နေပြည်တော် ၊ ၃၀-၁၂-၂၀၁၆
မြန်မာနိုင်ငံတွင် တရားဝင် နယ်စပ်ကုန်သွယ်ရေး စခန်း ၁၅ ခုရှိသည့်အနက် တရုတ်နိုင်ငံ နယ်စပ်တွင် စခန်းလေးခု၊ ထိုင်းနိုင်ငံ နယ်စပ် တစ်လျှောက်တွင် စခန်းရှစ်ခု၊ အိန္ဒိယနိုင်ငံ နယ်စပ်တွင် စခန်းနှစ်ခုနှင့် ဘင်္ဂလားဒေ့ရ်ှနိုင်ငံ နယ်စပ်တွင် စခန်းတစ်ခု အသီးသီး ဖွင့်လှစ်ထားရှိ သော်လည်း ရှည်လျားသည့် တရုတ်နိုင်ငံနှင့် မြန်မာနိုင်ငံ နယ်စပ်တစ်လျှောက် ကန်ပိုက်တီး၊ လွယ်ဂျယ်၊ ချင်းရွှေဟော်နှင့် မူဆယ် ၁ဝ၅ မိုင် နယ်စပ်ကုန်သွယ်ရေး စခန်းဟူ၍ စခန်းလေးခုသာ ရှိပြီး တရားမဝင် ဝင်၊ထွက်ပေါက် များစွာ ရှိနေသောကြောင့် တရားမဝင် လမ်းကြောင်းများမှ ဖမ်းဆီးရမိမှုသည် တရားဝင်လမ်းကြောင်း အခွန်ငွေထက် ၉၀ ရာခိုင်နှုန်းခန့် ပိုမိုများပြားစွာ ရရှိနေကြောင်း၊ ထို့ကြောင့် တရားဝင် ကုန်သွယ်ခွန်၏ ၁ဝ ရာခိုင်နှုန်းခန့်သာ တိုင်းပြည်ဝင်ငွေ ရရှိနေမှုအပေါ် သုံးသပ်မှုများ လုပ်ဆောင်သင့်ကြောင်း ကုန်သွယ်မှု မြှင့်တင်ရေးဦးစီးဌာန နေပြည်တော်မှ သိရသည်။
ပြီးခဲ့သည့် ငါးနှစ်တာ ကာလအတွင်း ရေကြောင်း၊ လေကြောင်းနှင့် နယ်စပ် ကုန်သွယ်မှုပမာဏ စုစုပေါင်း အမေရိကန်ဒေါ်လာ ၁၁၇ ဘီလီယံကျော် ရှိခဲ့သည်။ ပို့ကုန်များမှာ သဘာဝဓာတ်ငွေ့၊ ကျောက်စိမ်း၊ အထည်အလိပ်၊ ဆန်၊ မတ်ပဲ၊ ပဲတီစိမ်း၊ ငါး၊ နှမ်း၊ ကျွန်းသစ်နှင့် ရော်ဘာတို့ ဖြစ်ပြီး အဓိက သွင်းကုန်များမှာ ရေနံထွက် ပစ္စည်းများ၊ မော်တော်ယာဉ်နှင့် ဆက်စပ်ပစ္စည်းများ၊ စက်နှင့် စက်ပစ္စည်းများ၊ သံနှင့် သံမဏိ ပစ္စည်းများ၊ ပလတ်စတစ် ကုန်ကြမ်း ပစ္စည်းများ၊ စားအုန်းဆီ၊ ဆေးဝါး ပစ္စည်းများ၊ လျှပ်စစ် ပစ္စည်းများ နှင့် ဘိလပ်မြေတို့ ဖြစ်ကြောင်း သိရသည်။
