မန္တလေး ၂၀-၉-၂၀၁၇
မန္တလေး ပုသိမ်ကြီးမြို့နယ် အတွင်းရှိ အိမ်ရှေ့စံ ကနောင်မင်းသားကြီး စိုက်ပျိုးခဲ့သည့် အိမ်ရှေ့မင်းထန်းတောနေရာကို အမျိုးသားအဆင့် ထိန်းသိမ်းမှုများ ရရှိနိုင်ရန် ပညာရှင်များ ကြိုးပမ်းလျက်ရှိရာ လှုပ်ရှားမှု တစ်ရပ်အနေဖြင့် ထန်းပင်ပေါင်း တစ်သောင်းကျော်ကို စက်တင်ဘာ ၃ဝ ရက်တွင် စိုက်ပျိုးသွားမည် ဖြစ်ကြောင်း ထန်းနှင့်ထန်းတောင်သူများ ဖွံ့ဖြိုးရေးအသင်းမှ တာဝန်ရှိသူတစ်ဦးက ပြောပြသည်။
လက်ရှိတွင် အိမ်ရှေ့မင်းထန်းတောရှိ ထန်းပင်များကို အစဉ်အဆက် ထိန်းသိမ်းခဲ့သည့် ဒေသခံများက ဆက်လက်ထိန်းသိမ်း လျက်ရှိပြီး နှစ်ပေါင်း ၁၅ဝ ကျော်သက်တမ်းရှိ ထန်းတောများစွာ ကျန်ရှိနေသေးသည့် ယဉ်ကျေးမှု နေရာတစ်ခုဖြစ်ကြောင်း ၎င်းကဆက်လက် ပြောပြသည်။
အိမ်ရှေ့မင်း ထန်းတောတွင် ကနောင်မင်းသားကြီး အစီအစဉ်ဖြင့် အိမ်ရှေ့စံနှင့်မိဖုရား အပါအဝင် အိမ်တော်အမှုထမ်းများက စိုက်ပျိုးခဲ့ရာ နယ်နိမိတ်ပြ စကျင်ကျောက်စာ တိုင်များကို ရွာရှိနေရာအနှံ့အပြားတွင် တွေ့မြင် ရကြောင်း၊ ထို့ပြင်ထန်းပင်များကို ဒေသခံများက ၁၉၉၂ ခုနှစ်တွင် အပင်ပေါင်း သုံးသောင်းစိုက်ပျိုးခဲ့ပြီး နောက်ပိုင်းနှစ်များတွင် ထပ်မံစိုက်ပျိုး နိုင်ခြင်းမရှိခဲ့ကြောင်း ဒေသခံဦးခင်မောင်ကြည်က ပြောပြသည်။
ထန်းပင်များ ပြန်လည်စိုက်ပျိုးခြင်းကို ထန်းတောင်သူများ အသင်းအဖွဲ့အပြင် သစ်ပင်စိုက်အဖွဲ့များ၊ မန္တလေးတက္ကသိုလ်နှင့် ဒေသခံပြည်သူများ ပူးပေါင်းပါဝင်ဆောင်ရွက် သွားမည်ဖြစ်သည်။
လုပ်ငန်းစဉ်သုံးရပ်ဖြင့် ထန်းပင်စိုက်ပွဲပြုလုပ် သွားမည်ဖြစ်ရာ ၎င်းတို့မှာ နယ်နိမိတ်အထိမ်းအမှတ် စကျင်ကျောက်တိုင်များ ပြန်ဖော်ခြင်း၊ ထန်းပညာပေးလုပ်ငန်းများ ဆောင်ရွက်ခြင်းနှင့် ထန်းသယံဇာတ တိုးပွားရေးအတွက် ထန်းတောများ ထိန်းသိမ်းခြင်း လုပ်ငန်းများကို ဒေသခံများနှင့် ပူးပေါင်းဆောင်ရွက် သွားမည်ဟု သိရသည်။
ထို့ပြင် ထန်းပင်များကို စာရင်းပြု သွားမည်ဖြစ်ပြီး တိုင်းဒေသကြီး အစိုးရအဖွဲ့က ခွင့်ပြုလျှင် ဒေသခံများ၏ စားဝတ်နေရေးအတွက် ထန်းတက်ခြင်းကို ဆက်လက်လုပ်ကိုင် ခွင့်ပြုသွားမည် ဖြစ်ကြောင်း သိရသည်။
#Yadanarpondaily
.jpg)
No comments:
Post a Comment