အများသုံးအားကစားခန်းမ၌ ကစားရာတွင် အရေပြားရောဂါအမျိုးမျိုး ဖြစ်ပွားစေနိုင်

နယူးယောက် ၊ ၂၈-၁၂-၂၀၁၆

အများသုံး အားကစားခန်းမ များ၌ လေ့ကျင့် ကစားရာတွင် လူပေါင်းစုံထံမှ ချွေးနှင့်အတူ ဗိုင်းရပ်စ်၊ ဗက်တီးရီးယား၊ မှိုအမျိုးမျိုး တို့ပါ ကျန်ရှိ သွားနိုင်ပြီး ထပ်ဆင့် အသုံးပြုသူများ၌ အရေပြားရောဂါ အမျိုးမျိုးကို ဖြစ်ပွားစေနိုင်သည့် အပြင် တစ်ဦးနှင့်တစ်ဦး ကူးစက်မှု ကိုလည်း ဖြစ်ပွား စေနိုင်ကြောင်း အမေရိကန်နိုင်ငံ ရောဂါ ထိန်းချုပ်ရေး နှင့် တားဆီး ကာကွယ်ရေးဌာန (CDC)က သတိပေးချက် ထုတ်ပြန် ထားသည်။

အထူးသဖြင့် အားကစားခန်းမ များ၌ ပွေးနာ ဖြစ်စေသော ပိုးများ၊ ခြေသည်းများကြား မှိုနာဖြစ်စေသော ပိုးများ၊ ယားနာဖုများ ထခြင်း၊ ပွေးကူးစက်ခံ ရခြင်းကြောင့် အရေပြား ပေါ်တွင် အကွင်းများ ဖြစ်ပေါ်ပြီး ယားယံလေ့ ရှိကြောင်း၊ ခန္ဓာကိုယ် တစ်ခုလုံးတွင် ထွက်ပေါ်နိုင်သည့် နေရာ အတည်တကျ မရှိဘဲ လက်မောင်း၊ လည်ပင်း၊ ကျော၊ ပေါင် မည်သည့် နေရာတွင် ဖြစ်စေ ထွက်ပေါ်နိုင်ကြောင်း၊ ချွေးစိုလျက် ရှိသော စက်ပစ္စည်းများ၊ အားကစား ကိရိယာများကို ကိုင်တွယ် အသုံးပြုရာမှ ကူးစက်လာသော မှိုတစ်မျိုးကြောင့် ပွေးနာစွဲကပ်ခြင်း ဖြစ်ကြောင်း သိရသည်။

အားကစားခန်းမ၌ ကူးစက်နိုင်သော အရေပြားရောဂါ နောက်တစ်မျိုးမှာ ခြေသည်းများကြား မှိုစွဲသော Athlete’s Foot ဖြစ်ကြောင်း၊ ပွေးကွက်တစ်မျိုး ဖြစ်ပြီး ခြေထောက်တွင် အဖြစ်များကြောင်း၊ ခြေဖဝါးယားယံခြင်း၊ ခြေဖဝါး ခြောက်သွေ့လွန်းခြင်း၊ ခြေချောင်း များကြား အရေပြားကွဲအက်ခြင်း တို့ကို ဖြစ်စေနိုင်ကြောင်း၊ ထို့ပြင် Rash ဟုခေါ်သည့် ယားနာဖုများလည်း ထစေနိုင်ကြောင်း၊ ၄င်း ယားနာဖုများသည် အရေပြားနှင့် အရောင်ဆင်တူပြီး တစ်ကိုယ်လုံး ယားယံစေသည့် အဖုအပိမ့်များ ဖြစ်ကြောင်း၊ အားကစားခန်းမ များတွင် ခြေဗလာဖြင့် မကစားဘဲ အားကစားဖိနပ်စီး၍ ကစားခြင်းဖြင့် အထိုက်အလျောက် ကာကွယ်နိုင်မည် ဖြစ်ကြောင်း သိရသည်။

ထို့ကြောင့် အများသုံး အားကစားခန်းမ များ၌ သွားရောက် လေ့ကျင့် အားကစားရာတွင် ဖိနပ်စီးခြင်း၊ ချွေးစို နေသေးသော ပစ္စည်းကိရိယာ များကို ချက်ချင်း မကိုင်တွယ်ဘဲ ခြောက်သွေ့အောင် စောင့်ခြင်း၊ ကစားသူများ ကလည်း မိမိကြောင့် ချွေးစိုသွားသည့် နေရာများကို ခြောက်သွေ့အောင် သုတ်ပေးခြင်းဖြင့် အရေပြားပိုးများ ကူးစက် မခံရအောင် ကာကွယ်နိုင်မည် ဖြစ်ကြောင်း သိရသည်။

ရတနာပုံနေ့စဉ်သတင်းစာ ၊ စာ(၇)