မန္တလေး ၆-၆-၂၀၁၆
မြန်မာနိုင်ငံသည် ရာသီဥတု ပြောင်းလဲ ဖောက်ပြန်မှု များကြောင့် ဒုက္ခရောက်နိုင်ခြေ အမြင့်မားဆုံး ၁၀ နိုင်ငံတွင် ပါဝင်ပြီး ဒုတိယမြောက် နေရာတွင် ရှိနေကြောင်း ဇွန်လ ၄ ရက် ညနေ ၆ နာရီက မန္တလေးမြို့ ၊ ကနောင်ခန်းမ ၌ ပြုလုပ်သော သဘာဝပတ်ဝန်းကျင် ထိန်းသိမ်းရေးနေ့ အထိမ်းအမှတ် ဟောပြောပွဲ သတင်းများအရ သိရသည်။
ကမ္ဘာပေါ်တွင် ရာသီဥတု ဖောက်ပြန်မှု များကြောင့် ဒုက္ခ ရောက်နိုင်ခြေ အမြင့်မားဆုံး ၁ဝ နိုင်ငံမှာ ဟွန်းဒူရပ်စ်၊ မြန်မာ၊ ဟေတီ၊ နိုင်ဂါရာဂါ၊ ဘင်္ဂလားဒေ့ရှ်၊ ဗီယက်နမ်၊ ဖိလစ်ပိုင်၊ ဒိုမီနီကန်၊ မွန်ဂိုးလီးယား ထိုင်း နှင့် ဂွါတီမာလာ နိုင်ငံတို့ ဖြစ်ကြောင်း သိရသည်။
''ဒီနိုင်ငံတွေရဲ့အဆင့်ကိုကြည့်ရင် မြန်မာနိုင်ငံက ဒုတိယနေရာမှာ ဖြစ်ပါတယ်။ ဒါကို ကျွန်တော်တို့ ပြည်သူတွေ သိစေလိုပါတယ်။ ရာသီဥတု ပြောင်းလဲမှုကို တုံ့ပြန်ဖို့ လိုအပ် နေပါတယ်'' ဟု သစ်တော ပညာရှင် ကိုရင်လှ က ပြောပြသည်။
ရာသီဥတု ဖောက်ပြန်မှု များကြောင့် အသိသာ အထင်ရှားဆုံး သဘာဝဘေး ဖြစ်ပေါ်မှု အနေဖြင့် ၂ဝဝ၈ ခုနှစ်က နာဂစ်မုန်တိုင်း တိုက်ခတ်ခဲ့ပြီး လူပေါင်းများစွာ သေကျေ ပျက်စီး ဒုက္ခရောက်ခဲ့ ရကြောင်း၊ ၄င်းပြင် မကြာသေးမီ ၂ဝ၁၅ ခုနှစ် အတွင်းက ဖြစ်ပေါ်ခဲ့သော ရေကြီးရေလျှံမှု များကြောင့် တိုင်းဒေသကြီး၊ ပြည်နယ်များတွင် ရေကြီး နစ်မြုပ်မှုများ ဖြစ်ပေါ်ခဲ့ပြီး ထိခိုက်ဆုံးရှုံးမှု များနှင့် သေကျေ ပျက်စီးမှုများ ဖြစ်ပေါ်ခဲ့ကြောင်း သိရသည်။
ယခု လက်ရှိ အခြေအနေတွင် မြန်မာ နိုင်ငံတစ်ဝန်း၌ အယ်နီညို ရာသီဥတု ဖြစ်စဉ်ကြောင့် အပူဒဏ်ပိ ရောဂါဖြင့် သေကျေပျက်စီး မှုများရှိပြီး သောက်သုံးရေ ရှားပါးမှု ပြဿနာကို နေရာဒေသ အနှံ့အပြား ကြုံတွေ့ရသဖြင့် ရေရရှိရေး နည်းမျိုးစုံဖြင့် ဆောင်ရွက် နေရကြောင်း သိရသည်။
အဆိုပါ ရာသီဥတု ပြောင်းလဲမှု ဖြစ်စဉ်များသည် သဘာဝပတ်ဝန်း ကျင်ဆိုင်ရာ ပြဿနာ များကြောင့် ဖြစ်ကြောင်း၊ မြန်မာနိုင်ငံ၌ ဦးစားပေး ဖြေရှင်းသင့်သည့် သဘာဝ ပတ်ဝန်းကျင် ပြဿနာများနှင့် ပတ်သက်၍ အာရှ ဖွံ့ဖြိုးရေးဘဏ် (ADB) က ပြဿနာလေးရပ်ကို ဦးစားပေး ဖြေရှင်းရန် အကြံပြု ထားကြောင်း သိရသည်။
သစ်တော ပြုန်းတီးခြင်း၊ မြေဆီလွှာ အရည်အသွေး ကျဆင်းခြင်း၊ ရာသီဥတု ပြောင်းလဲ ဖောက်ပြန်ခြင်း၊ အမှိုက်ကို စနစ်တကျ စီမံခန့်ခွဲ နိုင်ခြင်းဟူသော အဆိုပါ ပြဿနာ လေးရပ်ကို ဦးစားပေး ဖြေရှင်းရန် လိုအပ်ကြောင်း ADB အကြံပြု ထားသည်။
သစ်တော ပြုန်းတီးခြင်းကြောင့် အပူချိန် တိုးလာခြင်း၊ မြေအောက်ရေ ခန်းခြောက် လာခြင်း၊ မြစ်ချောင်းများ ရေခန်းခြင်းနှင့် မိုးရွာသွန်းမှု နည်းပါးခြင်းတို့ ဖြစ်ပေါ်လျက် ရှိသည်။ မြေဆီလွှာ အရည်အသွေး ကျဆင်းခြင်း ကြောင့် သီးနှံ ထွက်ကုန်များ အထွက်နှုန်း နည်းခြင်း၊ အရည်အသွေး မပြည့်မီခြင်း စသည်တို့ ဖြစ်ပေါ်ကြောင်း၊ ရာသီဥတု ပြောင်းလဲ ဖောက်ပြန်မှု များကြောင့် ပြဿနာ များစွာ ကြုံတွေ့ရင်ဆိုင် ရခြင်း၊ အမှိုက်ကို စီမံခန့်ခွဲနိုင်ခြင်း မရှိခြင်း တို့ကြောင့် သဘာဝ ပတ်ဝန်းကျင် ဆိုင်ရာ ပြဿနာများ ပိုမိုဖြစ်ပေါ် လာနိုင်ကြောင်း သိရသည်။ (၁၈၀)
ရတနာပုံနေ့စဉ် ၊ စာ(၁၇)
.jpg)
No comments:
Post a Comment