တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် တပ်မတော်အကြီးစားစက်ရုံ (ရန်ကုန်)သို့ သွားရောက်ကြည့်ရှု စစ်ဆေး

နေပြည်တော်၂၆-၉-၂ဝ၁၈

စက်ရုံမှမော်တော်ယာဉ်ထုတ်လုပ်မှုများအား အကြောင်းအမျိုးမျိုးကြောင့်ရပ်ဆိုင်းခဲ့ကြောင်း၊ ယခုအခါ နိုင်ငံတော်နှင့် တပ်မတော်၏လိုအပ်ချက်ဖြစ်သည့် မော်တော်ယာဉ်များအား ပြန်လည်ထုတ်လုပ်လျက် ရှိပြီး နိုင်ငံတော်အားတစ်ဖက်တစ်လမ်းမှအထောက် အကူပြုနိုင်အောင်ဆောင်ရွက်လျက်ရှိကြောင်း၊ မိမိတို့ပြည်တွင်း၌ထုတ်လုပ်နိုင်ခြင်းသည် ပြည်ပမှဝယ်ယူခြင်းထက်ကုန်ကျမှုများစွာသက်သာကြောင်း၊ ထို့ကြောင့် မိမိတို့ကျွမ်းကျင်သည့်ပညာရပ်များအလိုက် အပြည့်အ၀အသုံးချပြီး အရည်အသွေးမီသည့် မော်တော်ယာဉ်များနှင့် ဆက်စပ်အစိတ်အပိုင်းများအားထုတ်လုပ်ရမည်ဖြစ်ကြောင်း၊ ထို့အပြင်မိမိတို့ တတ်ကျွမ်းထားသည့်ပညာရပ်များကိုလည်း လက်ဆင့်ကမ်းသင်ကြားပေးရမည်ဖြစ်ကြောင်း၊ မိမိတို့ စက်ရုံမှ မော်တော်ယာဉ်များအား ဂုဏ်ယူစွာဖြင့်ထုတ်လုပ်နိုင်ရမည်ဖြစ်ကြောင်းဖြင့် တပ်မတော် ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ရန်ကုန်မြို့ရှိ တပ်မတော်အကြီးစားစက်ရုံ (ရန်ကုန်)သို့ သွားရောက်ကြည့်ရှုစစ်ဆေးစဉ် စက်ရုံဝန်ထမ်းများအား တွေ့ဆုံအမှာစကားပြောကြား ရာ၌ ထည့်သွင်းပြောကြားသည်။

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် ကာကွယ်ရေးဦးစီးချုပ်ရုံးမှ တပ်မတော်အရာရှိကြီးများ၊ ရန်ကုန်တိုင်းစစ်ဌာနချုပ်တိုင်းမှူး ဗိုလ်ချုပ် သက်ပုံနှင့် တာဝန်ရှိသူများ လိုက်ပါပြီး ယနေ့နံနက်ပိုင်းတွင် ရန်ကုန်မြို့ရှိ တပ်မတော်အကြီးစားစက်ရုံ(ရန်ကုန်)သို့ သွားရောက် ကြည့်ရှုစစ်ဆေးသည်။

ဦးစွာ စက်ရုံအစည်းအဝေးခန်းမတွင် စက်ရုံမှူးနှင့်တာဝန်ရှိသူများက မီးသတ်ယာဉ်များနှင့် လုပ်ငန်းသုံး ယာဉ်များထုတ်လုပ်တပ်ဆင်နေမှုအနေအခြေအနေများ၊ Bolt & Nut များထုတ်လုပ်နေမှု အခြေအနေများအား ရှင်းလင်းတင်ပြသည်။ ရှင်းလင်းတင်ပြမှုများအပေါ် တပ်မတော်ကာကွယ်ရေး ဦးစီးချုပ်က ဈေးနှုန်းသင့်တင့်စွာဖြင့် အရည်အသွေးကောင်းမွန်စွာထုတ်လုပ်နိုင်ရေးဆောင်ရွက်ရန်၊ စက်ရုံစွမ်းအားပြည့်လည်ပတ်နိုင်ရေး ဆောင်ရွက်ရန်နှင့် လိုအပ်သည်များအား မှာကြားဖြည့်ဆည်း ဆောင်ရွက်ပေးသည်။

ထို့နောက် တပ်မတော်ကာကွယ်ရေးဦးစီးချုပ်နှင့်အဖွဲ့ဝင်များသည် စက်ရုံအတွင်း မီးသတ်ယာဉ်များနှင့် လုပ်ငန်းသုံးယာဉ်များတပ်ဆင်ထုတ်လုပ်နေမှုအခြေအနေများ၊ Bolt & Nut များထုတ်လုပ်နေမှု အခြေအနေများနှင့် စက်ရုံများအတွင်းလှည့်လည်ကြည့်ရှု စစ်ဆေး၍ တာဝန်ရှိသူများ၏တင်ပြချက်များ အပေါ် လိုအပ်သည်များမှာကြားဖြည့်ဆည်း ဆောင်ရွက်ပေးသည်။

ယင်းနောက် တပ်မတော်ကာကွယ်ရေးဦးစီးချုပ်သည် စက်ရုံဝန်ထမ်းများအား တွေ့ဆုံအမှာ စကားပြောကြားပြီး ချီးမြှင့်ငွေများပေးအပ်ရာ စက်ရုံမှူးကလက်ခံရယူသည်။ အဆိုပါတပ်မတော် အကြီးစားစက်ရုံ(ရန်ကုန်)တွင် နိုင်ငံနှင့်တပ်မတော်အတွက် လိုအပ်လျက်ရှိသည့် အသုံးတည့်သော 6x6 မီးသတ်ယာဉ်၊ 4x2 ရေသယ်ယာဉ်၊ 4x2 ဆီသယ်ယာဉ်များနှင့် Bolt & Nut များထုတ်လုပ် တပ်ဆင်လျက်ရှိပြီး 4x4 မီးသတ်ယာဉ်များ ထုတ်လုပ်နိုင်ရေး အတွက်လည်း ပြင်ဆင်ဆောင်ရွက် လျက်ရှိကြောင်းသတင်း ရရှိသည်။

# မြဝတီနေ့စဉ်သတင်းစာ