www.themyawadydaily.blogspot.com . . . www.facebook.com/themyawadydaily . . . https://twitter.com/Themyawadydaily

Thursday, January 5, 2017

ထရမ့်လက်ထက် အမေရိကန် နှင့် အစ္စရေးဆက်ဆံရေး ဘယ်လိုဖြစ်လာနိုင်သလဲ



( ရှိန်းထက် )

ဇန်နဝါရီ ၂ဝ ရက်သည် အမေရိကန်သမ္မတ အိုဘားမား အိမ်ဖြူတော်က ထွက်ခွာရမည့်နေ့ ဖြစ်သည်။ သူ့ နေရာတွင် အစားထိုး ၀င်ရောက်လာမည့် သူက လူတိုင်းသိပြီး ဖြစ်ကြသည့် ပွင့်ပွင့်လင်းလင်း ပြောတတ်သည့် ဒေါ်နယ်ထရမ့်ပ် ဖြစ်သည်။

ဒေါ်နယ်ထရမ့်ပ် တက်မလာမီ အိုဘားမား က ချိန်ကိုက်ဗုံး ထောင်ထားခဲ့ သလားဟု ဆိုနိုင်သည်။ ထရမ့်ပ်အတွက် ဘေးကျပ်နံကျပ် ဖြစ်စေမည့် ဆုံးဖြတ်ချက်မျိုး ချရမည့် ပြဿနာများကို ထားသွားသည်။

ရုရှားနှင့် ဆက်ဆံရေးကို ထိခိုက်စေနိုင်သည့် ရုရှားသံတမန် များအား အမေရိကန် နိုင်ငံတွင်းမှ နှင်ထုတ်ခဲ့သည်။ အမှန်စင်စစ် ထိုကိစ္စသည် ထရမ့်ပ်လက်ထက် ရောက်မှ ဆုံးဖြတ်ချက် ချရမည့် နိုင်ငံတော်၏ ထိပ်တန်းပြဿနာ  ဖြစ်သည်။ သို့သော် အိုဘားမားက သူလုပ်ချင်တာကို လုပ်ပြီး သမ္မတ ရာထူးက ဆင်းလိုက်သည်နှင့် ထိုအရာများ အားလုံးမှာ သူနှင့် မသက်ဆိုင်ဘဲ ဖြစ်သွားတော့မည်။ အရာအားလုံးကို နောက်တက်လာမည့် ထရမ့်ပ် က ရှင်းရမည် ဖြစ်သည်။

ထို့နောက် မဟာမိတ် အရင်းချာကြီး အစ္စရေးကိစ္စ ဖြစ်သည်။ အိုဘားမား လက်ထက် သမ္မတသက်တမ်း နှစ်ဆက်စလုံးတွင် အစ္စရေး ကို အကြီးမားဆုံး ထောက်ခံမှုများနှင့် အစ္စရေး ဘာလုပ်လုပ် ထောက်ခံပေးသည်။ ကုလသမဂ္ဂ၏ ဆုံးဖြတ်ချက် ကိစ္စအဝဝတွင် လည်း အမေရိကန်တို့ ဗီတိုအာဏာ သုံး၍ အစ္စရေးကို ကာကွယ်ပေးသည်။ ယခုတော့ ပုံစံတစ်မျိုး ပြောင်းလဲသွား ခဲ့ပြီဖြစ်သည်။ အိုဘားမား သမ္မတရာထူးက ဆင်းခါနီး ရက်ပိုင်း အလိုမှာပင် အစ္စရေးနှင့် ထရမ့်ပ်ကို ရန်တိုက်ပေး သွားသည့် အလားပင်။ အနောက်ဘက် ကမ်းတွင် အစ္စရေးတို့ အိမ်ရာများ ဆောက်လုပ်နေသည့် ကိစ္စကို ကုလသမဂ္ဂ လုံခြုံရေးကောင်စီ တွင် အဖွဲ့ဝင် ၁၅ နိုင်ငံက မဲခွဲဆုံးဖြတ်ခဲ့ ကြသည်။ 

