မြန်မာရှေးဟောင်း ဘုန်းတော်ကြီးကျောင်း အင်္ဂါရပ်နှင့်ပြည့်စုံသော အနုလက်ရာမြောက် ဓမ္မိကာရာမ ရွှေကျင်ကျောင်းတော်

-

မန္တလေး နိုဝင်ဘာ ၂၉ 

-

မန္တလေးတိုင်းဒေသကြီး အောင်မြေသာစံ မြို့နယ် ရွှေကျင်ရပ်ကွက်ရှိ ပဉ္စမသင်္ဂါယနာတင် မင်းတုန်းမင်းကြီး၏ ကုသိုလ်တော် ဓမ္မိကာရာမ ရွှေကျင်ကျောင်းတော်ကြီးမှာ မြန်မာရှေးဟောင်း ဘုန်းတော်ကြီးကျောင်း အင်္ဂါရပ်နှင့် ပြည့်စုံသော အနုလက်ရာမြောက် ကျောင်းတော်ဖြစ်သည်။

-

ဓမ္မိကာရာမရွှေကျင် ကျောင်းတော်ကြီးမှာ ရွှေကျင်သာသနာပိုင် ဆရာတော်ကြီး သီတင်းသုံးခဲ့သော ကျောင်းဖြစ်ပြီး ကျောင်းတော်ကြီးမှာ သပ်ရပ်သန့်ရှင်းကာ ပန်းပုအပြောက်အမွမ်းဖြင့် ခံ့ညားလှသည်။ နက်မှောင်သော အရောင်နှင့် အတူ ကျောင်းဦးပြာသာဒ်မှာ ဘုံခုနစ်ဆင့်၊ စနုဆောင်၊    ဘောဂဆောင်များ ပါဝင်ပြီး သစ်သားများနှင့်   တည်ဆောက်ထားသော လက်ရာမြောက် ကျောင်းတော်ကြီးဖြစ်သည်။

-

ကျောင်းတော်ကြီး ဖြစ်ပေါ်လာပုံမှာ သက္ကရာဇ် ၁၈၆ဝ ပြည့်နှစ်တွင် ပဉ္စမသင်္ဂါယနာတင်   မင်းတုန်းမင်း တရားကြီးသည် ရွှေကျင်သာသနာပိုင် ဆရာတော် ဦးဇာဂရအား မန္တလေးမြို့သို့ ပင့်ဆောင်ပြီး မန္တလေးတောင်ခြေ မြောက်ဘက်တွင် သီတင်းသုံးရန် လှူဒါန်းခဲ့ပြီး ကျောင်းတော်ကို မဟာဓမ္မိကာ ရာမတိုက်ဟု ခေါ်တွင်သည်။

-

ရွှေကျင်ကျောင်းတိုက်နှင့် အတူ မင်းကင်းတိုက်၊ မြတောင်တိုက်၊ ထရံကာတိုက်၊ မိုင်းလုံရမည်းသင်း(မိတ္ထီလာတိုက်)ဟု ခေါ်တွင်သောအရန်ကျောင်းကြီး လေးဆောင်ကိုပါ ဆောက်လုပ်လှူဒါန်းခဲ့သည့် အတွက် ရွှေကျင်ငါးတိုက်အဖြစ် ထင်ရှားသည်။

-

ယခုအခါ ခမ်းနားလှပသော ဓမ္မိကာရာမ ရွှေကျင်ကျောင်းတော်ကြီးမှာ ရှေးခေတ်ဘုန်းတော်ကြီး ကျောင်းများ အင်္ဂါရပ်များနှင့် အညီတွေ့မြင်နိုင်သော ကျောင်းတော်အဖြစ် တည်ရှိနေကြောင်း သိရသည်။

-

#မြ၀တီနေ့စဉ်သတင်းစာ