နယ်စပ်ကုန်သွယ်ရေးနှင့် အမျိုးသားလုံခြုံရေး
မြန်မာနိုင်ငံတွင် ၁၉၈၈ ခုနှစ်က ဖြစ်ပွားခဲ့သော ဆူပူ အကြမ်းဖက်မှု များကြောင့် မင်းမဲ့စရိုက်များ ကြီးစိုးကာ ပြည်သူများ ကျီးလန့်စာစား ဘဝရောက်ခဲ့ရပြီး နိုင်ငံပိုင် ပစ္စည်းများ လုယက်ဖျက်ဆီး ခံရသည်။ ၁၉၈၈ ခုနှစ် စက်တင်ဘာ ၁၈ ရက်တွင် နိုင်ငံတော် အခြေအနေ အရပ်ရပ်ကို တပ်မတော်က ထိန်းသိမ်း တာဝန်ယူလိုက် ရသည်။
အဘက်ဘက်မှ ယိုယွင်းနေသော နိုင်ငံတော်ကို တည်ငြိမ် အေးချမ်းအောင် ဆောင်ရွက်ပြီးနောက် ပြည်သူများအတွက် လိုအပ်သော အခြေခံ ကုန်ပစ္စည်းများ ဖြည့်တင်းပေး နိုင်ရန်ယခင်က ရှိခဲ့သော ပင်လယ် ရေလမ်းကြောင်း ကုန်သွယ်ရေး တစ်ခုတည်း ကိုသာ အားကိုး မရတော့သဖြင့် အိမ်နီးချင်း နိုင်ငံများနှင့် နယ်စပ် ကုန်သွယ်ရေး လုပ်ငန်းများ ဖွင့်လှစ်၍ တရားဝင် ကုန်သွယ်ရေး စနစ် ချမှတ်ဆောင်ရွက် ခဲ့သည်။ နိုင်ငံတော် ငြိမ်ဝပ်ပိပြားမှု တည်ဆောက်ရေး အစိုးရအဖွဲ့သည် မြန်မာ-တရုတ် နယ်စပ်ကုန်သွယ်ရေး အတွက် လားရှိုး၊ မူဆယ်၊ ကြူကုတ်၊ နမ့်ခမ်း၊ ကွမ်းလုံမြို့ တို့၌ ၁၉၈၈ ခုနှစ် ဒီဇင်ဘာ ၂ ရက်တွင် နယ်စပ် ကုန်သွယ်ရေးရုံးများ စတင်ဖွင့်လှစ် လိုက်သည်။ ဖွင့်လှစ်လိုက်သော နယ်စပ် ကုန်သွယ်ရေးရုံး များသည် ပုဂ္ဂလိက လုပ်ငန်းရှင်များ၊ သမဝါယမ အသင်းများ၊ အစိုးရဌာန များနှင့် အသင်းအဖွဲ့ များ၏ ပို့ကုန်သွင်းကုန် လုပ်ငန်းများကို ကြီးကြပ် ဆောင်ရွက် ပေးသည်။
၁၉၉၅ ခုနှစ် သြဂုတ် ၅ ရက်တွင် မြန်မာ-တရုတ် နယ်စပ်မှ မူဆယ်ဒေသ၌ နယ်စပ် ကုန်သွယ်ရေး ညွှန်ကြားရေးမှူးရုံး ဖွင့်လှစ်၍ နယ်စပ် ကုန်သွယ်ရေး စနစ် စတင်ခဲ့သည်။ မူဆယ်နယ်စပ် ကုန်သွယ်ရေး ညွှန်ကြားရေးမှူးရုံး နှင့်အတူ အကောက်ခွန် ဦးစီးဌာန၊ ပြည်တွင်းအခွန်များ ဦးစီးဌာန၊ လူဝင်မှု ကြီးကြပ်ရေး နှင့် အမျိုးသား မှတ်ပုံတင်ရေး ဦးစီးဌာန၊ မြန်မာနိုင်ငံ ရဲတပ်ဖွဲ့၊ ဘဏ်လုပ်ငန်း အဖွဲ့များ ပါဝင်သော စုပေါင်းရုံးများ ဖွင့်လှစ်ထားပြီး သွင်းကုန်၊ ထုတ်ကုန် လုပ်ငန်းများကို တစ်နေရာတည်း ပြီးပြတ်အောင် ဆောင်ရွက်နိုင်သည့် စနစ် (One Stop Service) ဖြင့်ဆောင်ရွက် စေခဲ့သည်။
နိုင်ငံတော် ငြိမ်ဝပ်ပိပြားမှု တည်ဆောက်ရေး အစိုးရအဖွဲ့က နယ်စပ် ကုန်သွယ်ရေး လုပ်ငန်းများကို တရားဝင် ဖွင့်လှစ်ခွင့်ပြု ပေးလိုက်သည့် ရည်ရွယ်ချက် များမှာ အိမ်နီးချင်း နိုင်ငံများနှင့် ချစ်ကြည်ရင်းနှီးမှု ပိုမိုတိုးတက် စေရန်၊ နှစ်နိုင်ငံ ကုန်သွယ်မှု တိုးတက်စေရန် နှင့် ပုံမှန် ကုန်သွယ်မှု လမ်းကြောင်းပေါ်သို့ ရောက်ရှိစေရန်၊ နိုင်ငံတော်အတွက် ရသင့်ရထိုက်သော အခွန်အခများ ရရှိစေရန်၊ ပုဂ္ဂလိက လုပ်ငန်းရှင်များ လုပ်သာကိုင်သာ ရှိပြီး ထိုက်သင့်သော အကျိုးအမြတ်များ ရရှိစေရန်၊ ကုန်စည်စီးဆင်းမှု ပိုမိုအဆင်ပြေ ချောမောစေရန် တို့ဖြစ် သည်။ နယ်စပ်ကုန်သွယ်ရေး စခန်းရုံးများကို အချက်အချာ ကျသော နေရာများ၌ ကျစ်လျစ်စွာ ပြန်လည်ဖွဲ့စည်း ခဲ့ရာ မူဆယ် ၁ဝ၅ မိုင် ကုန်သွယ်ရေး စခန်းကို ၁၉၉၈ ခုနှစ် ဇန်နဝါရီ ၁၂ ရက်တွင် ပြန်လည်ဖွဲ့စည်း ဖွင့်လှစ်၍ လုပ်ငန်းများ အရှိန်အဟုန်မပျက် ဆက်လက် ဆောင်ရွက်ခဲ့သည်။ နယ်စပ် ကုန်သွယ်ရေး လမ်းကြောင်း အဆင်ပြေချောမွေ့ စေရန် မန္တလေး- လားရှိုး- မူဆယ် ကားလမ်းများ ချဲ့ထွင်၍ အဆင့်မြှင့်တင် ပေးထားရာ စိုက်ပျိုးရေး ထွက်ကုန် သီးနှံများဖြင့် ရေထွက်ကုန် ပစ္စည်း ငါး၊ ပုစွန်များကို အချိန်တို အတွင်း တင်ပို့နိုင်ကြ သဖြင့် ကုန်သည်များ အဆင်ပြေ ကြသည်။
နိုင်ငံတော် ငြိမ်ဝပ်ပိပြားမှု တည်ဆောက်ရေး အဖွဲ့သည် နယ်စပ် ကုန်သွယ်ရေး လုပ်ငန်းများ ဖွံ့ဖြိုးရေးကို ဆောင်ရွက်ပေး နေချိန်မှာပင် တိုင်းရင်းသား လက်နက်ကိုင် အဖွဲ့များနှင့် ငြိမ်းချမ်းရေး ရရှိအောင် ၁၉၈၉ ခုနှစ်မှစ၍ ကြိုးပမ်းခဲ့သဖြင့် မန္တလေး- လားရှိုး- မူဆယ် ကုန်သွယ်ရေး လမ်းကြောင်း လုံခြုံချောမွေ့ ခဲ့သည်။ လက်နက်နှင့် ငြိမ်းချမ်းရေး လဲလှယ်၍ ဥပဒေဘောင် အတွင်း ဝင်ရောက်လာသော တိုင်းရင်းသား လက်နက်ကိုင် အဖွဲ့များ အတွက် ကောင်းခါးဒေသ ဖွံ့ဖြိုးရေး ကိုလည်း အထူးပြု ဆောင်ရွက်ပေး ခဲ့သည်။
မူဆယ် ၁ဝ၅ မိုင် နယ်စပ် ကုန်သွယ်ရေးဇုန် သည် နိုင်ငံတော်က တရားဝင်ဖွင့်လှစ် ထားသော နယ်စပ် ကုန်သွယ်ရေး လုပ်ငန်းများတွင် အတွင်ကျယ်ဆုံးနှင့် ကုန်သွယ်မှုတန်ဖိုး အများဆုံး ဖြစ်သည်။ ယနေ့အချိန်တွင် အကြမ်းဖက် သောင်းကျန်းသူ တို့က ကုန်ကားများကို အကြမ်းဖက် ဖျက်ဆီးခြင်း၊ ယာဉ်မောင်းတချို့ ကို ဥပဒေမဲ့ ပစ်သတ်ခြင်း၊ ဆက်ကြေး တောင်းခံခြင်း ကြောင့် ကုန်သွယ်ရေး လုပ်ငန်းများ နစ်နာနေကြ ရသည်။ မူဆယ်မြို့ပေါ် လူနေရပ်ကွက် များကို လက်နက်ကြီးဖြင့် ပစ်ခတ်ခြင်း တို့ကြောင့် ဒေသခံပြည်သူများ ချောက်ချား နေကြရသည်။
ထို့ကြောင့် အမျိုးသား အကျိုးစီးပွားကို ကြီးမားသော အထောက်အကူ ပြုနေသည့် နယ်စပ်ဒေသ ကုန်သွယ်ရေး လမ်းကြောင်း လုံခြုံရေးသည် အမျိုးသား လုံခြုံရေး၏ အစိတ်အပိုင်း ဖြစ်သည်ကို အားလုံးသတိမူ ကြရမည် ဖြစ်ပေသည်။
(အယ်ဒီတာ့အာဘော်)
မြ၀တီနေ့စဉ်သတင်းစာ ၊ စာ(၂)
.jpg)
No comments:
Post a Comment