၁၄ နိုင်ငံစလုံးက အစ္စရေးတို့ ဥပဒေချိုးဖောက် နေသည်ဟု ထောက်ခံပြီး အမေရိကန် အစိုးရက ဗီတိုအာဏာနှင့် မကယ်တော့ဘဲ ကြားနေမဲသာ ပေးခဲ့သည်။

ထို့ကြောင့် အစ္စရေးအပေါ်သို့ ကုလသမဂ္ဂက ချမှတ်သည့် အာဏာစက်မှာ အသက်ဝင်မှု ရှိမည်ဖြစ်သည်။ လုံခြုံရေး ကောင်စီက ချမှတ်သည့် ဥပဒေထဲတွင် ယခု အနောက်ဘက်ကမ်း ၌ အစ္စရေးတို့ ဆောက်လုပ်နေသည့် အိမ်ရာ စီမံကိန်းများကို ချက်ချင်း ရပ်တန့်ရမည့် ဥပဒေလည်း ပါဝင်သည်။ သို့သော် အစ္စရေးကတော့ မရပ်တန့်သည့် အပြင် ဆောက်လုပ်ရေး လုပ်ငန်းများကို ပို၍ပင် တိုးမြှင့်ဆောက်လုပ် နေသည်။ အစ္စရေး ဝန်ကြီးချုပ် နေတန်ရာဟု ကတော့ သူ့ကိုကြားနေမဲ ပေးခဲ့သည့် အမေရိကန်အစိုးရကို ဒေါသထွက် နေသည်။ အကယ်၍ ယခင်အတိုင်းသာ အမေရိကန် တို့က အစ္စရေး အပေါ်တွင် လုံခြုံရေး ကောင်စီ၏ ဆုံးဖြတ်ချက်ကို ကန့်ကွက်မဲ ပေးပါက အစ္စရေးအပေါ် သို့ ကုလသမဂ္ဂ ဆုံးဖြတ်ချက် ဥပဒေ ဖြစ်ပေါ်လာမည် မဟုတ်ပေ။ ယခုကဲ့သို့လည်း အသက်ဝင် လာမည် မဟုတ်ပေ။

အစ္စရေးတို့သည် ၁၉၆၇ ခုနှစ်က ပါလက်စတိုင်းနှင့် ခြောက်ရက်ကြာ စစ်ပွဲဆင်နွှဲ ပြီးနောက် အဆိုပါ အနောက်ဘက်ကမ်း နေရာကို ရရှိခဲ့ခြင်း ဖြစ်သည်။ ထို့နောက် သိမ်းယူထားသော နေရာကို တည်တံ့စေရန် အိမ်ရာစီမံကိန်းများ အကောင်အထည် ဖော်ခဲ့သည်။ အိမ်ရာပေါင်း ထောင်သောင်းချီ ဆောက်လုပ်မည့် စီမံကိန်းသည် အစ္စရေး လူမျိုးများ နောက်ထပ် အခြေချနိုင်မည့် အရေးပါသည့် နေရာသစ်တစ်ခု ဖြစ်လာမည် ဖြစ်သည်။

ယခုတော့ အစ္စရေးတို့ မဟာဗျူဟာ စီမံကိန်းကြီးကို အမေရိကန်က ကြားနေမဲ တစ်မဲကြောင့် ကုလသမဂ္ဂက ရပ်တန့်ခိုင်း တော့မည် ဖြစ်သည်။ အစ္စရေးသည် အာရပ်ကမ္ဘာ ထဲတွင်နေပြီး သန်းထောင်ချီ ရှိသော အာရပ်
လူမျိုးများ၏ ရန်သူတော်အဖြစ် ၁၉၄၈ ခုနှစ် လွတ်လပ်ရေး ကြေညာပြီး ကတည်းက ဆယ်စုနှစ်နှင့် ချီကာ ရပ်တည်လာခြင်း ဖြစ်သည်။ လူဦးရေ ရှစ်သန်းခန့်သာ ရှိနေသော အစ္စရေးကိုလည်း အာရပ်ကမ္ဘာ က မထိရဲအောင် လက်စွမ်းပြ ထားသူလည်း ဖြစ်သည်။

