မန္တလေး ၊ ၂၂-၉-၂၀၁၄
ဘိုးတော် ဗဒုံမင်း လက်ထက် တွင် သံတမန် များစွာ တည်းခိုရန် သံတမန်တဲများ ဆောက်လုပ် ပေးထားပြီး ထို သံတဲများမှာ ရတနာပုံ တက္ကသိုလ် အနီး ကျောက်တော်ကြီး ဘုရား အရှေ့ဘက်၊ ထန်းတောရွာ မြောက်ဘက် မြေနီလမ်း နေရာတွင် ရှိကြောင်း သိရသဖြင့် ရတနာပုံ တက္ကသိုလ် ဝန်းကျင် နေရာသည် ရှေးခေတ်အခါ က စည်ပင်သာယာ ခေတ်မီခဲ့သော နေရာတစ်ခု ဖြစ်ကြောင်း သိရသည်။
အမရပူရခေတ် တွင် တရုတ်သံ၊ ယွန်းကြီးသံ၊ ယိုးဒယားသံ၊ ဗြိတိသျှသံများ ဝင်ရောက်ကြောင်း ဗြိတိသျှ သံအဖွဲ့ဝင် ဟင်နရီယူးလ် ၏ အမရပူရ သံတဲ မြင်ကွင်း မှတ်တမ်းအရ သိရသည်။
ထိုသံတဲ များသည် အလျား ပေ ၈ဝ၊ အနံ ပေ ၈ဝ ခန့် ရှိသော အဆောက်အအုံ ဖြစ်သည်။ စတုရန်းပုံ မြေကွက်အတွင်း ဝါးထရံများဖြင့် ဝန်းခတ် ပေးထားပြီး အရှေ့ အနောက် ဝင်ပေါက် ထွက်ပေါက် များရှိကာ အဆောက်အအုံ ၏ တိုင်၊ ထုပ်၊ လျောက်၊ ရက်မ တို့ကို ကျွန်းသားဖြင့် ပြုလုပ်ကာ အကာနှင့် အခင်းကို ဝါးကြမ်းခင်း၊ ဝါးထရံ ကာ ထားကြောင်း သိရသည်။ စားပွဲ၊ ကုလားထိုင်၊ ပရိဘောဂများ နှင့် မျက်နှာကြက်တွင် ဆွဲယပ်များ တပ်ဆင် ပေးထားပြီး နံရံတွင် တရုတ်မီးအိမ်၊ အိန္ဒိယ မီးအိမ်များ ချိတ်ဆွဲ ထားသည်။ ညဘက်တွင် မှန်အိမ်များ၊ ဖယောင်းတိုင်များ ထွန်းညှိ ထားကြသည်ဟု ဆိုသည်။
ထိုသံတဲ များသည် အမရပူရမြို့ အကြောင်းစာဖြင့် ရေးဖွဲ့ မှတ်တမ်းတင် သကဲ့သို့ နန်းတော်၊ ကျုံးတော်လမ်း၊ အဆောက်အအုံ များကိုပါ ပုံတူ ပန်းချီများဖြင့် မှတ်တမ်းတင် လေ့ ရှိကြောင်း သိရသည်။ အမရပူရခေတ် က နန်းတော် နှင့် တောင်သမန် ကျောက်တော်ကြီး ဘုရား၊ သံတဲများထံ သွားရာ လမ်းလည်း ရှိသည်။ ထိုလမ်းဘေး တွင် ဘကြီးတော်မင်း လက်ထက် သက္ကရာဇ် ၁၁၈၉ နှစ်တွင် မယ်ဘယက် သူကြွယ် တည်ထားသော အမရပူရခေတ် လက်ရာမြောက် ဘုရား တစ်ဆူနှင့် အုတ်ခင်းလမ်း တို့ ရှိသည်။ လက်ရာမြောက် ဘုရားကို မယ်ဘယက် ဘုရားဟု ယခုတိုင် ခေါ်တွင်ပြီး မယ်ဘယက် အုတ်လမ်းမှာ ယခုအခါ ရတနာပုံ တက္ကသိုလ် အဝင် တောင်- မြောက် ကျောက်လမ်း အဖြစ် ဖြစ်သွားသည်။ သို့အတွက် မယ်ဘယက် ဘုရား (ပုံ) နှင့် မယ်ဘယက် အုတ်လမ်းတို့ ရှိသည့် ရတနာပုံ တက္ကသိုလ် ဝန်းကျင်နေရာ သည် သမိုင်းဝင် ဖွံ့ဖြိုးခဲ့သော နေရာဟောင်း ဖြစ်ခဲ့ကြောင်း သိရသည်။ (၁၅၉)
#Yadanarpondaily
.jpg)
No comments:
Post a Comment