မြိတ် ၂၈-၆-၂ဝ၁၈
ငှက်သိုက်စုဆောင်း ချိန်နီးကပ်လာ နေပြီဖြစ်၍ ငှက်သိုက်ရှာဖွေ စုဆောင်းသူများ လုပ်ငန်းခွင်ဝင်ရန် ပြင်ဆင်ဆောင်ရွက် နေပြီဖြစ်ကြောင်း မြိတ်မြို့နယ် ဒေသခံ နေထိုင်သူများနှင့် ငှက်သိုက်ရောင်းချ သူများထံမှ သိရသည်။
အဆိုပါ ငှက်သိုက်များမှာ ဇီဝဇိုးငှက်ငယ်များ၏ အသိုက်များ ဖြစ်ပြီး မျိုးပွားရာသီဖြစ်သော ဇန်နဝါရီလ၊ ဧပြီလ၊ သြဂုတ်လတို့တွင် ဥများဥရန် အသိုက်ဆောက်လေ့ရှိသည်။ အဆိုပါငှက်သိုက်များကို ရှာဖွေစုဆောင်းရန်အတွက်၂ဝ၁၅ ခုနှစ်မှစတင်ကာ အချိန်ကာလ သတ်မှတ်ပေးခဲ့ပြီး ငှက်သိုက်ရှာဖွေ စုဆောင်းချိန်ကို မတ်လပထမ ပတ်မှဒုတိယပတ်၊ ဧပြီလပထမပတ်မှ ဒုတိယပတ်၊ ဇူလိုင်လ ပထမပတ်မှ ဒုတိယပတ်နှင့်နိုဝင်ဘာ ၂၁ရက်မှ နိုဝင်ဘာလ ကုန်ထိတစ်နှစ်လျှင် လေးကြိမ်ရှာဖွေ စုဆောင်းခွင့် ပြုပေးခဲ့ကြောင်း သိရသည်။
ထို့ကြောင့် ယခုအခါ တတိယအကြိမ် ငှက်သိုက်ရှာဖွေ စုဆောင်းခွင့် ပြုပေးချိန်သို့ ရောက်ရှိရန်နီးကပ် နေပြီဖြစ်၍ ငှက်သိုက်ရှာဖွေ စုဆောင်းသူများ လုပ်ငန်းခွင်ဝင်ရန် ပြင်ဆင်ဆောင်ရွက် နေပြီဖြစ်ကြောင်း သိရသည်။
ငှက်သိုက် စုဆောင်းချိန်တွင် ငှက်သိုက်ရှာဖွေ စုဆောင်းသူများသည် ကျောက်ဆောင်၊ လိုဏ်ဂူအတွင်း နံရံကို ခက်ခဲစွာတက်ရောက်၍ ငှက်သိုက်များကို ခူးဆွတ်နိုင်ရန် ကျောက်ဆောင်များကို ငြမ်းဆင်၍ သက်စွန့်ဆံဖျား လိုက်လံစုဆောင်းကြပြီး စုဆောင်းရရှိလာသည့် ငှက်သိုက်များကို ဒေသတွင်း ဈေးကွက်များသို့ ပြန်လည်ရောင်းချ ကြကြောင်း သိရသည်။
မြန်မာနိုင်ငံတွင် ငှက်သိုက်များကို တနင်္သာရီတိုင်းဒေသကြီး ထားဝယ်ကမ်းခြေအနီးရှိ ကျွန်းများ၊ မြိတ်ကျွန်းစု၊ ဧရာဝတီတိုင်းဒေသကြီး ပုသိမ်မြို့ အနောက်တောင်ဘက်ရှိ ကျွန်းများတွင် တွေ့ရှိနေရသော်လည်း တနင်္သာရီတိုင်း ဒေသကြီးအတွင်းရှိ ငှက်သိုက်ကျွန်းပေါင်း ၃၂ ကျွန်းမှသာ အဖိုးတန်းငှက်သိုက်များ ထွက်ရှိနေခြင်းဖြစ်သည်။ မြိတ်ကျွန်းစုတွင် ငှက်သိုက်များကို ပုလောမြို့နယ်ရှိ မလိကျွန်း၊ ကျွန်းစုမြို့နယ်ရှိ ရေအေးကျွန်းစု၊ ဘုတ်ပြင်းမြို့နယ်ရှိ ပုလုတိကျွန်းစု၊ ကော့သောင်းမြို့နယ်ရှိ ကဆိုင်းလှ၊ ကော့ငန်းကျွန်းစုများမှ အများဆုံး ရရှိနေပြီး အဆိုပါ ကျွန်းစုများအနက် မလိကျွန်းမှ ငှက်သိုက် အများဆုံးရရှိကြောင်း သိရသည်။
#Themyawadydaily
No comments:
Post a Comment