နေပြည်တော် ၅-၄-၂ဝ၁၈
တောင်ငူလေတပ်စခန်းဌာနချုပ်မှ လေသူရဲ ဗိုလ်မှူး အာကာဝင်း မောင်းနှင်သည့် အက်ဖ်- ၇ လေယာဉ်သည် လေ့ကျင့်ပျံသန်းမှုဆောင်ရွက်နေစဉ် အင်ဂျင်ချို့ယွင်း၍ ပျက်ကျခဲ့မှုဖြစ်စဉ်နှင့်ပတ်သက်၍ အသေးစိတ် သိရှိနိုင်ရန်အတွက် ကာကွယ်ရေး ဦးစီးချုပ်ရုံး(ကြည်း)နှင့် တပ်မတော်(လေ)မှပညာရှင်များပါဝင်သော အဖွဲ့သည် ယနေ့နံနက်ပိုင်းတွင် တောင်ငူလေတပ်စခန်းဌာနချုပ်နှင့် ဖြစ်စဉ်ဖြစ်ပွားရာနေရာသို့ သွားရောက် ခဲ့ပြီး ပျက်ကျလေယာဉ်အစိတ်အပိုင်းများအား စစ်ဆေးခြင်းနှင့် မျက်မြင် တွေ့ရှိခဲ့သည့် ဒေသခံပြည်သူများအား တွေ့ဆုံမေးမြန်းခြင်းများ ဆောင်ရွက်ခဲ့ပါသည်။
ဖြစ်စဉ်အနေဖြင့် လေယာဉ်မှူး ဗိုလ်မှူး အာကာဝင်းသည် ဧပြီ ၃ ရက် နံနက် ၁၀ နာရီ ၃၆ မိနစ်တွင် လေယာဉ်လေ့ကျင့်ပျံသန်းမှုစတင်ခဲ့ပြီး ၁၀ နာရီ ၄၄ မိနစ်တွင် လေယာဉ်ပြန်လည်ဆင်းသက်ရန်အတွက် လေကြောင်းထိန်းတာဝါသို့ သတင်းပို့ခဲ့ကာ လေယာဉ်ဆင်းပတ်လမ်းအတွင်းသို့ ချဉ်းကပ်ဝင်ရောက်စဉ် စက်ချို့ယွင်းမှုဖြစ်ပွားခဲ့သဖြင့် အင်ဂျင်စက်ရပ်တန့်မှုဖြစ်ပွားခဲ့ကြောင်း လေကြောင်းထိန်းတာဝါသို့ ၁၀ နာရီ ၄၅ မိနစ်တွင် ထပ်မံသတင်းပို့ခဲ့ပါသည်။ ထိုသို့ဖြစ်ပွားချိန်တွင် အနောက်မှ မောင်းနှင်လိုက်ပါ လာသော အက်ဖ် - ၇ လေ့ကျင့်ရေး လေယာဉ်တစ်စီးရှိ ၀ါရင့်လေသူရဲတစ်ဦးက (Air Start) (လေထဲတွင် စက်နှိုးခြင်း) ပြုလုပ်ရန် နှင့် စက်မနိုးပါက လုပ်ဆောင်သင့်သည်များကို လုပ်ဆောင် သွားရန် ညွှန်ကြားခဲ့ပါသည်။
လေယာဉ်မှူး ဗိုလ်မှူး အာကာဝင်းသည် ၎င်းနေရာမှ ၃၀ စက္ကန့်အထိ လေယာဉ်စက်ပြန်နိုးရန် ကြိုးစား ခဲ့သော်လည်း စက်နိုးခြင်းမရှိသဖြင့် အမြင့်မီတာ ၃၀၀ နှင့် ပျံသန်းနှုန်း ၁ နာရီ ၃၂၀ ကီလိုမီတာနှုန်း သို့ရောက်ရှိချိန်တွင် အရေးပေါ် အသက်ကယ်လေထီးပါထိုင်ခုံဖြင့် ခုန်ထွက်မည်ဖြစ်ကြောင်း တာဝါသို့ထပ်မံ သတင်းပို့ခဲ့ပါသည်။ မျက်မြင်စစ်ဆေးချက်များနှင့် ကျွန်းကုန်းကျေးရွာမှ ကျေးရွာသားအချို့၏ မျက်မြင်တွေ့ရှိပြောကြားချက် များအရ ၎င်းနေရာသည် အင်ဒိုင်းရွာအထက် အမြင့်မီတာ ၃၀၀ ခန့်တွင် ရောက်ရှိနေပြီး လေယာဉ်၏ ဦးတည်ရာအရပ်မှာ ကျွန်းကုန်းရွာသို့ ဦးတည်လျက်ရှိကြောင်း တွေ့ရှိရပါသည်။ ထိုအချိန်တွင် အရေးပေါ် လေထီးဖြင့် ခုန်ထွက်မည်ဆိုပါက လေသူရဲတစ်ဦးအတွက် လုံလောက်သည့် အချိန်နှင့် အမြင့်ပေတွင် ရှိ နေနိုင်ပြီး အသက်အန္တရာယ်လွတ်ကင်းနိုင်သည့် အခြေအနေရှိကြောင်းတွေ့ရှိရသော်လည်း အသက်ကယ် လေထီးပါထိုင်ခုံ၏ တွန်းကန်အားကြောင့် လေယာဉ်ပေါ် ဖိအားသက်ရောက်စေ၍ ကျွန်းကုန်းရွာအတွင်းသို့ လေယာဉ်ပျက်ကျနိုင်သည့် အနေအထားတွင်ရှိကြောင်းတွေ့ရှိရပါသည်။ လေသူရဲ ဗိုလ်မှူး အာကာဝင်း သည် ၎င်းနေရာတွင် အရေးပေါ်ခုန်ထွက်ခြင်းကို ပြုလုပ်ခဲ့ခြင်းမရှိဘဲ လေယာဉ်အား ကြိုးစား၍ ဆက်လက် ထိန်းသိမ်း ခဲ့ပြီး ကျွန်းကုန်းရွာအလွန် မြေပြင်မှအမြင့်ပေ ၃၀ မီတာခန့် ရောက်ရှိချိန်မှာသာ အရေးပေါ်ခုန်ထွက်ခြင်း ပြုလုပ် ခဲ့ကြောင်းတွေ့ရှိရသည်။ သို့ဖြစ်၍လုံလောက်သည့် အချိန်နှင့်အမြင့်ပေရရှိတော့ခြင်းမရှိဘဲ လေယာဉ်မြေပြင် သို့ ဆောင့်မိချိန်နှင့်တစ်ပြိုင်နက်တည်းခုန်ထွက်ခဲ့သည့် အခြေအနေမျိုးရောက်ရှိခဲ့သဖြင့် ပြင်းထန်စွာဒဏ်ရာ ရရှိခဲ့ကြောင်းနှင့် တပ်မတော်ဆေးရုံသို့ ဆက်လက်ပို့ဆောင်စဉ် သေဆုံးခဲ့ကြောင်း တွေ့ရှိရပါသည်။
သို့ဖြစ်၍ မိမိအသက်ရှင် လွတ်မြောက်ရေးကို ပဓာနမထားဘဲ ကျွန်းကုန်းရွာ အပေါ် လေယာဉ်ပျက်ကျမှု မရှိစေရေး လေယာဉ်အားအတတ်နိုင်ဆုံး ထိန်းကျောင်းမောင်းနှင်ခဲ့စဉ် အသက်ဆုံးရှုံးခဲ့ရသည့် လေသူရဲဖြစ်သူ ဗိုလ်မှူးအာကာဝင်းအား တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်က ချီးကျူး ဂုဏ်ပြုခဲ့ကြောင်းနှင့် လိုအပ်သည်များအား ဆက်လက်ဆောင်ရွက် ပေးသွားမည် ဖြစ်ကြောင်း သတင်းရရှိပါသည်။
#Themyawadydaily
No comments:
Post a Comment