ကုန်သွယ်မှုကဏ္ဍ ဖွံ့ဖြိုးတိုးတက်မှု များကို ကြည့်မည်ဆိုပါက တရားဝင် ကုန်သွယ်မှုများသာ မြင့်တက်လာခြင်းမျိုး မဟုတ်ဘဲ တရားမဝင် ကူးသန်း ရောင်းဝယ်မှု များလည်း မြင့်တက် လာသည်ကို တွေ့ရသည်။ တရားမဝင် ကုန်သွယ်မှုများကို တားဆီးမှု မှတ်တမ်းများအရ ၂ဝ၁၂ ခုနှစ်မှ၂ဝ၁၅ ခုနှစ်အတွင်း တန်ဖိုးငွေကျပ် ဘီလီယံ ၅ဝဝ ကျော် သိမ်းဆည်းရမိ ခဲ့ပြီး စားသုံးရန် မသင့်သော ကုန်ပစ္စည်းတန်ဖိုး ငွေကျပ် ၂၅ ဘီလီယံကျော် ဖျက်ဆီး နိုင်ခဲ့ကြောင်း သိရသည်။
တရားမဝင် ကုန်သွယ်မှုများ ပြုလုပ်လျက် ရှိရာတွင် မြန်မာ့အဖိုးတန် ကျွန်းသစ်များ အပါအဝင် သစ်တောထွက် ပစ္စည်းများ၊ လယ်ယာ ထွက်ကုန်များ၊ ကျွဲ၊ နွား အစရှိသည့် တိရစ္ဆာန်များ ပါဝင်ပြီး အများဆုံး တရားမဝင် တင်သွင်းသည့် ပစ္စည်းများတွင် ဆေးနှင့် ဆေးပစ္စည်းများ၊ လူသုံးကုန် ပစ္စည်းများ၊ လျှပ်စစ်ပစ္စည်းများ၊ အလှကုန် ပစ္စည်းများ၊ အရက် ၊ ဘီယာ ၊ စီးကရက် နှင့် ဆေးလိပ်ထွက် ပစ္စည်းများ၊ ဓာတ်မြေသြဇာများ၊ ပိုးသတ်ဆေးနှင့် ပေါင်းသတ်ဆေးများ၊ မျိုးစေ့များ ပါဝင်သည်ကို ကုန်သွယ်မှု မြှင့်တင်ရေး ဦးစီးဌာန မှတ်တမ်းများအရ သိရသည်။
ယခင် အစိုးရလက်ထက် တရားမဝင် ကုန်သွယ်မှုများကို လျှော့ချနိုင်ရန် မိုဘိုင်းအဖွဲ့များ ဖွဲ့စည်း၍ ဆောင်ရွက်ခဲ့သည်။ မူဆယ်-မန္တလေး ကုန်သွယ်မှု လမ်းကြောင်း တစ်လျှောက်တွင် အဖွဲ့စုံအဖွဲ့ နှစ်ဖွဲ့ဖြင့် ဆောင်ရွက်ခဲ့ရာ ကုန်သွယ်ရေး ဦးစီးဌာနက မူဆယ် ၁ဝ၅ မိုင် ကုန်သွယ်ရေးဇုန် တွင် ထုတ်နုတ် ဝန်ထမ်းအင်အားဖြင့် လည်းကောင်း၊ လှုပ်ရှား(၁) ပူးပေါင်းအဖွဲ့ တစ်ဖွဲ့က နောင်ချိုတိုးဂိတ်တွင် အခြေပြု၍ လည်းကောင်း တရားမ၀င် ကုန်သွယ်မှု များကို တားဆီးခဲ့ရာ ၄င်းအဖွဲ့ နှစ်ဖွဲ့ပေါင်း တစ်လလျှင် ပျမ်းမျှ ငွေကျပ် သိန်း ၁၀၀၀၀၀ ကျော် ဖမ်းဆီးရမိခဲ့ကြောင်း သိရသည်။
