ကိုယ်ကျင့်သီလ ထိန်းသိမ်း
တိုင်းပြည်နှင့် လူမျိုးတို့၏ ဘာသာ သာသနာ၊ ယဉ်ကျေးမှု ဓလေ့ထုံးစံ အစဉ်အလာ များသည် ထိုတိုင်းပြည် ထိုလူမျိုးတို့၏ စိတ်ဓာတ်၊ စရိုက်လက္ခဏာ နှင့် လူမှုဘဝ အခြေအနေ များကို ထင်ဟပ် ပေါ်လွင် စေသည်။
တစ်ဦးနှင့် တစ်ဦး ဆက်ဆံရာ၌ အရေးပါဆုံး ဖြစ်သည့် ကိုယ်အမူအရာ ယဉ်ကျေးခြင်း၊ အပြောအဆို နူးညံ့ သိမ်မွေ့ခြင်း၊ စိတ်ထားဖြူစင် မြင့်မြတ်ခြင်း များသည် ဘာသာ စာရိတ္တ ယဉ်ကျေးမှုများ ဖြစ်သည်။
ထိုကဲ့သို့ ပြုမူပြောဆို ပါက ကုသိုလ် မင်္ဂလာများ တိုးပွားကာ ဤဘဝတွင် ယဉ်ကျေး သိမ်မွေ့သော နိုင်ငံသားများ အဖြစ် ဂုဏ်ယူ ထင်ပေါ်မည် ဖြစ်ပြီး အခြားသူများ၏ အထင်ကြီး လေးစားမှု ကိုလည်း ခံကြရမည် ဖြစ်သည်။ နောင်တမလွန် ဘဝတွင်လည်း ကိုယ်ကျိုး ချမ်းသာများ ဆင့်ကဲရရှိ နိုင်မည် ဖြစ်သည်။
ထိုကဲ့သို့ ပြုမူပြောဆိုခြင်း မရှိပါက ဂါရဝ၊ နိဝါတ သုဘာသိတ မင်္ဂလာများ ပျက်ပြား၍ အပြောအဆို ရိုင်းစိုင်း လာမည်။ စရိုက် လက္ခဏာများ ကြမ်းတမ်း လာမည် ဖြစ်သည်။ လူတို့ အနေဖြင့် ကောင်းမှုထက် မကောင်းမှု တို့တွင် ပျော်မွေ့ တတ်သည်မှာ ဓမ္မတာ ဖြစ်သည်။
ထိုသို့ မကောင်းမှုတွင် ပျော်မွေ့ကြပြီး ထိုမကောင်းမှု တို့ကို အားပေး တတ်သော အရက်သေစာ သောက်စားခြင်း၊ ယဉ်ကျေးမှု မရှိသော ဖျော်ဖြေ တင်ဆက်ခြင်း၊ ညစ်ညမ်းဖွယ်ရာ ဖော်ပြခြင်းနှင့် မူးယစ်ဆေးဝါး သုံးစွဲခြင်း တို့ကြောင့် ယဉ်ကျေးမှု ပျက်ယွင်းခြင်းမှ ကျော်လွန်၍ ဒုစရိုက်မှုများ ကျူးလွန်သည် အထိ ဖြစ်ပေါ်လာကြ ရသည်။
မျက်မှောက် ကာလတွင် အကျင့်စာရိတ္တ ပျက်ယွင်းမှုနှင့် အတူ ကိုယ်ကျင့်သီလ ဖောက်ဖျက် ကျူးလွန်သည် အထိ လူမှုဘဝ နယ်ပယ်တွင် စက်ဆုပ်ရွံရှာ ဖွယ်ကောင်းသော အမှုများကို ကျူးလွန် လာသည်အထိ ကြားသိ နေရသည်။ အထူးသဖြင့် အသိပညာ ဗဟုသုတ နည်းသော ကျေးလက် ဒေသများတွင် အရွယ်မရောက် သေးသည့် မိန်းကလေးငယ် များကို အဓမ္မပြုကျင့် ကျူးလွန်မှုများ ဖြစ်ပွား နေသည်ကို ကြားသိနေ ရသည်။
ထိုသို့ဖြစ်ပွား ရခြင်းမှာ ကျေးလက်ဒေသ များအတွင်းသို့ မတော်လောဘ ရှိသူတို့၏ ဖြန့်ချိပေး လိုက်သော ညစ်ညမ်း စီဒီခွေ၊ ဒီဗွီဒီအခွေ များကြောင့် ဖြစ်သည်။ ထို့ကြောင့် သက်ဆိုင်ရာ တာဝန်ရှိ သူတို့က အဆိုပါ ဖြစ်ပွားမှုနှုန်းများ လျော့ကျစေရန် ကျေးလက်ဒေသ များတွင် အသိပညာပေး ဟောပြောပွဲများ၊ ဆင်ဆာမဲ့ ဗီဒီယိုခွေ ရောင်းချနေမှု များကို အရေးယူခြင်း နှင့် ပြစ်ဒဏ်ချမှတ် ပေးခြင်းများ ဆောင်ရွက် ပေးနေ သော်လည်း ပြစ်မှုများ ထပ်မံဖြစ်ပွားလျက် ရှိသည်။
ထို့ကြောင့် မိမိတို့၏ အရွယ်မရောက် သေးသည့်ကလေးငယ် များကို ရင်အုပ်မကွာ ကြည့်ရှု စောင့်ရှောက် ကြရန်နှင့် ယုံကြည်စိတ်ချစွာ ထားရစ်ခဲ့ခြင်း၊ ကလေးငယ်များကို အဖော်မပါဘဲ ဝေးလံသော နေရာများသို့ တစ်ယောက်တည်း စေလွှတ်ခြင်းများ မပြုလုပ်ရန် လိုအပ်သည်။
သို့ဖြစ်ရာ လူတိုင်းလူတိုင်း မကောင်းမှု ဒုစရိုက်များကို ရှောင်ကြဉ်ကာ ကိုယ်ကျင့်သီလ ကို လုံအောင် စောင့်ထိန်းလျက် လူငယ်တို့၏ အကျင့်စာရိတ္တ ပျက်ပြားစေရန် လုပ်ဆောင် နေသူတို့ကို ပြည်သူ တစ်ရပ်လုံးက ဝိုင်းဝန်းကာကွယ် ထိန်းသိမ်းသွား ကြရမည် ဖြစ်ကြောင်း ရေးသား လိုက်ရ ပေသည်။
( အယ်ဒီတာ့အာဘော် )
#Yadanarpondaily
#ရတနာပုံနေ့စဉ်
.jpg)
No comments:
Post a Comment