အီရန်ကဲ့သို့ အရှေ့အလယ်ပိုင်း အင်အား အကြီးဆုံးနိုင်ငံ တစ်နိုင်ငံကိုပင် ဝင်ချင်သလိုဝင် ထွက်ချင်သလို ထွက်ကာ သူက အရင်ဦးအောင် ဗုံးကြဲထားသူ ဖြစ်သည်။ အိမ်နီးချင်း ပါလက်စတိုင်း နှင့်လည်း မကြာခဏ စစ်ပွဲများဖြစ်ပွားပြီး ၂ဝ၁၄ ခုနှစ်က ဆိုလျှင်ရက် ၅ဝ ကြာ စစ်ပွဲကို ဆင်နွှဲထားသူ ဖြစ်သည်။ ပါလက်စတိုင်းကို ဆိုလျှင် ငယ်နိုင်ဖြစ် နေသည့် အစ္စရေးသည် သူ့နိုင်ငံကို ဒုံးကျည် တစ်စင်းလောက်ကျလျှင် ၁ဝ စင်းလောက် ပြန်လည် ပစ်ခတ်သူဖြစ်သည်။ ၂ဝ၁၄ ခုနှစ် က သူ့နိုင်ငံထဲသို့ ဒုံးကျည်သုံး၊ လေးစင်း ကျလာသဖြင့် ဂါဇာကို လေကြောင်းကမှ ဗုံးအတွဲလိုက် မိုးရွာသလို ပြန်လည်ပစ် ခဲ့သည်။ ထိုကြားထဲ လက်ဘနွန်နှင့်လည်း စစ်ပွဲများက မကြာခဏ ဖြစ်လျက်ရှိသည်။

အမေရိကန် ကလည်း အာရပ်ကမ္ဘာ ၌ လက်မထောင်ပြီး နေနိုင်စေရန် အစ္စရေးကို သူတို့ နောက်ဆုံးပေါ် မှန်သမျှ ထောက်ပံ့ပေးသည်။ ယခုပင် အစ္စရေးကို သူတို့၏ Stealth Fighter F-35 ကို ကမ္ဘာ့ ပထမဆုံး အနေဖြင့် အစ္စရေးစစ်တပ်ကို ရောင်းခဲ့သည်။ F-35  တစ်စီးသည် အမေရိကန်ဒေါ်လာ သန်းရာချီ တန်ကြေးရှိသည်။ အစ္စရေးစစ်တပ်က အမေရိကန် ဒေါ်လာ ၅ ဘီလီယံ အသုံးပြုပြီး သူ့လေတပ်က F-16F များနေရာတွင် အစားထိုးရန် စီစဉ်ထားသည်။

သို့သော်လည်း ယခုတော့ အပြန်အလှန် ဝေဖန်မှုများနှင့် အစ္စရေး အမေရိကန် ဆက်ဆံရေးသည် အဖုအထစ်များ ရှိလာနေသည်။ အမေရိကန်က အစ္စရေးတို့ အနေဖြင့် ပါလက်စတိုင်းနှင့် ငြိမ်းချမ်းရေး ဆွေးနွေးပွဲများကို ထိခိုက်အောင် ဆောက်လုပ်ရေး လုပ်ငန်းများကို ဆက်လက် လုပ်ဆောင် နေသည်ဟု ဆိုသည်။ အစ္စရေးအစိုးရ ကလည်း ကြားနေမဲ ပေးသည့် နောက်တွင် အိုဘားမား အစိုးရရှိ နေသည်ဟု ဝေဖန်သည်။

