို့နယ်ရှိ ကမ္ဘာလှည့် ခရီးသွား ဧည့်သည်များ စိတ်ဝင်တစား လာရောက် လေ့လာမှု များပြားသော တောင်သမန်အင်း အတွင်း ရေထု ညစ်ညမ်းမှုကြောင့် ရေချိုငါးမျိုးစိတ်များ လျော့နည်း လာကြောင်း ရတနာပုံ တက္ကသိုလ် သတ္တဗေဒ ဌာနမှ တောင်သမန်အင်း လေ့လာမှု ပြုလုပ်နေသော ပါမောက္ခ တစ်ဦး၏ ပြောကြားချက် အရ သိရသည်။
အဆိုပါ တောင်တမန်အင်း အတွင်းသို့ အဓိက ရေစီးဝင်နေသည့် ပရံတော်ချောင်း အတွင်း၌ စက်ရုံများမှ စွန့်ပစ်သော ရေဆိုး ရေညစ်များ၊ အင်းအတွင်း အမှိုက် စွန့်ပစ်မှုများ နှင့် ငါးရှော့ခ်တိုက် ဖမ်းဆီးခြင်း များကြောင့် ရေထု ညစ်ညမ်းမှုများ ရှိလာပြီး သဘာဝ ရေချိုငါးများ လျော့နည်း လာခြင်း ဖြစ်ကြောင်း၊ ထို့အပြင် တောင်သမန်အင်း အတွင်း ရေမျောကောင် များလည်း လျော့နည်း လာသောကြောင့် ၄င်းတို့ကို ကြည့်ခြင်း အားဖြင့် ရေထု သန့်ရှင်းမှု မရှိသည်ကို ပြသနေကြောင်း သိရသည်။
ယင်း တောင်သမန်အင်း အား ထိန်းသိမ်းခြင်း လုပ်ငန်းများကို လုပ်ဆောင် နေသော်လည်း တစ်ဖက်တွင် ယင်းကဲ့သို့ ဖြစ်စဉ်များ ရှိနေရာ ထိရောက်သော အရေးယူမှု များနှင့် လိုအပ်သော အခြေအနေ တစ်ရပ်ကို လေ့လာစုံစမ်း နိုင်ရန် စီစဉ်ထားရှိမှု လိုအပ်ကြောင်း၊ အလားတူ ကမ္ဘာလှည့် ခရီးသွား ဧည့်သည်များ လာရောက်မှု များပြားသော တောင်သမန်အင်း အတွင်း အမှိုက် မစွန့်ပစ်ရန် သဘာဝ ပတ်ဝန်းကျင် ထိန်းသိမ်း စောင့်ရှောက်ရေး လုပ်ငန်း လုပ်ကိုင်သူများက အကြံပြု ထားကြောင်း သိရသည်။
ရတနာပုံ တက္ကသိုလ် သတ္တဗေဒဌာန မှ လေ့လာမှုများ အရ တောင်သမန်အင်း အတွင်းရှိ သဘာဝ ရေချိုငါးမျိုးစိတ် များမှာ ၂ဝ၁၃ ခုနှစ်တွင် မျိုးစိတ်ပေါင်း ၄၉ မျိုးရှိခဲ့ရာမှ ယခုနှစ်တွင် သဘာဝရေချို ငါးမျိုးစိတ်ပေါင်း ၂ဝ ခန့်သာ ကျန်ရှိတော့ကြောင်း၊ လက်ရှိတွင် တောင်သမန်အင်း အတွင်း ယခု လဆန်းပိုင်း မှစတင်ပြီး ဆောင်းခိုငှက်များ ရောက်ရှိ လာကြောင်း၊ ယခု အချိန်တွင် တောင်သမန်အင်း အတွင်း ရေလျော့ကျခြင်း မရှိသေးသော ကြောင့် ဆောင်းခိုငှက် အနည်းငယ်သာ လာရောက်ကြပြီး ပုံမှန်အားဖြင့် ဒီဇင်ဘာလဆန်း နှင့် လလယ်ပိုင်း များတွင် အများဆုံး လာရောက် ကြကြောင်း သိရသည်။
#Themyawadydaily
#မြ၀တီနေ့စဉ်
.jpg)
No comments:
Post a Comment