ပုဂံဒေသတွင် ခေတ်ဟောင်း မော်တော်ယာဉ်များ နှင့် ဥရောပ ခရီးသွားအဖွဲ့ လာရောက် လည်ပတ်လျက်ရှိ

ညောင်ဦး ၊ ၇-၁၁-၂၀၁၃

မန္တလေးတိုင်း ဒေသကြီး ပုဂံ ယဉ်ကျေးမှု နယ်မြေ ဒေသတွင် ဘယ်လ်ဂျီယံ နိုင်ငံ ဘရပ်ဆဲလ်မြို့ ရှိ Destination Unlimited ခရီးသွား ကုမ္ပဏီ နှင့် Essence of Myanmar ( Inspiration Myanmar ) ခရီးသွား ကုမ္ပဏီ တို့၏ စီစဉ်မှုဖြင့် ၁၉၃၀ - ၁၉၇၁ ခုနှစ် ကာလအတွင်းရှိ ခေတ်ဟောင်း မော်တော်ယာဉ် များဖြင့် ဥရောပ ခရီးသွား အဖွဲ့သည် ပုဂံဒေသ အတွင်း လာရောက် လည်ပတ်လျက် ရှိကြောင်း သိရသည်။

ထိုအဖွဲ့တွင် ဗြိတိန် ၊ ဘယ်လ်ဂျီယံ ၊ ပြင်သစ် ၊ ရုရှား ၊ ဆွစ်ဇာလန် နိုင်ငံများမှ စုစုပေါင်း ၂၄ ဦး ပါဝင်၍ ခေတ်ဟောင်း မော်တော်ယာဉ် ၉ စီးဖြင့် လာရောက် လည်ပတ်ခြင်း ဖြစ်ကြောင်း ၊ မော်တော်ယာဉ် ၉ စီးအနက် တစ်စီးမှာ ကလောမြို့ အရောက်တွင် စက်ချို့ယွင်း မှုကြောင့် မန္တလေးမြို့သို့ ပို့ဆောင် ပြင်ဆင်လျက် ရှိကြောင်း ၊ အဆိုပါ အဖွဲ့သည် ခေတ်ဟောင်း မော်တော်ယာဉ် များကို ဥရောပမှ ရန်ကုန်မြို့သို့ သင်္ဘောဖြင့် သယ်ဆောင်လာပြီး အောက်တိုဘာ ၂၃ ရက်မှ အောက်တိုဘာ ၂၅ ရက်အထိ ရန်ကုန် - ဖျာပုံ - ဘိုကလေး - ဖျာပုံ - ကျိုက်လတ် - မအူပင် - ရန်ကုန်မြို့ များသို့ လည်ပတ်ခဲ့ပြီး ဖြစ်ကြောင်း သိရသည်။

ထို့နောက် အောက်တိုဘာ ၂၇ ရက်တွင် ရန်ကုန် - ပဲခူး - တောင်ငူ - နေပြည်တော် - ပင်းတယ - အင်းလေး - ကလော - ပုပ္ပါးမြို့ များမှ တစ်ဆင့် ပုဂံဒေသသို့ နိုဝင်ဘာ ၄ရက်တွင် ရောက်ရှိ ခဲ့ခြင်း ဖြစ်ကြောင်း ၊ ပုဂံဒေသတွင် ၃ ညအိပ် ခရီးလည်ပတ် ၍ နိုဝင်ဘာ ၇ ရက်တွင် မန္တလေး ၊ ပြင်ဦးလွင် ၊ မုံရွာ ၊ မကွေး ၊ ပြည် မှ ရန်ကုန်မြို့ များသို့ ဆက်လက် ထွက်ခွာမည် ဖြစ်ကြောင်း သိရှိရသည်။