ဆောင်းခိုငှက်နှင့် ကြက်ငှက်တုပ်ကွေး ကာကွယ်ရေး

ဆောင်းခိုငှက်နှင့် ကြက်ငှက်တုပ်ကွေး ကာကွယ်ရေး

ကမ္ဘာပေါ်တွင် ငှက်မျိုးစိတ်ပေါင်း တစ်သောင်းကျော်ခန့် ရှိပြီး မြန်မာနိုင်ငံတွင် ငှက်မျိုးစိတ်ပေါင်း တစ်ထောင်ကျော် ရှိသည်ဟု မြန်မာနိုင်ငံ ငှက်နှင့် သဘာဝ ပတ်ဝန်းကျင် ထိန်းသိမ်းရေး အသင်း၏ ထုတ်ပြန်ချက် များအရ သိရသည်။

မြန်မာနိုင်ငံ ငှက်နှင့် သဘာဝ ပတ်ဝန်းကျင် ထိန်းသိမ်းရေး အသင်းများသည် အခြေခံ ငှက်ကြည့် သင်တန်းများ ဖွင့်လှစ်၍ ငှက်များအကြောင်း လေ့လာခြင်း၊ ရာသီအလိုက် ငှက်များ ပြောင်းရွှေ့ ကျက်စားခြင်း၊ ပြင်ပ လက္ခဏာနှင့် မျိုးခွဲခြားခြင်း၊ ငှက်အမျိုးအမည် ဖော်ရန် အဓိက အရောင်များကို မှတ်သားခြင်း၊ ငှက်များကို ကွင်းဆင်း လေ့လာခြင်း၊ ငှက်စာရင်း ကောက်ယူခြင်း၊ ငှက်များ လျော့နည်း လာရခြင်း အကြောင်း၊ ငှက်များက လူတို့ကို အကျိုးပြုပုံ တို့ကို သင်ကြား ပေးကြရာ ငှက်ကြည့် ဝါသနာရှင် များနှင့် ဧည့်လမ်းညွှန်များ တက်ရောက် လေ့လာသင်ယူ ကြသည်။

မြန်မာနိုင်ငံသည် ရှေးဟောင်း သမိုင်းဝင် ရုပ်ဝတ္ထုပစ္စည်း များနှင့် သာသနိက အဆောက်အအုံများ တည်ရှိခြင်းကြောင့် သမိုင်း သုတေသီ ကမ္ဘာလှည့် ခရီးသွားများ လာရောက် လေ့လာကြ သကဲ့သို့ ရေမြေ တောတောင် သဘာဝအလှ များနှင့် တိုင်းရင်းသား တို့၏ ရိုးရာ ယဉ်ကျေးမှု ဓလေ့ထုံးစံ တို့ကို လေ့လာသော သဘာဝ အခြေခံ ခရီးသွားများလည်း လာရောက် လေ့လာ ကြသည်။ ထို့ပြင် နိုင်ငံတော် အစိုးရ၏ ပြုပြင် ပြောင်းလဲရေး လုပ်ငန်း များကို စိတ်ဝင်စားသူများ ကလည်း အကြောင်း အမျိုးမျိုးဖြင့် လာရောက် လည်ပတ်လေ့လာ နေကြသည်။

မြန်မာနိုင်ငံသို့ ပြည်ဝင်ဗီဇာများ သတ်မှတ်ရာတွင် သံတမန်နှင့် သံအဖွဲ့ဝင် ဗီဇာ၊ နိုင်ငံတကာ အဖွဲ့အစည်းများ ဗီဇာ၊ ကမ္ဘာလှည့် ဗီဇာ၊ လုပ်ငန်းဗီဇာ၊ အလုပ်သမား ဗီဇာ၊ လူမှုရေးဗီဇာ၊ သာသနာရေး ဗီဇာ၊ ပညာရေးဗီဇာ၊ စာနယ်ဇင်းနှင့် မီဒီယာဗီဇာ၊ ယာဉ်အမှုထမ်း ဗီဇာ၊ အလုပ်ရုံ ဆွေးနွေးပွဲ အစည်းအဝေး နှင့် သုတေသနဗီဇာ၊ ဖြတ်သန်းဗီဇာ တို့ဖြစ်ကြပြီး ၄င်းဗီဇာများဖြင့် ဝင်ရောက်ခွင့်ကို ၂ဝ၁၆ ခုနှစ် ဇန်နဝါရီ ၁၁ ရက်မှ စတင်ခွင့်ပြု  ပေးထားသည်။ ထို့ကြောင့် မြန်မာနိုင်ငံသို့ ပြည်ပဧည့်သည် ဝင်ရောက်မှု တစ်နှစ်ထက် တစ်နှစ်ပိုများ လာကြောင်း တွေ့ရသည်။

