နေပြည်တော် ၊ ၂၂-၅-၂၀၁၆
ရှမ်းပြည်နယ် (မြောက်ပိုင်း) သီပေါမြို့နယ် ကုန်းညုကျေးရွာ၊ တွန်ဆောက် ကျေးရွာ၊ ကျောက်မဲမြို့နယ် နောင်ကွမ် ကျေးရွာ၊ တိန်းလုံကျေးရွာ များနှင့် လားရှိုးမြို့နယ်၊ နမ္မဘောဒ ဒေသများသို့ ယခုလ အတွင်း SSA (ဝမ်ဟိုင်း) အဖွဲ့မှ သတ်မှတ်နယ်မြေ ကျော်လွန် ဝင်ရောက်ကြောင်း နယ်မြေ သတင်းများ ရရှိသဖြင့် တပ်မတော် စစ်ကြောင်းများမှ မိမိနယ်မြေ အတွင်း သတင်းဖော်ထုတ် ရှင်းလင်းမှုများ စတင် ဆောင်ရွက် ခဲ့သည်။
ယင်းသို့ သတင်းဖော်ထုတ် နယ်မြေ ရှင်းလင်းရာတွင် မေ ၅ ရက်မှ ၂ဝ ရက်အတွင်း ပုံဝိုး- တောင်ခြေ နယ်မြေနှင့် နမ်ပေါင်- နမ္မဘောဒ နယ်မြေများတွင် စုစုပေါင်း ထိတွေ့တိုက်ပွဲ ၁၃ ကြိမ် ဖြစ်ပွားခဲ့ပြီး ရန်သူ့ အလောင်း ခုနစ်လောင်း၊ လက်နက်ငယ် ကိုးလက်၊ ကျည်မျိုးစုံ ၁၁၂ တောင့်၊ ကျည်အိမ် မျိုးစုံ ၄၇ ခု၊ ယမ်းပျော့များ၊ ဒေသန္တရလုပ် မိုင်းလေးလုံး၊ ဆက်သွယ်ရေး စက်ရှစ်လုံး နှင့် အသုံးအဆောင် ပစ္စည်းများ၊ တရားမဝင် သစ်မျိုးစုံ ၁ဝ၅ တန်နှင့် သစ်တင်ယာဉ် ငါးစီးတို့အား သိမ်းဆည်း ရမိခဲ့ပြီး တပ်မတော်မှ တပ်ရင်းမှူး တစ်ဦး အပါအဝင် အရာရှိ၊ စစ်သည် တချို့ အသက်စွန့်ခဲ့ ရကာ ထိခိုက်ဒဏ်ရာများ ရရှိခဲ့ပြီး လက်နက် ၁၈ လက်နှင့် ခဲယမ်း တချို့လည်း ဆုံးရှုံးခဲ့သည်။
SSA (ဝမ်ဟိုင်း) အဖွဲ့သည် တစ်နိုင်ငံလုံး ပစ်ခတ် တိုက်ခိုက်မှု ရပ်စဲရေး သဘောတူ စာချုပ် NCA တွင် ပါဝင် ဆွေးနွေးပြီးနောက် အကြောင်း အမျိုးမျိုး ကြောင့် ပါဝင်လက်မှတ် ရေးထိုးထားခြင်း မရှိသည့်အပြင် သတ်မှတ် ထားသည့် နယ်မြေများအား ကျော်လွန်၍ အတွင်းပိုင်း မြို့ရွာ အနီးအထိ ဝင်ရောက်လာပြီး စခန်းပုန်း တည်ဆောက်ခြင်း၊ လူသစ် စုဆောင်းခြင်း၊ ဆက်ကြေး ကောက်ခံခြင်း နှင့် ဒေသခံပြည်သူ များအပေါ် ဝန်ထုပ်ဝန်ပိုး ဖြစ်စေခြင်း စသည်ဖြင့် နယ်မြေဒေသ တည်ငြိမ် အေးချမ်းရေး ထိခိုက်ပျက်ပြား စေရန် လုပ်ဆောင်လျက် ရှိခဲ့သည်။
