မာကျူရီဒြပ်ပေါင်းများ အလွန်အကျွံ ပါဝင်နေသည့် အလှကုန်ပစ္စည်း များကြောင့် လူတို့ ကျန်းမာရေးကို ထိခိုက်စေနိုင်

မုံရွာ ၊ ၁၄-၁၀-၂၀၁၄

အလှကုန် ပစ္စည်း အချို့သည် လူသားများ၏ တစ်ကိုယ်ရည် သန့်ရှင်းရေး ကိစ္စများကို အထောက်ကူပြု ပေးစေနိုင် သကဲ့သို့ အချို့သော အလှကုန် ပစ္စည်းများမှာ မာကျူရီ ဒြပ်ပေါင်း ပါဝင်မှု အလွန်များပြီး လူတို့၏ ကျန်းမာရေး ကို ဆိုးရွားစွာ ထိခိုက် စေနိုင်ကြောင်း ကျန်းမာရေး အထောက်အကူပြု သုတေသီ များ၏ လေ့လာ ဆန်းစစ်ချက် များအရ သိရသည်။

လွန်ခဲ့သော ရက်အနည်းငယ် ခန့်က စစ်ကိုင်းတိုင်း ဒေသကြီး၊ မုံရွာမြို့ပေါ်ရှိ အလှကုန် ပစ္စည်းများ ဖြန့်ဖြူး ရောင်းချလျက် ရှိသော လက်ကား ဆိုင်ကြီးသုံးဆိုင်၊ ချင်းတွင်း ရတနာဈေး မှ သုံးဆိုင်၊ သီရိမင်္ဂလာဈေး မှ နှစ်ဆိုင်၊ အောင်ချမ်းသာဈေး မှ တစ်ဆိုင်၊ မြသလ္လာဈေး မှ ငါးဆိုင်၊ သာစည်ဈေး မှ တစ်ဆိုင် တို့တွင် ဈေးကွက်တင် ရောင်းချလျက် ရှိသော အလှကုန် ပစ္စည်းများ ကို ဝယ်ယူထုပ်ပိုး ပြီးနောက် ကုတ်နံပါတ် အမှတ်အသားများ ရေးထိုး၍ သတ္တု ဒြပ်စင်များ တိုင်းတာသည့် ( Automic Absorption Sepetrophtometer ) ကိရိယာဖြင့် တိုင်းတာ စမ်းသပ် စစ်ဆေး ခဲ့ကြောင်း သိရသည်။

ထိုသို့ စမ်းသပ် စစ်ဆေးရာတွင် အလှကုန် ပစ္စည်း အမျိုးအစား (၉)ခု၊ နမူနာ (၁၁) ခု တို့ကို စစ်ဆေး စမ်းသပ်ကြည့်ရာ အမျိုးအစား (၅) မျိုးမှ နမူနာ(၇) ခုတွင် မာကျူရီ ဒြပ်ပေါင်း လွန်ကဲစွာ ပါဝင် နေသည်ကို တွေ့ရှိ ခဲ့သည်ဟု ဆိုသည်။ ထို အလှကုန် ပစ္စည်းများတွင် စမ်းသပ် တွေ့ရှိရသော မာကျူရီ ဒြပ်ပေါင်း ပါဝင်မှု ပမာဏသည် ၁၂ ဒသမ ၉ ppm မှ ၂၃၁၄ ဒသမ ၉ ppm ထိ ဖြစ်သောကြောင့် ကမ္ဘာ့ အသိအမှတ်ပြု အမေရိကန် ပြည်ထောင်စု အစားအသောက် နှင့် ဆေးဝါး ကွပ်ကဲရေး အဖွဲ့က သတ်မှတ် ပြဋ္ဌာန်းထားသည့် မာကျူရီ ဒြပ်ပေါင်း ပါဝင်မှု ပမာဏ ( 1 ppm ) ထက် ကျော်လွန်၍ များပြားစွာ ပါဝင်လျက် ရှိသည်။

ထို့ကြောင့် ကျန်းမာရေး အထောက် အကူပြု သုတေသီ များက အလှကုန် ပစ္စည်းများနှင့် လူ၏ ကျန်းမာရေး စာတမ်းများ ပြုစုကာ အများပြည်သူ သိရှိနိုင်စေရန် ကျယ်ကျယ် ပြန့်ပြန့် ဆက်လက် လုပ်ဆောင် ပေးသွားမည် ဖြစ်သည်။

''မာကျူရီ ဒြပ်ပေါင်း ပါဝင်မှု အလွန် များပြားတဲ့ အလှကုန် ပစ္စည်းတွေကို ရေရှည် ဝယ်ယူ သုံးစွဲမယ် ဆိုရင် ဦးနှောက်နဲ့ အာရုံကြော ရောဂါ၊ အစာအိမ် နဲ့ အူလမ်းကြောင်း ရောဂါအပြင် ဆီးလမ်းကြောင်း နဲ့ ကျောက်ကပ် ရောဂါ တွေကို ရရှိစေ နိုင် ပါတယ် ... ''ဟု မြန်မာနိုင်ငံ ဆေးဝါး သုတေသန ဦးစီးဌာန၊ ဓာတုအဆိပ် သုတေသန ဌာနခွဲရှိ ဆရာဝန် တစ်ဦး က ပြောပြသည်။

မြန်မာနိုင်ငံတွင် ရှေးယခင် ကတည်းက တစ်ကိုယ်ရည် သန့်ရှင်း စင်ကြယ်စေရန် ဒေသထွက် သနပ်ခါး များကို မိရိုးဖလာ နည်းလမ်းများ အတိုင်း အသုံးပြုခဲ့ ကြသဖြင့် မြန်မာ အမျိုးသမီးငယ် လေးများမှာ အလှ ကုန်ပစ္စည်း များ၏ ဘေးထွက်ဆိုးကျိုး အန္တရာယ်မှ ကင်းဝေးပြီး ကျော့ရှင်း လှပသော မျက်နှာ ပိုင်ရှင်လေးများ ဖြစ်ခဲ့ကြသည်။ အချို့သော နိုင်ငံများတွင် အလှကုန် ပစ္စည်းများ မှားယွင်းစွာ အသုံးပြုခဲ့မှု ကြောင့် မျက်နှာပြင်ရှိ အရေပြား တစ်ခုလုံးတွင် မီးလောင်ထား သကဲ့သို့ ဒဏ်ရာများ ဖြစ်ပေါ် နေရသည်ကို မကြာခဏ မြင်တွေ့ ရကြောင်း သိရသည်။ (၁၅၄)

#Yadanarpondaily

#ရတနာပုံနေ့စဉ်