တာဝန်သိသိ စည်းကမ်းရှိရှိ
မည်သည့် အလုပ်ကို လုပ်သည် ဖြစ်စေ မိမိလုပ်သော အလုပ်သည် လှပနေရန်၊ ဂုဏ်ရှိနေရန်၊ အောင်မြင်နေရန် အတွက် အဓိကကျသော အချက်မှာ စည်းကမ်း စနစ်ကျနခြင်း ဖြစ်သည်။
စည်းကမ်းဟူသည် မိမိတို့အတွက် သတ်မှတ် ထားသော စည်းကမ်း၊ မိမိ ပတ်ဝန်းကျင်မှ သတ်မှတ် ထားသော စည်းကမ်း၊ မိမိအလုပ်မှ သတ်မှတ် ထားသော စည်းကမ်း၊ မိမိနိုင်ငံမှ သတ်မှတ် ထားသော စည်းကမ်း စသည်ဖြင့် စည်းကမ်း အမျိုးမျိုး ရှိသည်။
ထို စည်းကမ်းများကို ကိုယ်စီ ကိုယ်စီ လိုက်နာကြ မှသာ အောင်မြင်သော အလုပ်၊ လှပသော ပတ်ဝန်းကျင်၊ ကောင်းမွန်သော လူမှုဘဝတစ်ခု ပေါ်ထွန်း လာမည့်အပြင် မိမိ ပတ်ဝန်းကျင် ရှိ လူအပေါင်း တို့သည်လည်း စိတ်နှလုံး ချမ်းမြေ့စွာ နေထိုင်ကြ ရမည် ဖြစ်သည်။
''စည်းကမ်းဟူသည် လူ၏တန်ဖိုး ''ဟု ဆိုထားရာ တန်ဖိုးရှိသော လူတစ်ဦး ဖြစ်စေရန် အတွက် သတ်မှတ် ထားသော စည်းကမ်းတို့ကို လိုက်နာကြ ရမည် ဖြစ်သည်။ လူတို့၏ လက်သုံး စကား ဖြစ်သော ''အမှုမဲ့ အမှတ်မဲ့၊ သတိမထား မိလို့''ဟု ဆိုကြခြင်း သည် လုပ်ငန်းတစ်ခု အပေါ် ပေါ့ပေါ့ တန်တန် တာဝန်မဲ့ ပြောသော စကား အသုံးအနှုန်းများ ဖြစ်သည်။
မျက်မှောက် ကာလတွင် လွတ်လပ်မှု နှင့် စည်းကမ်းကို ကွဲကွဲပြားပြား နားလည် ထားသင့် သကဲ့သို့ စည်းကမ်းနှင့် ချုပ်ချယ်မှု ကိုလည်း ခွဲခြားနားလည် ထားသင့်သည်။ သို့မှသာ လုပ်ငန်းများ အောင်မြင် အဆင်ပြေပြီး ကြီးပွား တိုးတက်မည် ဖြစ်သည်။
မြန်မာနိုင်ငံ အနေဖြင့်လည်း လက်ရှိ ကာလတွင် မိမိတို့နှင့် တန်းတူ (သို့မဟုတ်) နောက်တန်းမှ အပြိုင် တိုးတက် လာသော အာဆီယံ နိုင်ငံများကို ကြည့်မည် ဆိုလျှင် နိုင်ငံသူ၊ နိုင်ငံသားများ ကိုယ်စီ စည်းကမ်း လိုက်နာကြ သောကြောင့် ထိုနိုင်ငံများ တစ်စတစ်စ တိုးတက်လာ သည်ကို တွေ့ရသည်။ စည်းကမ်းမဲ့ နေထိုင်သူများ ရှိနေခြင်းသည် မိမိနိုင်ငံ၏ ဂုဏ်သိက္ခာ ကျဆင်းစေမည့် အပြင် နိုင်ငံတကာ က လာရောက်ကြသော နိုင်ငံခြားသား ခရီးသွား ဧည့်သည်များ မြင်တွေ့ပါက အထင်သေး မှတ်ချက်ပြုခြင်း ကိုလည်း ခံကြရမည် ဖြစ်သည်။
ထို့ကြောင့် မည်သူမဆို လုပ်ငန်းများ လုပ်ကိုင် ဆောင်ရွက် ရာတွင် မိမိ လုပ်ကိုင်သော အလုပ် တစ်ခုကို တာဝန်မဲ့၊ စည်းကမ်းမဲ့ လုပ်ကိုင် ဆောင်ရွက်ခြင်း မျိုး မပြုဘဲ တာဝန်သိသိ၊ စည်းကမ်း ရှိရှိ လုပ်ကိုင် ဆောင်ရွက်မှသာ မိမိလုပ်သော လုပ်ငန်း အနေဖြင့် အောင်မြင် ဖြစ်ထွန်းမည် ဖြစ်သည်။
သို့ဖြစ်ရာ လူတိုင်းလူတိုင်း အနေဖြင့် မိမိတို့၏ ကိုယ်ပိုင် စီးပွားရေး လုပ်ငန်းများကို လုပ်ကိုင် ကြရာတွင် လည်းကောင်း၊ အခြားသော လုပ်ငန်းများ၊ အစိုးရရုံး ဌာနများတွင် လည်းကောင်း လုပ်ငန်းများ လုပ်ကိုင် ဆောင်ရွက်ကြ ရာတွင် တာဝန်သိသိ စည်းကမ်းရှိရှိ ဖြင့် လုပ်ငန်းအပေါ် စိတ်ပါဝင်စားစွာ လုပ်ကိုင် ဆောင်ရွက်သင့် ပါကြောင်း ရေးသား လိုက်ရ ပေသည်။
( အယ်ဒီတာ့အာဘော် )
#Yadanarpondaily
#ရတနာပုံနေ့စဉ်
.jpg)
No comments:
Post a Comment