အဆိုပါ တိုင်းရင်းသား လက်နက်ကိုင် အဖွဲ့သည် ၂ဝ၁၆ ခုနှစ် မတ်လနှင့် ဧပြီလအတွင်း တွင်လည်း ရှမ်းပြည်နယ် (မြောက်ပိုင်း) ကွတ်ခိုင် မြို့နယ် အတွင်းရှိ တီးမားကျေးရွာ၊ မုံးပေါ် ကျေးရွာ၊ ပန်နားကျေးရွာ များသုိ့လည်း ယခုကဲ့သို့ နယ်မြေ ကျော်လွန် ဝင်ရောက်ခဲ့၍ ပြည်ထောင်စု ကားလမ်းမကြီး နှင့် မူဆယ်၊ လားရှိုး၊ သိန်းနီ၊ ကွတ်ခိုင်မြို့ များတွင် ဖောက်ခွဲ ဖျက်ဆီးရေး ပြုလုပ်မည် ဖြစ်ကြောင်း သတင်းအရ နယ်မြေခံ တပ်မတော် စစ်ကြောင်း များက လိုက်လံ ရှင်းလင်းခဲ့ရာ SSA (ဝမ်ဟိုင်း) အဖွဲ့ဝင် ၂ဝ ဦး ဖမ်းဆီးရမိခဲ့ပြီး၊ လက်နက် မျိုးစုံ ၄၉ လက် အပါအဝင် မိုင်းများ၊ လက်ပစ်ဗုံးများ၊ ကျည်မျိုးစုံနှင့် ဆက်စပ်ပစ္စည်း များစွာ ဖော်ထုတ် သိမ်းဆည်းရမိ ခဲ့ပြီးဖြစ်သည်။
ထို့အတူ ၂ဝ၁၆ ခုနှစ် ဧပြီလ သင်္ကြန်ကာလ အတွင်း နောင်ချိုမြို့နယ် အတွင်းရှိ ဂန့်ကော် ကျေးရွာသို့ လက်နက်ကိုယ်စီ ကိုင်၍ ဝင်ရောက် လာပြီး အပြစ်မဲ့ ရွာသားများအား ရိုက်နှက်ခြင်း၊ ဖမ်းဆီး ခေါ်ဆောင်ခြင်း၊ ဒိုးပင်ကျေးရွာ တစ်ဝိုက်တွင် တရားမဝင် သစ်ခိုးထုတ် ခြင်းများ ပြုလုပ်ခဲ့သည်။ ယခု လတ်တလော မေ ၁၆ ရက် တွင်လည်း ကျောက်မဲမြို့နယ် နောင်ပိန်ကျေးရွာ အနီး မန္တလေး-လားရှိုး သွား ပြည်ထောင်စု ကားလမ်းမကြီး အပေါ်၌ တပ်မတော် ယာဉ်တန်းအား အဝေးထိန်း မိုင်းဖြင့် ဖောက်ခွဲ၍ ချောင်းမြောင်း ပစ်ခတ်ခြင်းများလည်း ပြုလုပ်ခဲ့သည်။
တပ်မတော် အနေဖြင့် တပ်မတော် ငြိမ်းချမ်းရေး မူဝါဒ ၆ ရပ်ပါ အချက်အလက် များ ချိုးဖောက် လာပါက သတိပေး ကန့်ကွက်ခြင်း နှင့် လိုက်နာမှု မရှိပါက ပြည်ထောင်စု သမ္မတ မြန်မာနိုင်ငံတော် ဖွဲ့စည်းပုံ အခြေခံဥပဒေ ၂ဝဝ၈ ခုနှစ် ပုဒ်မ ၃၄၁ ပါ အတိုင်း ဆောင်ရွက်လျက် ရှိသည်နှင့် အညီ ပုံဝိုး၊ တောင်ခြေ၊ တောင်ထိပ်နှင့် နမ္မဘောဒ နယ်မြေများ အလိုက် ဆက်လက် ရှင်းလင်း ဆောင်ရွက်လျက် ရှိကြောင်း သတင်း ရရှိသည်။ (၁၀၀)
မြ၀တီနေ့စဉ် ၊ စာ(၁၅)
.jpg)
No comments:
Post a Comment