ရန်ကုန် ၊ ၁၈-၆-၂၀၁၅
အိန္ဒိယနိုင်ငံမှ အကြီးဆုံး ကားကုမ္ပဏီ တစ်ခုဖြစ်သည့် Mahindra မော်တော်ယာဉ် ကုမ္ပဏီမှ ယခုနှစ် နှစ်ကုန်ပိုင်းတွင် ရန်ကုန်မြို့၌ မော်တော်ယာဉ် အရောင်းပြခန်း ဖွင့်လှစ်ခြင်းနှင့် မော်တော်ယာဉ် ထုတ်လုပ်သည့် စက်ရုံ တည်ထောင်ကာ ရင်းနှီးမြှုပ်နှံမှု ပြုလုပ် သွားမည် ဖြစ်ကြောင်း Mahindra မော်တော်ယာဉ် ကုမ္ပဏီ မြန်မာနိုင်ငံ ကိုယ်စားလှယ် ရုံးမှ တာဝန်ရှိသူ တစ်ဦး၏ ပြောကြားချက် အရ သိရသည်။
''အခုဆိုရင် အိန္ဒိယနိုင်ငံ ထုတ် TATA ကားတွေကို မြန်မာနိုင်ငံ ပြည်သူတွေက သဘောကျပြီး အသုံးပြုမှု များကြတယ်။ TATA ကားကုမ္ပဏီက မြန်မာနိုင်ငံမှာ အောင်လည်း အောင်မြင်တယ်။ ဒီလိုပဲ Mahindra မော်တော်ယာဉ် ကုမ္ပဏီက ထုတ်တဲ့ ကားတွေ ကလည်း အရည်အသွေး ပြည့်မီတာကြောင့် မြန်မာနိုင်ငံက လူတွေကြိုက်ပြီး အသုံးပြုမှု များမယ်လို့ မျှော်လင့် ထားပါတယ်''ဟု ၄င်းက ဆက်လက် ပြောသည်။
Mahindra မော်တော်ယာဉ် ကုမ္ပဏီသည် ယခုနှစ် နှစ်ကုန်ပိုင်းမှ စတင်၍ အချိန်နှစ်နှစ်တာ ကာလအတွင်း မော်တော်ယာဉ် ထုတ်လုပ်သည့် စက်ရုံကိုလည်း အပြီး တည်ဆောက် သွားမည်ဖြစ်ပြီး အဆိုပါ ကုမ္ပဏီမှ ထုတ်လုပ်သော မော်တော်ယာဉ် များကို ပြည်တွင်း၌ ရောင်းချမည့် အပြင် မလေးရှားနိုင်ငံ နှင့် ထိုင်းနိုင်ငံ တို့သို့ တင်ပို့ ရောင်းချ သွားမည်ဖြစ်သည်။ Mahindra မော်တော်ယာဉ် ထုတ်လုပ်သည့် စက်ရုံကို ပဲခူးမြို့၌ တည်ထောင် သွားမည်ဖြစ်ပြီး မော်တော်ယာဉ် အရောင်း ပြခန်းကို ယခုနှစ် နှစ်ကုန်ပိုင်းတွင် ရန်ကုန်မြို့၌ ဖွင့်လှစ် သွားမည် ဖြစ်သည်။
ပဲခူးမြို့၌ ဖွင့်လှစ်မည့် Mahindra မော်တော်ယာဉ် ထုတ်လုပ်သည့် စက်ရုံမှ ၄င်း ကုမ္ပဏီ၏ နာမည်ကြီး မော်တော်ယာဉ် အမျိုးအစား နှစ်မျိုးဖြစ်သည့် Scorpio နှင့် XUV 500 တို့ကို အဓိက ထုတ်လုပ် ရောင်းချ သွားမည်ဖြစ်ပြီး မော်တော်ယာဉ် အရောင်းပြခန်း၌ Xylo နှင့် Bolero အမျိုးအစား မော်တော်ယာဉ် များကို အဓိကထား ရောင်းချသွားမည် ဖြစ်ကြောင်း သိရသည်။
Mahindra ကားကုမ္ပဏီမှ ထုတ်သည့် မော်တော်ယာဉ် များကို အိန္ဒိယနိုင်ငံ၌ အလတ်တန်းစား အဆင့်ရှိ သူများ အသုံးပြုမှု များကြောင်း သိရသည်။
မင်းသော်တာလွင်
#Themyawadydaily
No comments:
Post a Comment