ရန်ကုန် ၊ ၄-၁၂-၂ဝ၁၅
ရန်ကုန် စတော့အိတ်ချိန်း ကို ဒီဇင်ဘာ ၉ ရက်တွင် စတင်ဖွင့်လှစ် ပေးမည် ဖြစ်သော်လည်း စတော့ရှယ်ယာ ရောင်းချခြင်းများ အတွက် ပြင်ဆင်စရာများ ရှိနေသဖြင့် ဖွင့်လှစ်ချိန်မှ စတင်၍ နောက် လေးလခန့် ကြာမှသာ စတော့ရှယ်ယာ ရောင်းချခြင်းများ ဖြစ်လာနိုင်မည် ဖြစ်ကြောင်း စတော့ဈေးကွက် ကျွမ်းကျင်သူ များက ပြောသည်။
''တကယ်တော့ စတော့ဈေးကွက် တစ်ခု စတင်ဖို့က အခြေခံ အဆောက်အအုံ ကောင်းကောင်းနဲ့ Network ကောင်းကောင်းပဲ လိုတယ်။ အဲဒါပြီးတာနဲ့ ဝင်လာမယ့် Service Provider တွေက တစ်ခုချင်းစီ ခေါ်လို့ ရပါတယ်။ အခုအဲဒါတွေ အားလုံး ပြီးပြီလို့ သိထားတယ်။ ရောင်းဝယ်တွေနဲ့ ကြားခံ ရောင်းဝယ် တွေတော့ မရွေးရ သေးဘူး ထင်ပါတယ်။ စစချင်းတော့ ရောင်းဖို့ဆိုတာ မဖြစ်နိုင် သေးဘူး။ အနည်းဆုံးတော့ လေးလလောက် ကြာမှ ရှယ်ယာတွေ စဖွင့်ပြီး ရောင်းလိမ့်မယ်'' ဟု စတော့ဈေးကွက် ကျွမ်းကျင်သူ တစ်ဦးက ပြောသည်။
ရန်ကုန် စတော့အိတ်ချိန်း တွင် စာရင်းဝင်၍ အစုရှယ်ယာ ထုတ်ဝေ ရောင်းချမည့် ကုမ္ပဏီငါးခုခန့် ရှိကြောင်း၊ လက်ရှိ စတော့ဈေးကွက် စတင်ချိန်တွင် ရှယ်ယာ ရောင်းဝယ်မှုများ မဖြစ်သေး သော်လည်း ရှယ်ယာ ဝယ်ယူရန် စိတ်ဝင်စားသူများ အနေဖြင့် ကြိုတင် ပြင်ဆင်မှုများ ပြုလုပ်ကာ စတော့အိတ်ချိန်း သဘောတရား များကို သေချာစွာ နားလည်ရန် လိုအပ်ကြောင်း သိရသည်။
အဆိုပါ စတော့အိတ်ချိန်း တည်ထောင်ရန် မြန်မာ့ စီးပွားရေးဘဏ်မှ ၅၁ ရာခိုင်နှုန်း၊ ဂျပန် ဒိုင်ဝါသုတေသန မှ ၃ဝ ရာခိုင်နှုန်းနှင့် တိုကျို စတော့အိတ်ချိန်း မှ ၁၈ ဒသမ ၇၅ ရာခိုင်နှုန်း တို့ဖြင့် ထည့်ဝင် ရင်းနှီးမြှုပ်နှံ လည်ပတ်မည် ဖြစ်ကြောင်း သိရသည်။
ချမ်းချမ်းကို
မြ၀တီနေ့စဉ် ၊ စာ(၁၂)
.jpg)
No comments:
Post a Comment