ထို့ပြင် ကွတ်ခိုင်မြို့တွင် ဖွင့်လှစ်ထား သော နွားပွဲ (ငါးရက်တစ်ဈေး) သည် တစ်ဖက်နိုင်ငံသို့ ကျွဲ ၊ နွားများ တရားမ၀င် တင်ပို့ ရောင်းချနိုင်ရန် တရားဝင်ဖွင့်လှစ် ထားသကဲ့သို့ ဖြစ်နေပြီး ကုန်သည်များက တရားမဝင် လက်နက်ကိုင် အဖွဲ့အစည်းများထံ ဆက်ကြေးပေး၍ တင်ပို့နေကြ ကြောင်း ၊ တရားမဝင် ကုန်သွယ်မှုကို နယ်မြေဒေသခံ အချို့နှင့်ပူးပေါင်း၍ မော်တောင်း ကျေးရွာကို အခြေပြုကာ ပန်ဆိုင်း - ကျိန်စန်းကျော့ လမ်းကို အဓိကထားလျက် ကျွဲ၊ နွား၊ သစ်နှင့် လယ်ယာထွက်ကုန် ပစ္စည်းများ ပို့ဆောင်လျက် ရှိသကဲ့သို့ သွင်းကုန်ပစ္စည်း များကို မူဆယ်မြို့မှ သယ်ဆောင်ပြီး မူဆယ်- ကျိန်စန်းကျော့ ကျောက်တိုင်လမ်းခွဲ၊ တုန်ခန်ကျေးရွာမှ ဝင်ရောက်၍ ကျိန်စန်းကျော့ - ပန်ဆိုင်း - မော်တောင်း လမ်းကြောင်းအတိုင်း တရားမဝင် တင်သွင်းလျက် ရှိကြောင်း သိရသည်။
နမ့်ဖက်ကာ- နမ့်ခမ်း- မူဆယ် လမ်းမကြီးသည် တရားမဝင်အဓိက ကုန်သွယ်မှုလမ်းကြောင်း အဖြစ် တည်ရှိနေပြီး မိုးရာသီတွင် ထော်လာဂျီ၊ ဒိုင်နာယာဉ် များသာ သွားလာလျက် ရှိသော်လည်း ပွင့်လင်းရာသီတွင် ၁၂ ဘီးယဉ်ကြီး များပါ သွားလာလျက် ရှိကြောင်း သိရသည်။
၂ဝ၁၆ ခုနှစ် အောက်တိုဘာလ မှ ဒီဇင်ဘာလအတွင်း မူဆယ် ၁၀၅ မိုင် ကုန်သွယ်ရေးဇုန်ရှိ ကုန်သွယ်ရေး ဦးစီးဌာနနှင့် OSS မြန်မာနိုင်ငံ ရဲတပ်ဖွဲ့ဝင်များ ပူးပေါင်းပြီး ကုန်သွယ်ရေးဇုန်ဝင်း အတွင်းရှိ ပြည်ထောင်စု လမ်းမကြီး တစ်လျှောက် တားဆီးမှုများ ပြုလုပ်ခဲ့ရာ အမှုကိုးမှု ငွေကျပ် ၄၃၉ သိန်းကျော်နှင့် OSS အကောက်ခွန်အမှုတွဲ ၂ဝ၊ ငွေကျပ် ၉၁၅ သိန်းကျော် တားဆီးအရေးယူ နိုင်ခဲ့ကြောင်း ကုန်သွယ်မှု မြှင့်တင်ရေး ဦးစီးဌာန သတင်းများအရ သိရသည်။ ၄င်းဖမ်းဆီးရမိ ငွေပမာဏသည် တရားဝင် ကုန်သွယ်မှု ဝင်ငွေခွန်၏ ၉ဝ ရာခိုင်နှုန်းခန့် ရှိသောကြောင့် တရားမဝင် ကုန်သွယ်မှုကို သုံးသပ်သင့်ကြောင်း သိရသည်။
ရတနာပုံနေ့စဉ်သတင်းစာ ၊ စာ(၃၂)
.jpg)
No comments:
Post a Comment