မိန်းမလှကျွန်း
ရန်ကုန် ၊ ၂၈-၁-၂ဝ၁၅
ပတ်ဝန်းကျင် ထိန်းသိမ်းရေး ဦးစီးဌာန နှင့် FFI တို့ ပူးပေါင်းကာ မိန်းမလှကျွန်း တောရိုင်း တိရစ္ဆာန် ဘေးမဲ့တော အတွင်းရှိ ငှက်မျိုးစိတ် များကို စာရင်းကောက်ယူ မှုများ ပြုလုပ်ခဲ့ရာ ရေပျော်ငှက် မျိုးစိတ် ၅ဝ မျိုး ၊ ကောင်ရေ ၃၄ဝ၁ ကောင်၊ သစ်တော ငှက်မျိုး စိတ် ၇၆ မျိုး ကောင်ရေ ၁၈၅၉ ကောင်၊ မျိုးသုဉ်းမည့် အန္တရာယ်နှင့် ရင်ဆိုင် နေရသော ရေညှောင့် နှုတ်ဝိုင်းငှက် အပါအဝင် စုစုပေါင်း ငှက်မျိုးစိတ် ၁၂၆ မျိုး တွေ့ရှိ ခဲ့သည်။
ဘိုကလေး မြစ်ကြောင်း တစ်လျှောက်နှင့် မိန်းမလှကျွန်း (ပုံ) တောရိုင်း တိရ စ္ဆာန် ဘေးမဲ့တော အတွင်းရှိ မြစ်ချောင်း၊ လတာပြင်၊ သဲသောင်ခုံ၊ ရွှံ့ညွန်တော၊ မြက်ခင်းပြင် နှင့် ဒီရေတော များ၌ စောင့်ကြည့် ဓာတ်ပုံ ရိုက်ခြင်း၊ ဒစ်ဂျစ်တယ် အသံဖမ်းစက်များ ဖြင့် အသံဖမ်း ယူခြင်းများ ပြုလုပ်ခဲ့ပြီး ကောက်ယူ ရရှိသည့် သစ်တောငှက် နှင့် ရေပျော်ငှက် မျိုးစိတ်များကို IUCN RED List 2014 နှင့် တိုက်ဆိုင်စိစစ် မှတ်တမ်းတင်ခြင်း များ ပြုလုပ်ခဲ့ကြောင်း ပတ်ဝန်းကျင် ထိန်းသိမ်းရေးနှင့် သစ်တောရေးရာ ဝန်ကြီးဌာနမှ သိရသည်။
ရေညှောင့်နှုတ်ဝိုင်း ငှက်မျိုးစိတ်မှာ ရုရှား နိုင်ငံမှ မျိုးစိတ်ဖြစ်ပြီး ယင်း ငှက်မျိုးစိတ်၏ ၅ဝ ရာခိုင်နှုန်းကို ရခိုင်ပြည်နယ် နံ့သာကျွန်း နှင့် မုတ္တမ ပင်လယ်ကွေ့ ဒေသ၊ သံတွဲနှင့် တောင်ပေါက် ဧရိယာများ၌ တွေ့ရှိရ တတ်သည်။ ယခုအခါ မိန်းမလှကျွန်း ဝန်းကျင် ငါးမန်းတောင်ကျွန်း ၌ နှစ်နှစ် ဆက်တိုက် တွေ့ရှိရသဖြင့် ရေညှောင့်နှုတ်ဝိုင်း ငှက်များ တတိယမြောက် နေထိုင်ရာ နေရာအဖြစ် မှတ်တမ်းတင် နိုင်ခဲ့သည်။ ရေညှောင့်နှုတ်ဝိုင်း ငှက်မျိုးစိတ်ကို ရုရှား၊ ဗြိတိန်၊ ဂျပန်၊ သြစတြေးလျ၊ ဆွီဒင်နိုင်ငံ နှင့် အရှေ့အာရှ နိုင်ငံများမှ သဘာဝ ပတ်ဝန်းကျင် ထိန်းသိမ်း ကာကွယ်ရေး အဖွဲ့အစည်းများ ဖြစ်သော BANCA ၊ RSPB ၊ WWT ၊ BTO အစရှိသည့် အဖွဲ့အစည်း များမှ လေ့လာမှုများ ပြုလုပ်လျက် ရှိကြောင်း သိရသည်။
အဆိုပါ ငှက်မျိုးစိတ်ကို ၂ဝဝ၈ ခုနှစ်တွင် ရခိုင်ပြည်နယ် နံ့သာကျွန်း ၌ ၃၆ ကောင်၊ မုတ္တမ ပင်လယ်ကွေ့ ဒေသ၌ ၄၈ ကောင်၊ ၂ဝဝ၉ ခုနှစ်တွင် နံ့သာကျွန်း ၌ ၁၄ ကောင်၊ မုတ္တမ ပင်လယ်ကွေ့ဒေသ၌ ၄၇ ကောင်၊ ၂ဝ၁ဝ ပြည့်နှစ်တွင် နံ့သာကျွန်း ၌ ၁၂ ကောင်မှ ၁၆ ကောင်၊ မုတ္တမ ပင်လယ်ကွေ့ ဒေသ၌ ၇၄ ကောင်နှင့် ဧရာဝတီ မြစ်ဝကျွန်းပေါ် ဒေသ၌ တစ်ကောင်၊ ၂ဝ၁၁ ခုနှစ်တွင် မုတ္တမ ပင်လယ်ကွေ့ ဒေသ၌ ၄၉ ကောင် တွေ့ရှိရကြောင်း နှစ်အလိုက် စစ်တမ်းများ အရ သိရသည်။(၄၄၇)
#Themyawadydaily
#မြ၀တီနေ့စဉ်
No comments:
Post a Comment