မြန်မာနိုင်ငံ ရေမြေတောတောင် သဘာဝကြောင့် ဆောင်းခိုငှက်များ လာရောက်လျက် ရှိရာ အင်းတော်ကြီးအိုင်၊ အင်းလေးကန်၊ မိုးယွန်းကြီးအင်း နှင့် ပင်လယ် ကမ်းရိုးတန်း ဒေသများတွင် ဆောင်းခိုငှက် အများအပြား လာရောက် ခိုနားကြသည်။ ဆောင်းခိုငှက်များ လာရောက် ခြင်းကြောင့် သဘာဝ အခြေခံ ခရီးသွား လုပ်ငန်းများ အတွက် အကျိုးခံစား ရသည်များ ရှိသည့်နည်းတူ ကြက်ငှက်တုပ်ကွေး ရောဂါကူးစက် တတ်ကြောင်းလည်း သိရသည်။

စစ်ကိုင်းတိုင်း ဒေသကြီး မုံရွာ ကြက်မွေးမြူရေးဇုန် တွင် H9N2 ရောဂါ ကျရောက်ခြင်း ကြောင့် ဧပြီလ ဒုတိယ ရက်သတ္တပတ် အတွင်း မွေးမြူရေးကြက် ကောင်ရေ ၂ဝဝဝဝ ခန့် ဖျက်ဆီးပစ် လိုက်ရပြီး ဇီဝလုံခြုံရေးကို အထူးပြု ဆောင်ရွက် နေကြသည်။ ကမ္ဘာ့ ကျန်းမာရေး အဖွဲ့ချုပ် (OIE) နှင့် နိုင်ငံတကာ ပညာရှင်များက အာရှ၊ ဥရောပ၊ အရှေ့အလယ်ပိုင်း နှင့် အာဖရိကဒေသ များ၌တွေ့ရသော H9N2 အားလုံးကို အပျော့စား ကြက်ငှက် တုပ်ကွေးပိုး အဖြစ် သတ်မှတ်ထားကြောင်း သိရသည်။

H9N2 ကြောင့် ကြက်သေဆုံးမှု ကြုံနေရသည့် ကိုရီးယား၊ တရုတ်၊ ဘင်္ဂလားဒေ့ရှ်၊ အိန္ဒိယ၊ ပါကစ္စတန် နှင့် အီရန် စသည့်နိုင်ငံ များတွင် ၄င်းရောဂါ အတွက် ကာကွယ်ဆေး ထိုးနှံ ကာကွယ်ထိန်းချုပ် နိုင်ကြပြီး တရုတ်နှင့် ဘင်္ဂလားဒေ့ရှ် နိုင်ငံတို့တွင် ဖျားနာသည့် ကလေးငယ် တချို့ထံမှ H9N2 ပိုး တွေ့ခဲ့ဖူးသော်လည်း ခဏတာဖျားပြီး အလိုအလျောက် သက်သာ ပျောက်ကင်း သွားကြောင်း သိရသည်။

သို့ဖြစ်၍ မုံရွာ ကြက်မွေးမြူရေးဇုန် တွင် တွေ့ရသော H9N2 ရောဂါပိုးသည် ဆောင်းခိုငှက် များမှတစ်ဆင့် ကူးစက်သည်ဟု မဆိုကြသော်ငြား မပြေးသော် ကန်ရာရှိ ဆိုစကားအရ မြန်မာနိုင်ငံ ငှက်နှင့် သဘာဝ ပတ်ဝန်းကျင် ထိန်းသိမ်းရေး အသင်းများ အနေဖြင့်လည်း အဆိုပါကိစ္စ မျိုးတွင် တတ်နိုင်သည့် ဘက်မှ ပူးပေါင်းပါဝင်ရန် လိုအပ်မည်ဟု မြဝတီ  က သုံးသပ်ရပါသည်။

( အယ်ဒီတာ့အာဘော် )

မြ၀တီနေ့စဉ် ၊ စာ(၂)