ကလိချောင်း ရေတံခါးဟောင်း မပိတ် ရသေးသဖြင့် လယ်ဧက ၃ဝဝဝ ကျော် နွေစပါး စိုက်ပျိုးရန် ခက်ခဲနေ

-

ပဲခူး ဇန်နဝါရီ ၂၁ 

-

ပဲခူးတိုင်းဒေသကြီး ပဲခူးမြို့နယ် ကလိချောင်းအတွင်း ရေတံခါးဟောင်း မပိတ်ရသေးသဖြင့် နွေစပါးစိုက်မည့် ကျေးရွာလေးရွာမှ လယ်ဧက ၃ဝဝဝ ကျော်မှာ ဆည်ရေမရရှိဘဲ နွေစပါးစိုက်ပျိုးရန် ခက်ခဲလျက် ရှိကြောင်း ပဲခူးမြို့နယ် အဝိုင်းကျေးရွာ ဒေသခံများထံမှ သိရသည်။ 

-

ပဲခူးမြို့နယ် အဝိုင်းကျေးရွာ၊ ရွှေတန်ကျေးရွာ၊ ကလိကျေးရွာနှင့် မုက္ကလကျေးရွာတို့မှ လယ်သမားများ အားထားအသုံးပြုရသည့် ကလိချောင်း၏ ရေတံခါးမှာ ကလိကျေးရွာ အနီးတည်ရှိပြီး လွန်ခဲ့သည့် ငါးနှစ်ကျော်ကတည်းက ပျက်စီးနေသဖြင့် ဆည်မှ လွှတ်လိုက်သော ရေများကို ဟန့်တားနိုင်ခြင်း မရှိသော ကြောင့် လယ်သမားများမှာ ဆောင်းသီးနှံနှင့်နွေစပါး စိုက်ပျိုးရန်အခက်အခဲ ကြုံတွေ့နေရသည်။ 

-

''လွန်ခဲ့တဲ့ ငါးနှစ်ကျော် တုန်းက ရေတံခါးကို သစ်သားတုံးတွေနဲ့ အဖွင့်အပိတ် လုပ်ပေးခဲ့တယ်။ ကလိချောင်းရဲ့ ဘယ်၊ ညာရှိ လယ်တွေက အရင်တုန်းက ပဲအမျိုးမျိုး စိုက်ပျိုးကြတယ်။ အခု ပဲစိုက်ပျိုးတာ မဖြစ်ထွန်းတော့ဘူး။ အဲဒီတော့ လယ်သမားတွေက နွေစပါး ပြန်လည်စိုက်ပျိုးဖို့ အခက်တွေ့နေကြတယ်။ ချောင်းက ဒီအတိုင်း ပုံမှန်စီးနေရင် ရေနည်းတော့ ရေတံခါးပိတ်လိုက်မှ ရေများလာပြီး လယ်သမားတွေက ရေစုပ်စက်တွေနဲ့ လယ်တွေကိုတစ်ဆင့် ပို့ပေးပြီး စိုက်ပျိုးရေး လုပ်ချင်တာပါ''ဟု ပဲခူးမြို့နယ် ကလိကျေးရွာနေ တောင်သူတစ်ဦးက ပြောသည်။ 

-

အဆိုပါ ကျေးရွာများတွင် ယခင်က ဆောင်းသီးနှံအဖြစ် ပဲအမျိုးမျိုး စိုက်ပျိုးခဲ့သော်လည်း ယခုအခါ နွေစပါးအား ပြောင်းလဲစိုက်ပျိုးလိုသဖြင့် ဒေသခံတောင်သူ ၁၈ ဦးက ကလိချောင်းအတွင်းရှိ ရေတံခါးဟောင်းအား ပြန်လည် ပြုပြင်ပေးရန် ၂ဝ၁၈ ခုနှစ် စက်တင်ဘာလတွင်တစ်ကြိမ်၊ ဒီဇင်ဘာလတွင် တစ်ကြိမ် သက်ဆိုင်ရာ ဌာနများထံ တင်ပြတောင်း ဆိုခဲ့ကြောင်း သိရသည်။

-

''ကလိချောင်းရေတံခါးနဲ့ ပတ်သက်ပြီး လွှတ်တော်ကိုယ်စားလှယ်ပြောလို့ ဝန်ကြီးဆီ တင်ပြထားပါတယ်။ အရင်က ရေသွင်း၊ ရေထုတ်ရေတံခါးလေး လုပ်ပေးထားတယ်။ အဲဒီတုန်းကတော့ တောင်သူတွေက ပဲစိုက်ပျိုးတဲ့အတွက် ရေသွင်းရေထုတ် မလုပ်ခဲ့ဘူး။ အခုတော့ နွေစပါးစိုက်ပျိုးချင်တယ် ပြောတယ်။ ရေပိတ်ချင်ရင် ထိန်းသိမ်းစရိတ်တော့လိုတယ်''ဟု ပဲခူးတိုင်းဒေသကြီးဆည်မြောင်းနှင့် ရေအသုံးချမှု စီမံခန့်ခွဲရေး ဦးစီးဌာန ညွှန်ကြားရေးမှူး ဦးကိုကိုဦးက ပြောသည်။ 

-

ပဲခူးတိုင်း ဒေသကြီးအတွင်း ဆည်၊ တမံ ၃၃ ခုရှိပြီး နွေစပါးစိုက်ဧက လေးသိန်းကျော် ရှိသည့်အနက် ဧက နှစ်သိန်းကျော် ကိုချောင်းပိတ်၊ မြောင်းပိတ် ရေပေးဝေသည့် အစီအစဉ်ဖြင့် ဆည်ရေပေးနိုင်ရန် စီစဉ်ထားကြောင်း ပဲခူးတိုင်းဒေသကြီး ဆည်မြောင်းနှင့် ရေအသုံးချမှု စီမံခန့်ခွဲရေးဦးစီးဌာနမှသိရသည်။ 

-

အမ်အမ်ကေ

-

#မြ၀တီနေ့စဉ်သတင်းစာ