ယခု အစ္စရေးဝန်ကြီးချုပ် နေတန်ယာဟု ကလည်း လာဘ်စားသည့် ပြဿနာများနှင့် အစ္စရေး ရှေ့နေချုပ်၏ တိုက်ရိုက် အမိန့်ဖြင့် အစစ်ဆေးခံ နေရသည်။ ကုလသမဂ္ဂက လည်း သူ့ကို ဆောက်လုပ်ရေး လုပ်ငန်းများ နှင့်ပတ်သက်ပြီး ဖိအားပေး နေပြန်သည်။ ပါလက်စတိုင်း ငြိမ်းချမ်းရေး ဆွေးနွေးမှုက ထင်သလောက် တိုးတက်မှုမရှိ။ ထို့ကြောင့် နေတန်ရာဟု အတွက် ဖိအားများ ရှိလာနေသည့် အချိန်ဖြစ်သည်။ ထိုကဲ့သို့ ဖိအားများနေသည့် အချိန် သူ၏ မဟာမိတ်ကြီးက သူ့ကို အကာအကွယ် မပေးတော့သော အခါ ဝန်ကြီးချုပ် နေတန်ယာဟု အနေဖြင့် အမေရိကန်ကို ဒေါသထွက်ရ တော့သည်။ သို့သော်လည်း အစ္စရေးက အာရပ်ကမ္ဘာ့ တွင် လက်မထောင် နေနိုင်ခြင်းသည် နောက်က အမေရိကန်ကြောင့် ဟု ဆိုနိုင်သော်လည်း ထို့ထက် အဓိကကျသည့် အချက်တစ်ချက်လည်း ရှိနေသေးသည်။ အစ္စရေးသည် နျူကလီးယား လက်နက် ပိုင်ဆိုင်သည်ဟု မကြေညာ ထားဘဲ ပိုင်ဆိုင်သည့် နိုင်ငံတစ်နိုင်ငံ ဖြစ်နေသောကြောင့် ဖြစ်သည်။ ၁၉၆ဝ ပြည့်နှစ်များ နောက်ပိုင်းတွင် နျူကလီးယား လက်နက် စမ်းသပ် အောင်မြင်ခဲ့သည့် အစ္စရေးသည် ယခုအချိန် ဆိုလျှင် နျူကလီးယား ထိပ်ဖူးပေါင်း ၄ဝဝ အထိ ပိုင်ဆိုင်နိုင်သည် ဟု ခန့်မှန်းထား ကြသည်။

နျူကလီးယား တစ်လုံးမျှ မပိုင်သည့် လူဦးရေ ဘီလီယံချီ ရှိသည့် အာရပ်ကမ္ဘာ ကိုဖြိုရန် အစ္စရေးရှိ လူဦးရေရှစ်သန်း က မစွမ်းဆောင် နိုင်သော်လည်း ကီလိုမီတာ ၁၁၅ဝဝ ရောက်အောင် ပစ်နိုင်သည့် ဒုံးကျည် နှင့် နျူကလီးယား လက်နက် ရာချီရှိခြင်း ကြောင့်တော့ လွယ်လွယ်လေး ဖြိုနိုင်စွမ်း ရှိသည်။ ထိုအချက်မှာ အစ္စရေးကို အာရပ်တို့ နားရွက်တံတွေး သွားမဆွတ်ရဲ သည့် အဓိက အချက် ဖြစ်သည်။

ယခုအခါ ရုရှားကို လုပ်သကဲ့သို့ပင် အိုဘားမားအစိုးရ လုပ်ထားသည့် အရေး ကိစ္စကြောင့်လည်း ထရမ့်ပ် လက်ထက်တွင် ဖြေရှင်းရဦးမည် ဖြစ်သည်။ သို့သော်လည်း ထရမ့်ပ်သည် အာရပ်ကမ္ဘာ ကို မျက်နှာ ကြည့်ချင်သည့် လူမဟုတ် သောကြောင့် အာရပ်ကမ္ဘာ ကို အမြဲတမ်း ဆန့်ကျင်လာသူ အစ္စရေးနှင့် ဆက်ဆံရေးကို မည်သည့်နည်း နှင့်မျှ အပျက်ခံမည် မဟုတ်ကြောင်း တင်ပြလိုက်ရ ပါသည်။

မြ၀တီနေ့စဉ်သတင်းစာ ၊ စာ(၂၄)

No comments:

Post a Comment

Related Posts Plugin for WordPress, Blogger...

တင်ပြီးသမျှ သတင်းများ

 

Follow on Twitter

Networkblog

FB Like page